Read BORANA BIBLE – KITAABA WAAQA 2 Odu duri 10 Bible Online

2 Odu duri 10 - BORANA BIBLE – KITAABA WAAQA bible

2 Odu duri 10

¹Rehoboamuni Shekemu, fulla worri Israeli ch'ufti aka isa hayyu tolchu wolti bahe, d'aqe.

²Yeroboamuni, ilmi Nebati, ka qara lafa Misiriti hayyu Solomoni baqate, dubbi tana d'agaye jennaani worra ufiti deebie.

³Jennaani worri Israeli sunini isa yaame, gara Rehoboamu woliini d'aqani waan jed'aniini.

⁴Abbaani kanke nu dabse, ulfinna jaba nura kaye. Hojja atini nuraa sablifte, finna dansaani nu d'ufte, nu aka dansaa si gula yaana.

⁵Inni waan jed'eeni, Dubbi teesani ya d'agaye, inherega, sadi bula, gadi dachaa. Jennaani worri kae yae.

⁶Duuba hayyu Rehoboamuni jaarole abba isaati mala d'ooftu dubbi suni gaafate waan jed'eeni, Mala naa d'aa, dubbi anini worra kanani jechu male nati hima.

⁷Worri waan jed'eeni, Yo atini worra kana naate dubbi dansa worra gammachiiftu jetteeni, worri haga jiru jireenna aka dansaa si hojata.

⁸Ammo inni mala jaarole suni dide, dubbi suni hariya isaatini gahe,

⁹mala na d'aa, waan anini worra ulfinna nura fuud'i naani jed'u kana jed'uuni nati hima jed'e.

¹⁰Worri hariya isaa sunini waan jed'eeni, Wonti atini worraani jechu malte tana: qubi kiyya diqaani hid'aana abba kiyya ira furda!

¹¹Waan atini worraani jettu, Abbaani kiyya ulfinna gudda isani ira kaye, ammo anini hagasi irale isaniti guddisa. Inni lichooni isani d'aane ammo anini goraani isani d'aana.

¹²Bultiini sadeeni taani hobaate jennaani, Yeroboamufi gumiini taani ch'ufti Rehoboamuti d'ufte, akuma inni jed'eeni kaani.

¹³Hayyichi mala jaarole taani dide,

¹⁴mala hariya isaa kaani gula bahe, dubbi jajabdu worrati dubbate waan jed'eeni, Abbaani kiyya ulfinna gudda isani ira kaye, ammo anini hagasi irale isaniti guddisa. Inni lichooni isani d'aane, ammo anini goraani isani d'aana!

¹⁵AABBUMA Waaqati hayyicha biyya ch'aqasu d'owe, aka akasiini dubbini inni raaga Ahiya jed'ani, ka Shilo bahe, Yeroboamu ilma Nebatiti himi jed'e, guutamtu.

¹⁶ Biyyiti aka hayyuuni worra ch'aqasu dide argite jennaani waan jette, Nu Daudi maani ira qamna? Ilmi Yese maani nuu baha? Worra Israeli, kaa, nu galcha! Rehoboamuni ha qofa hafuti. Duuba akanaani worri Israeli Rehoboamuti garagale,

¹⁷worra Yudati isa lakise, kae bira yae.

¹⁸Jennaani hayyu Rehoboamuni Adoniramu ka worra huji irreeni hojachiisaniti mataa, worra Israeliti erge, ammo worri d'akhaani d'aane ijeese. Jennaani Rehoboamuni arifate gaari ufi yaabate Yerusalemuti baqate.

¹⁹Tanaafi arti asi worri Israeli nama d'aloota Daudi ch'ufa iti garagale dide.