Read BORANA BIBLE – KITAABA WAAQA 2 Odu duri 6 Bible Online

2 Odu duri 6 - BORANA BIBLE – KITAABA WAAQA bible

2 Odu duri 6

¹Jennaani Solomonini Waaqa kad'ate waan jed'e, Ee AABBO Waaqa, atini dumansaafi dukana fohate keesati galta.

²Amma tana anini yayu mana gudda dansa sii jaare, ka atini haga jiru jireenna keesati galtu.

³Ato biyyiti achi ejaanjitu Solomonini fuula worrati deefate, worra eebise.

⁴ Duuba inni waan jed'e, AABBO Waaqa Israeli ha guddisani. Inni yayu kakhu duri abba kiyya Dauditi kakhate guute. Gaafasi inni waan jed'e,

⁵Haguma gumi tiyya lafa Misiri keesaa baase, anini dira tokole lafa Israeli keesati fulla mana kiyya iti jaarani na kad'atani infohanne; ammalle anini nama worra kiyya ka Israelitini deemu infohanne.

⁶Ammo amma tana yayu dira Yerusalemu fohad'e, aka isa keesati na kad'atani, ammalle anini ya si fohad'e, Daudi, aka atini gumi tiyya fiddu jed'e.

⁷Ammalle Solomonini waan worraani jed'e, Abbaani kiyya, Daudini, duri herege, aka Mana AABBO, Waaqa Israeli, iti kad'atani jaaru;

⁸ammo AABBO Waaqi waan isaani jed'e, Heregi kanke sunini dansa,

⁹ammo atini mana suni na injaartu, nami mana suni na jaaru ilmuma kanke.

¹⁰Amma tana AABBO Waaqi yayu kakhu ufi guute anini huji hayyuma abba kiyya iraa fuud'e, Mana AABBO Waaqa Israeli iti kad'atani yayu jaare.

¹¹Ammalle Mana suni keesa anini yayu Sanduqa Wold'aqisa, ka d'akha hahafalicha wold'aqisa AABBO Waaqi duri ababoota teennaani woliini tolfate, qabu, kaye.

¹²Jennaani Solomonini gumi ch'ufa dura d'ufe, fulla sorio iti qalani eje, harka olfud'ate, Waaqa kad'ate.

¹³(Solomonini qara fulla ira ejani gumiti haasani sibiila diimani mid'aase, ballinna d'aatu Mana Waaqa kaye. Woni suni d'eerinni isii d'und'uma shani, ballinnileeni d'und'uma shani, old'eerinni d'und'uma sadi. Inni woni suni kore. Fulla nami ch'ufti dandae isa argu jilbifate, harka ufi olqabate.)

¹⁴Inni Waaqa kad'ate waan jed'e, Ee AABBO, Waaqa Israeli, Waaqi aka kanketi tokoleeni lafafi gubba injiru! Atini wold'aqisa gumi tante woliini tolfatte jabeesite. Jaalala tante worra garsiifta, hojja worri garaa tokooni si gula yau.

¹⁵Atini kakhu abba kiyya Dauditi kakhate yayu jabeesite; dubbini sunini ch'ufti arra yayu guutamte.

¹⁶ Amma tana, Ee AABBO Waaqa Israeli, kakhu d'ibi atini abba kiyyati kakhate guuti, ta atini, haguma jiru jireenna, d'aloota kanke keesa, nami toko Israeli mohata, jette hojja gumiini tante aka inni Seera kanke guute, guutu.

¹⁷Tanaafi amma tana, ee Waaqa Israeli, waan atini abba kiyya Daudi hojattu tanteeti kakhatte ch'ufa guuti.

¹⁸ AABBO Waaqa, d'uguma atini lafa ira nama woliini inteeta? Gubbaleeni ato ballo akami tateele si ingeetu, duuba Mani anini jaare kunini akami si gaha?

¹⁹Ee AABBO Waaqa kiyya, anini hojattu tanteeti, kad'acha tiyya na d'agayi, waan anini arra si kad'ad'ule naa kenni.

²⁰ Halkani guyya Mana kana tissi. Atini ya kakhate aka armati si kad'atani, tanaafi hojja anini Mana kanati fuula deefad'e sii kad'ad'u na ch'aqasi.

²¹Kad'acha tiyyaafi ta gumi tante ta Israeli, hojja nu fuula armati deefanne si kad'annu nuu d'agayi, worra kanke ka gubbati nu d'agayi nuu araarami.

²²Hojja namaani, ya wo yakite jed'ani himatani, fulla sorio iti qalani, ta Mana kanke kana keesa jirtuuni d'ufani kakhachiisani,

²³Ee AABBO Waaqa, gubbati ch'aqasi, hojattu tante dubbi worraa d'uga gula muri. Nama wollaala qabu wollaala iti muri, ka inqamne galakisi.

²⁴Hojja worri kanke ka Israeli maro worri siti dabeefi nyaapi dabsate, ammo duuba eege worri siti deebie, Mana kanati d'ufe garaa laafe araarsa si kad'ate,

²⁵gubbaa worra ch'aqasi. Daba gumi tanteeti araaramifi, lafa atini ababoota worraati kennite worraa deebisi.

²⁶Hojja atini maro worri kanke si durati wollaaleefi bokaya worra roobu didde, ammo duuba hojja worri wollaala suni iraa deebie, Mana kanati fuula deefate, garaa laafe si kad'atu,

²⁷Ee AABBO Waaqa, gubbati worra ch'aqasi, daba hojattu tante worra Israeli biraa deemifi, waan d'uga worra barsiisi. Duuba, Ee AABBO Waaqa, lafa tante tana, ta atini d'aala worra kanketi kennite, bokaya roobifi.

²⁸Hojja oolaani jabduuni yokhaani ch'iisi hamani lafati bue, yokhaani qilleensa hamafi raamofi, awaanisafi buqatani mid'aanti buute balleesitu, yokhaani hojja nyaapi worra kanke had'e, yokhaani hojja d'ukubafi fayyad'abi worrati bue,

²⁹kad'acha worraa d'agayifi. Hojja worri kanke ka Israeli nami toko gargala ufi arge, harka ufi gara Mana Waaqa kana qabe Waaqa kad'ate,

³⁰kad'acha isaa d'agayifi. Mana kanke ka gubbati worra ch'aqasi, araaramifi. Si ch'allati herega nama ch'ufa beekha, tanaafi nama ch'ufa waan isaa male tolchita,

³¹aka worri kanke, hojja lafa atini ababoota worraati kennite keesa tau, si sodaate si ch'aqasu.

³²Hojja nami gosa d'ibi, ka lafa fago tau, guddinnaafi jabeenna kanke d'agaye, waan atini namaa tolchitu hubate, aka si kad'atu Mana kanati gadi d'ufe,

³³kad'acha isa d'agayifi. Gubbaa, fulla worra keetiti, isa ch'aqasi, waan inni fed'u guutiifi, aka gochiti lafa keesa jirtu ch'ufti si beete sii saalfatu, akuma worra kanke ka Israeli. Duuba akanaani worrileeni imbeekha, aka Mani anini jaare kunini fulla iti si kad'atani.

³⁴Hojja atini worra kanke, nyaapa haad'a jette ergite, worrileeni fulla jiruti dira atini fohate kanafi Mana anini si jaare kanaleti fuula deefate si kad'ate,

³⁵kad'acha worraa d'agayifi, gubbati worra ch'aqasi, dabsacha kennifi.

³⁶Hojja worri kanke siti ch'ubbame — qarale nami ch'ubbu intolchine injiru — duuba atini dallansu keesa harka nyaapa worraati kennite, nyaapi sunini worra boojie lafa d'ibiti geese, ato lafti sunini fagole taate,

³⁷kad'acha worra kanketi d'agayifi. Yo lafa suni keesati worri ch'ubbu iraa deebie, si kad'ate, dabaafi ch'ubbu ufi siti himate, Ee AABBO Waaqa, kad'acha worraa d'agayifi.

³⁸Yo lafa suni keesati worri d'uguma daba ufi iraa deebie, fuula lafa atini ababoota teenna kenniteefi dira atini fohate kanafi Mana anini si jaare kanati daefate si kad'ate,

³⁹kad'acha worraa d'agayifi. Mana kanke ka gubbati ch'aqasi, worraa nahi, ch'ubbu worraa ch'ufa araaramifi.

⁴⁰Amma, Ee Waaqa kiyya, nu ilaali, kad'acha fulla tanati kad'atani nuu ch'aqasi.

⁴¹ Ee AABBO Waaqa, amma kai, Sanduqa Wold'aqisa ka akheekha irre teeti garsiisu woliini Mana Waaqa seeni, haga jiru jireenna achi tai. Qaalole tante huji worra ch'ufa keesati eebisi, gumiini tante ch'uftileeni maro dansuma tanteetifi ha gammadu.

⁴²Ee AABBO Waaqa, hayyu atini fohate muude indidini, jaalala atini hojattu tante Daudi jaalate qaabad'i.