Read BORANA BIBLE – KITAABA WAAQA 1 Hayyoota 5 Bible Online

1 Hayyoota 5 - BORANA BIBLE – KITAABA WAAQA bible

1 Hayyoota 5

¹Hayyu Hiramuni, ka lafa Tiro, haguma duriti jaala Daudi; inni aka Solomonini fulla abba isaa hayyu tahe d'agaye jennaani nama iti erge

²Solomonileeni d'aamsa kana Hiramuti erge:

³Atini imbeeta, aka maro woraana nyaapa isaatiifi abbaani kiyya Daudini Mana AABBO Waaqa isaa keesati kad'atani jaaru dad'abe, haga AABBO Waaqi nyaapa isaa ch'ufa isa dabsachiisuti.

⁴Ammo amma tana AABBO Waaqi kiyya lafa tiyya ya gama ch'ufa nagaya tolche. Anini nyaapa yokhaani waan hamtu tokole woma inqabu.

⁵AABBO Waaqi waan abba kiyyaani jed'e, Ilma kanke ka anini fulla tante hayyu tolchuti Mana naa jaara. Duuba anini amma Mana suni, ka AABBO Waaqa kiyya iti kad'atani, jaaru fed'a.

⁶Duuba amma hojattu tante Lebanoniti naa ergi, ha hind'eesa na gadi ch'irtuti hojattuni tiyyaleeni hojattu tante woliini hojati, ammalle hori waan atini baasi jettu ch'ufa anini imbaasafi. Atini imbeeta, nami keenna tokoleeni aka worra keesani ka Sidoni mukha ch'iru imbeekhu.

⁷Hiramuni d'aamsa Solomoni d'ageennaani aka male gammade waan jed'e, Arra maqa AABBO Waaqa ha faarsani, waan inni ilma qaro akana kana Daudii kenne, ka hayyuma isa iraa fuud'e gosa guddo akana tana fidu!

⁸Jennaani Hiramuni dubbi tana Solomoniti erge waan jed'e, Anini qoonqo tante ya d'agaye, waan atini feetu sii tolcha, hind'eesafi mukha jajaba d'ibi ch'ufa sii ch'ira.

⁹Jari kiyya mukha Lebanoni ch'ire baariiniti gajisse, achiti wolti hid'ani aka bisaani galaana suni fuud'ani fulla atini feetuni d'ufani. Duuba achiti jari kiyya gargari hiikhe, jari kanke guurata. Atini gama kanketini sagale jara kiyya kennu malte.

¹⁰Duuba Hiramuni hind'eesafi mukha jajaba d'ibi ka Solomonini fed'u kenneefi,

¹¹Solomonileeni dargaye kintaala kuma diddamatifi d'ad'a d'ebbe kuma diddama ganna ch'ufa kenneefi, aka inni jara isaatini gololchu.

¹²AABBO Waaqi Solomoni qalbi kenne kakhu ufi guute. Hiramufi Solomonini wold'aqani nagayaani woliini taani.

¹³Hayyu Solomonini nama kuma sodoma irreeni Israeli keesaa wolti guure hojachiise,

¹⁴Adoramu gudda worraa tolche. Inni worra suni fulla saditi gargari qoode, nama kuma kud'ani jia ch'ufa Lebanoniti erge, ka ira hafe worrati lakisa.

¹⁵Ammalle Solomonini nama kuma saddeetama ka d'akha boch'u gareeniti erge, ammalle nama kuma torbatama ka d'akha baatule faana worra erge.

¹⁶Ammalle nama kuma sadiifi d'ibba sadii mata worra suni tolche.

¹⁷Jecha hayyu gula worri d'akha gugurda dadansa boch'eni yayaba Mana Waaqaa tolchani.

¹⁸Worri hogeyi ka Solomonitifi ka Hiramutifi ka dira Bibilosi d'akhaafi mukha Mana Waaqa sunini jaarani kurfeese.