Read BORANA BIBLE – KITAABA WAAQA Ezra 4 Bible Online

Ezra 4 - BORANA BIBLE – KITAABA WAAQA bible

Ezra 4

¹Nyaapi worra Yudatifi ka Benjamini, aka worri eegi boojiani gale kaani Mana AABBO Waaqa Israeli jaaru jiru, d'agaye jennaani.

²Gara Zerubabelifi jara balbala gosati mataa d'aqani waan jed'aniini, koota, takaa taane, mana kana woliini jaara. Nu Waaqa takaa kad'anna, ammalle haguma duri Esar-Hadonini, hayyuuni Ashuru, armaani nu d'ufe, nu sorio Waaqa suni baasu jira.

³Jennaani Zerubabelifi Yoshuafi jaaroleeni balbala gosati mataa waan jetteeni. Nu qarqaarsa keesani infeenu, aka Mana AABBO Waaqa keenna woliini jaaru. Nu mata keennati jaara, akuma koreshini, hayyuuni Ajemi nuni jed'e.

⁴Jennaani worri gosa d'ibi ka lafa Yuda keesa tau, worra Yuda gayaa laafise, sodaachise ijaarsa Mana Waaqa lakisise.

⁵Ammalle nama gugurda finna harkaa qabule gumbeesani, aka huji worraa balleesani waan kana bara koreshini lafa Mohate tolchani.

⁶Bara qara hayyu Ahasueroni hayyu tahe, nyaapi suni worra Yudatifi ka Yuresalemu himate suni t'aafate.

⁷Ammalle bara Artashastani, hayyuuni Ajemi lafa Mohate, Bislamuti Mithredathifi Tabeelifi waheli worraa tatabe hayyichati t'aafani, ammo hojja soomani afaani d'ibiti garagalchani.

⁸Ammalle namicha gudda Rehumu jed'anifi Shimshai ka tatabe t'aafu tatabe tana waan finna lafa Yerusalemu iti t'aafani hayyu Artashastati ergani:

⁹Worri tatabe tana t'aafe kana: Namicha gudda Rehumu jed'ani, namicha tatabe t'aafu ka Shimshai jed'ani, Wahela worraati, jaallaboota ammalle jaarole iraa hafte taani ch'ufa, ta duri lafa Erikiti, Babiloniti, Susa lafa Elami keessa d'ufte,

¹⁰ammalle worra gosa d'ibi ka Asurbanipalini, namichi guddaani irre qabu godaansise dira Samariatifi fulla d'ibi lafa Efrati ta ila adubi qubsise.

¹¹Dubbin tatabe suni keesati t'aafani tana: Gara hayyu Artashasta: hojattuuni tante worri lafa Efrati ta ila adu nagaya sifuuti.

¹²Ee hayyicha wonti nu si beesisu feenu, worri Yahudi ka gara keesani fulla teenna d'ufe, yayu Yerusalemu qubate, dira hama, dubbi hayyu didu suni, jaaru jirani. Worri naabo yayabe jaaru jira, d'iotu hobaasa.

¹³Ee hayyicha, yo dira kana akuma duri kaani jaarani naabo oosa imbaaftu duuba akasiini horini hayyuuni lafa suni iraa argatu indiqaata.

¹⁴Amma waan nu finna kanke jala jiruufi, ee hayyicha, nu waan akana kana argu infeenu; tanaafi wonti nu amma siraa feenu,

¹⁵aka atini waan duri ababooti tante t'aafte olkeete ch'ufa laaltu. Yo laalte, atini aka diri kunini haguma duriti hayyufi worra gugurda lafa mohatu ch'ufa dide gaargalchu inagarta. Nami isaaleeni haguma duriti waan nami dandauniti, durile qara tanaafi dira kana balleesani.

¹⁶Ee hayyicha, wonti amma nu si beesimnu, yo dira kana jaarani naabo isale ch'ufa hobaasani, atini deebite lafa Efrati ta ila adu imohatu.

¹⁷Hayyichi qonqo tana worraa deebise waan jed'e. Namicha tatabe t'aafu ka Shimshai j ed'ani wahela worra, ka dira Samariatifi ka lafa Efraimu ila adu tau, nagaya isani fuud'a.

¹⁸Tatabe isani nati ergitani tana yayu dubbi isii garagalchani naa soomani.

¹⁹Aninileeni yayu seera baase waan duri t'aafani ch'ufa barbaada jed'e, duuba yayu argani aka diri Yerusalemu haguma duriti nama finna harkaa qabu ch'ufa dide, nami isaaleeni hayyoota ch'aqasu dide morkuni.

²⁰Hayyota guddo irre qabduti duri achi mohate lafa Efrati ta ila adu ch'ufa fide damoosafi gibira iraa guurate.

²¹Tanaafi amma isani seera baasa, aka jari suni deebie dira injaare, haga anini qonqo d'ibi erguti.

²²Waan kana jabaad'a guuta, aka hameenni worra suri hiji tiyya iyyakine.

²³Akuma tatabe Artashastani t'aafe tana Rehumufi Shimshaifi wahela worraati soomanini, worri hurrise Yerusalemu d'ebe, irreeni worra Yahudi dira suni jaaru d'owe.

²⁴Hujini ijaarsa Mana Waaqa taani ejate akanumati hafte haga ganna lameeso ka mootuma Dario, hayyu Ajemi.