Read BORANA BIBLE – KITAABA WAAQA 1 Hayyoota 22 Bible Online

1 Hayyoota 22 - BORANA BIBLE – KITAABA WAAQA bible

1 Hayyoota 22

¹Haga ganna lama worri Israelitiifi ka Shamu nagayaani woliini tae,

²ammo ganna sadeeso hayyuuni Yuda ka Yehoshefathi jed'ani hayyu Israeli argu d'aqe.

³Ahabuni waan jara isaatini jed'e, Nu maafi ch'allimne ufuma teteenna, ka diri Ramothi ka Gileadi harka hayyu Shamu keesa jiru; d'anne fud'anne ho?

⁴Duuba inni waan Yehoshefathini jed'e, Dira Ramothi deemne woliini haane ho? Yehoshefathini waan jed'eeni, Hayye, anaafi askarti tiyyafi fardooleeni tiyyaaleeni ch'ufti kurfo jirra.

⁵Ammo qara eegi, ato iyyaane Waaqa kad'anne gorsa iraa fud'anna.

⁶Jennaani Ahabuni raagoota nama d'ibba afuri wolti yaame waan jed'eeni, Dira Ramothi inhad'a mo inhad'u? Worri waan jed'eeni, Ee beeni had'i, AABBO Waaqi harka kanketiti worra kenna.

⁷Ammo Yehoshefathini waan jed'eeni, raagi d'ibiini injiru, ka nu gorsa AABBO Waaqa iraa fud'annu?

⁸Ahabuni waan jed'eeni, Ee, toko d'ibiti jira, ka Mikaya ilma Imla jed'ani. Ammo anini isa injibba; wonti akanatiifi inni waan hamtu male waan dansa na infagu. Yehoshefathini waan jed'eeni Akasi, injed'ini.

⁹Jennaani Ahabuni namicha hojatu toko Mikayati erge, Hurrisi, kooti jed'eeni.

¹⁰Hayyooti lamaani taani miha hayyu naqatte, barch'uma ufi ka hayyuma, fulla oobdi, ta fulla fullo dira Samaria jirtu, d'ad'aabatte ira teteete. Duuba raagooti ch'ufti worra dura ejaanjite faddi.

¹¹Raagi toko, ka Zedekia ilma Kenaana jed'ani, Sibiila aka gaafa mid'aase waan Ahabuni jed'e, AABBO Waaqi waan jed'u. Gaafa kanaani worra gosa Shamu haatani dabsattani.

¹²Raagooti taani ch'ufti afaani takaa dubbatte waan jette, Ramothi d'aqi, AABBO Waaqi worra dira suni harka kanketi keenna.

¹³Namichi Mikaya yaamu d'aqe kaani waan jed'eeni raagooti taani ch'ufti yayu afaani takaa dubbate waan dansa hayyu fadde, atinileeni akasuma waan dansa dubbatte hayyu fagu malte.

¹⁴Ammo Mikayaani waan jed'eeni, Anini maqa AABBO Waaqatini kakhad'a, aka waan inni, Jed'i, nani jed'u ch'alla jed'u!

¹⁵Inni fulla hayyu Ahabu d'ufe jennaani hayyuuni waan jed'eeni, Mikaya, nu Ramothi haana mo inhaanu? Mikayaani waan jed'eeni, Beena, had'a, AABBO Waaqi inuma isani dabsachiisi.

¹⁶Ammo hayyichi waan jed'eeni, Hojja maqa AABBO Waaqatini nani dubbatu, d'uga dubbad'i! Maro hagami siti himu male?

¹⁷Mikayaani waan jed'eeni, Anini worra Israeli ch'ufa ka gaareeni gubba firfirsani, hooliye tissitu inqamne fakaatu arga. Ammalle AABBO Waaqi waan jed'u, Worri kunini abba inqabu; ha namu nagayaani galuti.

¹⁸Ahabuni waan Yehoshafathini jed'e, Anini, inni waan hamtu male dansa na infagu sini injinne? Me ilaali!

¹⁹ Ammalle Mikayaani waan jed'e, Amma waan AABBO Waaqi jed'u ch'aqasi! Anini AABBO Waaqa ka barch'uma ufi ira tau gubbati arge, ka malaikaani isa mirgaafi bita isaa enjaanjitu.

²⁰AABBO Waaqi waan jed'e, Eentu Ahabu soba, aka inni deeme Ramothiti duu? Malaikaani gari waan taka jette, ammo ta gari waan d'ibi jette.

²¹Jennaani jinnini toko AABBO Waaqa duraa d'ufte waan jetteeni, Anati isa soba.

²²AABBO Waaqi, akami sobda? jed'e gaafate. Jinnini waan jetteeni, Anini deeme raagoota Ahabu ch'ufa kiyyibsiisa. AABBO Waaqi waan jed'eeni, Beeni, isa sobi, inni inuma sobama.

²³Duuba Mikayaani waan jed'e, AABBO Waaqi yayu raagoota tante tana ch'ufa kiyyibsiise. Ammo isumati si balleesu fed'a!

²⁴Jennaani raagi Zedekiani Mikaya d'abanaase waan jed'eeni, Lubbuuni Waaqa yoomi na bira deemte sini dubbate?

²⁵Mikayaani waan jed'eeni, Gaafa atini mana kanke seente keesati d'okhate waan suni garta.

²⁶Jennaani hayyuuni Israeli waan jed'e, Mikaya qaba, gudda dira kana ka Amoni jed'anifi Yoashi ilma kiyyati geesa.

²⁷Waan jettaniini, Hayyichi waan jed'u, Nama kana mana hid'aansa keesa buusa, qit'a gogafi bisaani ch'allaani gololcha, hagu anini nagayaani galuti.

²⁸Mikayaani waan jed'eeni, Yo atini d'uguma nagayaani galte, isani nami ch'ufti d'uga na taha!

²⁹Jennaani hayyuuni Israelitiifi hayyuuni Yuda ka Yehoshefathi jed'ani, dira Ramothi ka Gileadi woliini had'u d'aqani.

³⁰Ahabuni waan Yehoshefathini jed'e, Anini woya tiyya jijirad'e, nama d'ibi ufi tolche had'u d'aqa, ammo atini woyyuma tante ta hayyuutini had'u d'aqi. Duuba hayyichi Israeli woya jijirate, nama d'ibi ufi tolche had'iisa d'aqe.

³¹Hayyichi Shamu qara waan nama sodomi lama ka askarti isaa ta gaari fardi hirkisuti matatiini jed'e, Hayyu Israeli male, nama d'ibi tokole inhad'ina.

³²Duuba worri Yehoshefathathi arge jennaani hayyu Israeli sehani iti gorani isa had'ani. Ammo inni iyye jennaani,

³³worri aka inni hayyu Israeli intahini hubate, isa had'u lakise.

³⁴Ammo askartichi Shamu toko danu t'iya darbe, hayyu Israeli fulla mihi isaa ka lola woltiini eju worraani. Jennaani hayyichi waan nama gaari isaa oofuni jed'e, Anini ya madae, had'iisa iraa nu deebisi!

³⁵Ka had'iisa aka male jabaachu jiru, hayyu Ahabu gaari isaa keesati fuula worra Shamuti deebisani jabeesani qabani. D'iigi isa keesa yau gaari isaa jala guute, lafti galgalomnani ch'iche.

³⁶Ka aduuni d'ia raraate askarti Israeliti lalabani, waan jed'ani, Nami ch'ufti lafafi dira keesa baataniti gala.

³⁷Akanaani hayyu Ahabuni due, reefa isaa Samaria geesani achiti awaalani.

³⁸Gaari isaa fulla haro Samaria fulla sareeni d'iiga isaa arraabde sharmut'i nafa iti d'iqatuti d'iqani, akuma AABBO Waaqi jed'e kaani.

³⁹Waan hayyu Ahabuni tolche, mana ilka arbaatini ch'okhani ka inni jaareefi dira inni jaare ch'ufa kitaaba Odu Hayyoota Israeli keesati t'aafaniti t'aafani.

⁴⁰Inni due jennaani ilmi isaa Ahaziani fulla isaa hayyu tahe.

⁴¹Ganna afreeso ka Ahabuni hayyu Israeli tahe, Yehoshefathini, ilmi Asa, hayyu Yuda tahe.

⁴²Ganni isaa gaafasi sodomi shani, duuba eege inni ganna diddami shani Yerusalemu keesa lafa mohate. Haad'a isaa maqaani Azuba, isiini dubra Shilhi.

⁴³Akuma abba isaa Asa inni waan AABBO Waaqi fed'u ch'alla tolche, ka diqole iraa ingorini; ammo fulla waaqa d'ara iti kad'atani, ta gaareeni gubba, imballeesine, biyyiti achiti sorio baafte hit'aana aarsu illakimne.

⁴⁴Yehoshefathifi hayyuuni Israeli nagaya wolti buufatani woliini taani.

⁴⁵Waan Yehoshefathini tolche ch'ufafi jannooma isaatiifi woraana inni lole ch'ufa kitaaba Odu Hayyoota Yuda keesati t'aafaniti t'aafani.

⁴⁶Inni sharmut'a d'iiratifi ka uwa, ka duri abbaani isaa Asani lakise ch'ufa lafa keesaa balleese.

⁴⁷Lafti Edomu hayyu inqabdu, tanaafi hayyuuni Yuda nama hayyu jala hojattu hayyu isii tolche.

⁴⁸Yehoshfathini hobolo gugurdo bunaqa mid'aafate, lafa Ofiriti erge, achi worqi guurate; ammo hobolo suni Esioni — Geberiti ch'ach'abde achumati hafte.

⁴⁹Jennaani Ahaziani, ilmi Ahabu, waan Yehoshefathini jed'e, Jari kiyya ha jara kanke woliini hobolo yaabate yauti, ammo Yehoshefathini dubbi suni isa jalaa dide:

⁵⁰Yehoshefathini due jennaani irreesa hayyoota, ka dira Daudi, keesati awaalani, duuba ilmi isaa Yehoramuni fulla isaa hayyu tahe.

⁵¹Ganna kud'ani torbeeso ka Yehoshefathini hayyu Yuda tahe, Ahaziani, ilmi Ahabu, hayyu Israeli tahe, ganna lama Samaria keesa lafa mohate.

⁵²Inni faanuma abba isaa Ahabutifi haad'a isaa Yezebelitifi hayyu Yeroboamu ka Israeli ch'ubbu keesa buuse gula bahe AABBO Waaqa durati ch'ubbu tolche.

⁵³Inni Baali kad'ate hojateefi, ammalle akuma abbaani isaa AABBO Waaqa Israeli dallansiise.