Read BORANA BIBLE – KITAABA WAAQA Uumama 6 Bible Online

Uumama 6 - BORANA BIBLE – KITAABA WAAQA bible

Uumama 6

¹Eegi nami hore heddate dubrale d'ale,

²ilmaani Waaqa toko aka dubarti namaa mid'aadu agarte jennaani ta feetu fuute.

³Jennaani AABBO Waaqi waan jed'e, Lubbuuni tiyya ta nama jiraachiiftu haga jirtu nama keesa inteetu; wonti akanatiifi nami foonuma, armaa achi ganna d'ibbafi diddama indabru.

⁴Gaafasifi eegi sunile worra gugurda toko lafa jira, ka haga woi gagahu, ka dubarti namaatiifi ilmaani Waaqaa d'alte. Worri worra jajaba duri, ka lafa keesati gurra qabu.

⁵AABBO Waaqi aka hameenni namaa lafa ira dabre, ammalle heregi garaa worraa hojja ch'ufa hama arginaani,

⁶waan qara worra duri lafa irati mid'aaseefi gaabe. Inni guddo iraa laalefate

⁷waan jed'e, Anini nama uumefi bineensafi simpirreefi bineensa garaani lafa ira lohule ch'ufa lafa keesaa balleesa; waan waan kana ch'ufa mid'aaseefi ya gaabe.

⁸Ammo AABBO Waaqi ammalle Nuhu maache guddo iraa gammade.

⁹Tunini odu Nuhufi worra isaa. Nuhuuni nama d'ugaati, bara suni nami wollaala inqamne isa ch'alla. Inni Waaqaani wold'aqani woliini taani.

¹⁰Nuhuuni ilmaani d'iira sadi qaba, Shemufi Hamufi Yafethi.

¹¹Duuba Waaqa durati lafti hammaatte nami wolhad'e wolsaame.

¹²Waaqi aka lafti hammaatte, hameenni suni nama seene balleese arge.

¹³Jennaani Waaqi waan Nuhuuni jed'e, Anini la buufad'e, aka nama ch'ufa balleesu; wonti akanatiifi lafti ya hammaatte, nami wolhad'e wolsaame, tanaafi worrafi lafale imballeesa.

¹⁴Hobolo guddo mukha jabaani jaari, garaa keesa kuta heddu iti tolchi, waan bisaani dandaani iraani inseeneeni keesafi alalleni d'oobi.

¹⁵Aki atini isi jaartu akana: lafa ira d'eerinni d'und'uma d'ibba sadi, ballinni d'und'uma shantama, oli d'eerinni d'und'uma sodoma.

¹⁶Hobolo suni gubbaa jaari duuchi, fiit'eeni hoboloo ha qota isii d'und'uma tokooni ira d'eerattu. Hobolo keesati balbala mid'aasi, ammalle fulla keesati galani sadi wolgubbaa jaari.

¹⁷Duuba anini bokaya guddaani d'ufa, aka lolaani lafati fach'ae waan lubbu qaba ka lafa jira ch'ufa balleesu. Wonti lafa gubbaa jira ch'ufti indooti,

¹⁸ammo anaafi si wolti kakhanne wold'aqisa woliini tolfanna. Niiti teeti, ilmaani teetifi nad'eeni worrale guuri, hobolo duuda.

¹⁹Waan lubbu qaba ch'ufa, d'alafi korma, fuud'i, hoboloti naqi, aka lubbu baaftu.

²⁰Simpirre gosa ch'ufatiifi bineensa garaani lafa ira lohufi ka illoonnele, ka gosa ch'ufa lama lamaani siti gad'ufani, aka dua d'owartu.

²¹Ammalle sagale gosa ch'ufa ta nyaatani fuud'i olkayi, aka isiini liqimsa namaatiifi ta bineensale taatu.

²² Nuhuuni waan ch'ufa, akuma Waaqi jed'eeni, tolche guute.