Read BORANA BIBLE – KITAABA WAAQA 1 Odu duri 26 Bible Online

1 Odu duri 26 - BORANA BIBLE – KITAABA WAAQA bible

1 Odu duri 26

¹Aki worra Lawi ka Mana Waaqa eege huji iti qoodani akana. Balbala gosa Kora keesa namicha tokoti jira, ka Meshelemia jed'ani ka ilma Kore, ka worra Asafu.

²Inni ilmaani d'iira torba qaba, ta aka isiini wolgula d'alateeni maqa isii wolti aansani t'aafani: Zekaria, Yediaeli, Zebadia, Yathnieli,

³Elemu, Yohana, Elioenai.

⁴ Ammalle namicha tokoti jira, ka Obed-Edomu jed'ani, ka Waaqi eebise ilmaani saddeeti kenneefi, ta aka worri wolti aane d'alateeni maqa worraa asi t'aafani: Shemaya, Yehosabadi, Yoa, Sakari, Nethaneli,

⁵Amieli, Isakari, Deuletha.

⁶Gurbaani Obed-Edomu ka angafa, ka Shemaya jed'ani, ilmaani jaa qaba: Othini, Refaeli, Obedi, Elsabadi, Elihu, Semakia. Worri ch'ufti worra isaani keesa worra jajaba woguutu; worri maand'a lamaani suni worra kaani ch'ufa ira woguuta.

⁸Worri Obed-Edomu nama jaatami lama, ka aka male waan huji tana beekhu, qaba.

⁹Worri Meshelemia nama kud'ani saddeeti, ka waan huji tana beekhu, qaba.

¹⁰Balbala gosa Merari keesa namicha tokoti jira, ka Hosa jed'ani, ka ilmaani afuri qabu: Shimri (abbaani isaa gudda isa tolche, ato inni angafa taule baate),

¹¹Hilkia, Tebalia, Zekaria. Nami gosa Hosa ka Mana Waaqa eegu nama kud'ani sadi.

¹²Worra Mana Waaqa eegu, worra isaani gula, fulla fullaati qoodani, akuma worra Lawi kaani, huji Mana Waaqa kennanifi.

¹³Worri ch'ufti mana manani haguma gahunu, hit'a buufate balbala hit'aani buutufi laala.

¹⁴Hit'aani fullo ilaboru Shelemia bue, ka fullo mirga, ilma isaa Zekaria, nama hojja ch'ufa qaroomani nama gorsu, bue.

¹⁵Obed-Edomu hit'aani fullo bitaati bue, ilmaani isale hit'a fullo mana keesati woi olkayaniti buefi.

¹⁶Shupimufi Hosa hit'aani fullo ila adutifi fullo Shalekethi, ta kara gubbati, buefi. Huji fullo eegani tana maro marooni namu woligala eega.

¹⁷Gama ilaboru guyya ch'ufa nama jaati fullo eega, gama mirga nama afuri, gama bitale nama afuri. Nama afuriti guyya ch'ufa mana keesati woi olkayani kaani eega, mana keesati woi olkayani suni lachu nama lama lamati eega.

¹⁸D'aatu mana ila adu nama afuriti kara d'aatu lafa eega, ammalle fulla manale nama lamati eega.

¹⁹Worra balbala gosa Koratifi ta Merari huji fullo eegani akana iti qoodani.

²⁰Nami gosa Lawi d'ibileeni fulla beese Mana Waaqa iti olkayanifi fulla waan Waaqaa baasani olkayani hojata.

²¹Ladanini, ilmi Gershoni, nama hedu hore, worra ilma isa Yehieli woliini.

²²Ilmaani Ladani lama d'ibiini, Zethamufi Yoelini, fulla beese Mana Waaqa iti olkayanifi fulla waan Waaqa baasani olkayani hojatani.

²³Ammalle ilmaani Amramutifi, ta Isharitifi ta Hebronitifi ta Uzieli huji iti kennani.

²⁴Shebuelini, ka balbala Gershomu, ilma Musa, nama gudda beese Mana Waaqa olkaayu.

²⁵Inni gara Eliezeri oboleesa Gershomu gula fiit'a Shelomothi. Eliezerini abba Rehabia, ka abba Ishia, ka abba Yoramu, ka abba Zikri, ka abba Shelomothi.

²⁶Shelomothifi worri isaa, waan Daudifi nami worra ufiti matatifi nami mata balbala gosatifi nami gugurdaani askarti Waaqaa baasani olkaya.

²⁷Worri waan had'iisa keesati boojiani ka gari fuud'e eebise, huji Mana Waaqaati baase.

²⁸Shelomothifi worri isa waan raagi Samueli jed'anifi hayyicha Saulofi Abineri, ilma Neritifi, Yoabu, ilmi Seruya, baasani ch'ufa, ka eebisani Mana Waaqatini hojatani, worrati harka qaba.

²⁹D'aloota Ishari keesa, Kennanifi ilmaani isaa, huji waan laalani qorqoratani, iti kennani: waan t'aafanifi dubbi worra Israeli ilaalani qoraani.

³⁰D'aloota Hebroni keesa Hashabiafi fiit'a isaa, nama kuma tokotifi d'ibba torba, ka ch'ufti nama jajaba, fohatani, huji AABBO Waaqatifi huji hayyule, ta galaana Yordani gama ila adu lafa Israeli keesa, harka worraati kennani.

³¹Yeriani gudda d'aloota Hebroniti. Ganna afurtameeso ka Daudini lafa mohate, nama ergani nama d'aloota Hebroni barbaadani, worra suni keesa nama jajaba argani, ka lafa Gileadi keesa Yezeri tau.

³²Hayyu Daudini nama kuma lamatiifi d'ibba torba jajaba, nama abbooti worra ka fiit'a Yeria fohate, huji Waaqatifi huji hayyule, ta galaana Yordani ilaboru lafa Reubenitifi ta Gaditifi ta gosa Manase ta ilaboru, lafa Israeli keesa harka worrati kenne.