Read BORANA BIBLE – KITAABA WAAQA 2 Odu duri 35 Bible Online

2 Odu duri 35 - BORANA BIBLE – KITAABA WAAQA bible

2 Odu duri 35

¹Hayyu Yosiani jila Pasaka Yerusalemuti tolche AABBO Waaqa guddise; guyya kud'ani afreeso, ka jia qara, worri hori jila suni qalani qaqale.

²Inni huji qaaloleeni Mana Waaqa keesati hojattu iti kenne, huji tana aka dansaa guuta jed'eeni.

³Ammalle inni worra Lawi, ka worra Israeli barsiisu, ka eebisani AABBO Waaqa hojatuni waan jed'e. Sanduqa Wold'aqisa qulqullo, mana hayyu Solomonini, ilmi Daudi jaare, keesa kaya. Isani deebitani Sanduqa kanani deemu himmalle, ammo AABBO Waaqa keesanifi gumi isaa ta Israeliti hojachu maltani.

⁴ Mana Waaqa keesa balbala balbalaani woli qooda, huji duri hayyu Daudifi ilmi isaa Solomonini isanii kenne gula hojad'a.

⁵Ammalle Mana Waaqa keesa hojja ch'ufa kurfo taa, aka dandeetani worra gosa Israeli ch'ufa ka achi d'ufu qarqaartani.

⁶Ilmoole hoola ta jila Pasaka qaqala, ufi qulqulleesa, waan sorio kurfeesa, aka oboleyaani teesani ta Israeli dubbi AABBO Waaqi Musani jed'e gula yaatu.

⁷Jennaani hayyu Yosiani hori isaa keesa ree kuma sodomatifi koromi looni ta kuma sadi biyyaa baase, Jila Pasakatini tolfad'a jed'e.

⁸Jaaroleeni isaleeni, fed'i worra gula, hori ufi gumifi qaaloleefi worra Lawiti kennite. Ammalle worri gugurdaani Mana Waaqa keesa hojatuleeni — qaallicha gudda Hilkia jed'anifi, Zekariafi Yehielileeni — ree kuma lamatiifi d'ibba jaatiifi koromi d'iba sadi qaalolee kennite, jila Pasakatini tolfad'a jette.

⁹Worri Lawi gugurdaani — Konania, Shemayafi oboleesa isaa Nethaneli, Hashabia, Yeieli, Yozabadi — ree kuma Shanitifi koromi looni d'ibba shani worra isaani ka Lawiti kenne, jila Pasakatini tolfad'a jed'e.

¹⁰Waan jila Pasaka ch'ufa kurfeesani jennaani qaaloleefi worri Lawi, akuma hayyuuni jed'e, fulluma ufi ejaanjani.

¹¹Eegi ree Pasaka suni gogoraani, worri Lawi qaqale, qaaloleeni d'iiga isii fuute, waan sorio irati baasani kaaniti fifit'e.

¹²Jennaani hori gubani sorio baasani, worra-worraani gumi qoodani, aka worri, aada kitaaba Musa keesati t'aafani gula, hori suni AABBO Waaqaa baasu.

¹³ Worri Lawi hori sorio Pasaka suni aada gula wot'ale, fooni qulqullo Waaqaa baasani okoteefi, eele didiqofi gugurdole keesati d'aabani, fooni suni fuud'ani hurrisani biyyaa qoodani.

¹⁴Eegi waan kana ch'ufa hobaasani, worri Lawi qooda ufitifi qooda qaalole ilmaani Haruni d'aabe, wonti akanatiifi qaaloleeni, haga halkaniti asi hori gubani sorio baasanifi gabbinna gubani sorio baasani gubde hafuura baafaachu dad'abe.

¹⁵ Sirbituni gosa Lawi, ta balbala Asafu, fulla Daudini duri, Ejaanja jed'e taani enjaanjitu tana: Asafufi Hemanifi Yeduthuni ka raaga hayyu. Worri balbala Mana Waaqa eegu arti inchochoone, wonti akanatiifi worra Lawi kaaniti jila Pasaka worraa kurfeese.

¹⁶Duuba, akuma hayyuuni Yosiani jed'e, waan kana ch'ufa maro kad'acha AABBO Waaqatifi huji jila Pasakatiifi hori gubani sorio waan mesa fakaata irati baasanifi guyya suni tolchani.

¹⁷ Haga bulti torba worri Israeli ch'ufti ka achi jiru, jila Pasakatiifi jila Qit'a bukho inqamne tolfate. Haguma gaafa bara raaga Samueliti asi jila Pasaka takaa akasi intolfanne.

¹⁸Hayyooti duri lafa jirtu taka jila akasi suni, ta hayyu Yosiafi qaaloleefi worra Lawitifi worra Yudatifi ka Israelitiifi ka Yerusalemuleeni tolfate, intolfanne. Jila suni

¹⁹ganna kud'ani saddeeteeso, ka Yosiani lafa mohate, tolfatani.

²⁰Eegi Yosiani waan kana ch'ufa Mana Waaqati tolche, hayyuuni Misiri, ka Neko jed'ani, duula d'ufe dira d'aatu galaana Efrati, ka Karkemeshi jed'aniini bahe. Yosiani fuula keesa deeme had'u fed'e,

²¹ammo Nekoni qonqo tana Yosiati erge waan jed'e: Hayyu Yuda, nu maani woli ira qamna? Anini si had'u ind'umne, ammo nyaapa kiyya had'u deema, Waaqileeni Hurrisi naani jed'e. Inni gama kiyya jira, tanaafi had'iisa nati ingamini, hegeri inni si balleesa.

²²Ammo Yosiani iraa deebiu dide, waan Waaqi afaani hayyu Nekotini isani jed'e ch'aqasu dide, woya jijirate, diida Megido keesati isaa had'u d'aqe.

²³Ato woli had'anu, t'iyiti worra Misiri hayyu Yosia woraante. Jennaani inni waan hojattu isatini jed'e, Armaa na fuud'a, ya aka hama na madeesani!

²⁴Hojatuni isa gaari keesaa isa fuute, gaari d'ibi keesa keete, Yerusalemuti geesite. Inni achi due awaala hayyoota keesati awaalani, jennaani worri Yudatifi ka Yerusalemu ch'ufti aka male isaa bohe.

²⁵Raagi Yeremiaa jed'ani faarse isaa bohe arti asi sirbituni Israeli, d'iirafi nad'eenileeni, hojja isaa bootu faaru tanani bootifi. Faaruni sunini kitaaba Boha keesa jirti.

²⁶Waan Yosiani tolche ch'ufa — waan dansa inni AABBO Waaqa tolcheefi seera inni guuteefi

²⁷odu isaa haguma geetunu — kitaaba Odu Hayyoota Israelitiifi ta Yuda keesati t'aafaniti t'aafani.