Read BORANA BIBLE – KITAABA WAAQA Ezra 3 Bible Online

Ezra 3 - BORANA BIBLE – KITAABA WAAQA bible

Ezra 3

¹Jia torbeeso eegi nami Israeli ch'ufti dira ufiti qubate, Yerusalemuti wolti bahani.

² Jennaani Yoshua ilmi Yosadakitifi qaalole wahela isaatiifi Zerubabeli ilma Shealtieltifi, fiit'a isaa woliini, waan Waaqa Israeliti sorio irati baasani mid'aasani jaarani, aka waan suni irati sorio gubani baasani, aada namichi Waaqa ka Musa jed'ani t'aafe gula.

³ Ato worri boojiani ka gale kaani nama lafa suni keesa tau sodaatele, worri waan sorio irati baasani suni fulluma isii ta duri taaniti jaare. Duuba akuma duri kaani galgalaafi diirama sorio irati gubani.

⁴Ammalle jila Hoosale aaduma isii gula tolfatani; guyya ch'ufa sorio guyya suni baasuu malani baasani;

⁵ tana malele, sorio gubani guyya ch'ufa baasani taanifi ta guyya baati baasanifi ta guyya jila d'ibile AABBO Waaqa baasanifi waan fed'i gula AABBO Waaqa baasanile ch'ufa baasani.

⁶Ato biyyiti qara mana Waaqa injaarini, guyya qara ka jia torbeeso, huji sorio gubani baasani iti keeyatani.

⁷Biyyiti beese ogeeyi d'akhaatifi ta mukhati baafte, ammalle waan nyaatanifi ka d'uganifi d'ad'ale baafte, dira Tirotifi ka Sidoniti ergite, hind'eesa Lebanoni, ka bisaani Baariini gula dira Yafatini d'ufani, iraa bitate. Waan kana ch'ufa jecha hayyu Ajemi ka Koreshi jed'ani, gula tolchani.

⁸Duuba akanaani worri huji ijaarsa Mana Waaqa jia lameeso, ka ganna lameeso, ka worri Yerusalemuti gale, jala qabate. Zerubabeli, Yoshua, nami gosa worraa ch'ufti, qaalole taanaani, worra gosa Lawi taanaani, nami boojiani gale ch'ufti haguma gaunu, wolti bahe huji suni hojatte. Nama gosa Lawi, ka ganna diddamaati oli ch'ufa, huji ijaarsa Mana AABBO Waaqa suni mataa iti tolchani.

⁹Namicha gosa Lawi ka Yeshua jed'anifi ilmaanifi fiit'a isaatiifi Kedmielifi ilmaani isaaleeni (ta balbala Hodafia) takaa tahani huji ijaarsa Mana Waaqa iti mataa tahani woliini hojatani. (Worri Lawi, ka balbala gosa Henadadileni, worra qarqaare.)

¹⁰ Jari Mana AABBO Waaqa yayabe jennaani qaaloleeni ubaara ufi d'ed'eera kaani naqate, magalata guurate d'ufte. Worri Lawi ka balbala Asafuleeni bilbila guurate d'ufe. Aada Daudini duri baase gula worri ch'ufti ejaanje, AABBO Waaqa faarse,

¹¹ galata isaa deebise waan jed'e, AABBO Waaqi waan dansa, jaalalti inni worra Israeli jaalatu waan d'umatatiniti. Waan Mana AABBO Waaqa yayabanifi nami ch'ufti, haga dandau, lalabe AABBO Waaqa faarse.

¹²Jaaroleeni qaaloleetifi ta Lawitifi ta mata balbala gosa, ta Mana Waaqa ka duri kaani garte, Mana Waaqa ka yayabani arginaani mata qabate boote. Ammo worri achi jiru kaani ch'ufti aka male gammade qilit'ame.

¹³Nami dandae iyyaana bohatifi ta gammada gargari beekhu injiru, wonti akanatiifi iyyanti worraa sunini aka male guddate, fagole ch'ufa d'agayani.