Read BORANA BIBLE – KITAABA WAAQA 2 Samueli 10 Bible Online

2 Samueli 10 - BORANA BIBLE – KITAABA WAAQA bible

2 Samueli 10

¹Eegi suni Nahashonini hayyuuni Amoni due jennaani ilmi isaa Hanunini fulla isaa hayyu tahe.

²Duuba hayyu Daudini waan jed'e, Anini Hanunini akuma abbaani isaa duri naa nahe na qarqaare anileeni akasuma isa qarqaara. Duuba Daudini nama erge, iraa hafi Hanuniniini jed'e. Worri sunini Amonini bahe,

³jennaani jaaroleeni Amoni waan hayyuuni jette, Atini waan d'uguma Daudini ulfinna abba kanketitifi lubbu isaa iraa hafi jed'a jara kana siti erge seta? Akasiniti, insobamini! Inni aka dooyate hegeri dira kana balleesuufi worra kana gadi erge!

⁴Jennaani Hanunini worra Daudini erge suni qaqabe, areeda worraa gama toko iraa haade, woya worraa hid'aanati iraa ch'ire worraa, ufira galche.

⁵Daudini qonqo suni d'ageennaani nama fuula keesa worra erge maro worri ch'eeraa galu dad'abeefi inni iti d'aame waan jed'eeni Yerikoti hafa, haga areedi isaani bahuti achi taa, duuba eegi suni koota.

⁶Worri gosa Amoni aka Daudi nyaapa ufifi tolchani hubate, jennaani askarti Shamu ta kuma diddama ta Bethiresbufi Soba d'ufteefi askarti kuma kud'ani lama ta Tobu d'ufte ammalle hayyu Maaka nama kuma toko woliini hori baaseefi goli ufi tolfate.

⁷Daudini dubbi suni d'ageennaani Yoabufi askarti Israeli ch'ufa woliini, had'a jed'e worra fuula keesa erge.

⁸Worri Amoni diraa gabahe fullo dira Raba durati wolti bahe had'iisa kurfefate, ka worri Seriatifi Tobatifi Maaka ballinna lafa keesati gama ufitini had'iisa kurfefate.

⁹Yoabuni aka nyaapi durafi duubaani isaa marse arge jennaani askarti Israeli nama jajaba file, duula worra Shamu kaani duraani d'ufe.

¹⁰Inni askarti isaa ta hafte taani oboleesa isaa Abishai gudda iti tolche, duuba Abishaini askarti suni duula worra Shamu kaani duraani d'ufe.

¹¹Yoabuni waan Abishaini jed'e, Yo worri Shamu na dabsata garte, kooti naa kalchi, ammo yo worri Amoni si dabsate aninileeni d'ufe sii kalcha.

¹²Garaa jabaad'i nama keennafi dira Waaqi keenna nuu kenne nyaapa hanne iraa d'owarra. Fed'iini AABBO Waaqa ha taatuti!

¹³Jennaani Yoabufi jari isaa had'iisa oriani, worri Shamu duraa baqate.

¹⁴Worri Amoni worra Shamu ka baqatu agarraani worrileeni Abishai duraa baqate dira duude. Jennaani Yoabuni had'iisa Amoni iraa deebinaani Yerusalemuti gale.

¹⁵Worri Shamu aka Israeliini worra dabsate agarraani askarti isaani ch'ufa wolti baase.

¹⁶Hadadezerini askarti Shamu ta galaana Efraititini ila boru jirtu ta Shobakini nami gudda askarti isaa ch'ufa iti mata, gayaame worri Helamuti isati d'ufe.

¹⁷Daudini waan kana d'ageennaani, askarti Israeli ch'ufa wolti baase, galaana Yordani taake, had'iisaa Helemu d'ufe, fulla askartini Shamu ch'ibra teetu. Jennaani worri lachu had'iisaa hirba wolti kaachise.

¹⁸Worri Israeli worra dabsate baase, Daudifi worri Israeli askarti Shamu nama d'ibba torba, ka gaari fardi hirkisuni yaatufi askarti farda nama kuma afurtama hobaasani, ammalle shobaki nama gudda askarti Shamule woraanani, artumati ijeesani.

¹⁹Hayyooti Hadadezeri jalati bultu taani, aka Israeliini worra dabsate agarraani booju kad'atte finna worraa jalati bulte. Duuba Akanaani worri Shamu worra Israeli sodaate worra Amoniti eegi suni kalchu dide.