Read BORANA BIBLE – KITAABA WAAQA Nehemia 9 Bible Online

Nehemia 9 - BORANA BIBLE – KITAABA WAAQA bible

Nehemia 9

¹Guyya diddami afreeso ka jia suni, worri Israeli wolti bahe, ufi agabse, ch'arqi naqate, biyye matati ufi guure. Wonti akanatiifi worri laalala daba ufii garsiisu fed'a. Worri qara gosa d'ibi keesaa koba ufi baase. Jennaani oli ejaanjani, ch'ubbu worraafi ababooti isaani tolchite himatani.

³Haga saatti Sadii Seera Aabbo Waaqa isaani worraa soomani, ammalle saatti sadi d'ibile daba isaani himatani AABBO Waaqa isaani kad'atani.

⁴Waan jaarani, ka worri Lawi ira ejaanjuti jira, waan suni ira Yeshuafi Kadrielifi Banifi Shebaniafi Sherebiafi Bunifi Banifi Kenaaniti ejaanje lalabe AABBO Waaqa isaani kad'ata.

⁵Jari Lawi kunini Yeshua, Kadmieli, Bani, Hashabneya, Sherebia, Hodia, Shebaniafi Pethahiyaleeni waan biyyaani jed'ani: Olkakaa, AABBO Waaqa keesani haga jiru jireenna faarsa! Nami ch'ufti ha maqa isa gudda faarsu, ato faaruni isa geetu jiraachu baatele.

⁶Jennaani worri Israeli kad'acha tana kad'ate: Ee AABBO si ch'allati AABBO Waaqa; nami gubbafi urjile uume siuma. Atini lafafi baariinifi waan keesaa jira ch'ufa uumte jireesite wonti gubba jira ch'ufti gajette si kad'ati.

⁷ Siumati, AABBO Waaqa, Abramu fohate, dira Uri, ka lafa Kaldayo, keesaa baafte. Maqa isa jijirte, Abrahamu baafte.

⁸ Atini aka inni si sodaatu agarte wold'aqisa isa woliini tolfate. Atini isati kakhate, lafa Kanaanitiifi ta Hititifi ta Amoritifi ta Perizitiifi ta Yebusitifi ta Gergishile, siifi d'aloota keeti keenna jetteeni. Waan atini abba d'ugaatifi, kakhu tante guute.

⁹ Atini gaargala ababoota teenna lafa Misiriti agarte boha worra galaana Diimati d'ageete.

¹⁰ Atini waan mama Faraofi hojattu isaatiifi nama lafa isaa ch'ufa durati tolchite, wonti akanatiifi atini, aka worri gumi tante dabse, beeta. Gurri atini gaafasi baafate arrale inuma jira.

¹¹ Atini bisaani galaana gargari qoode, kara gumi teeti tolchite lafa goddu ira taakisiifte; jari gumi suni reebe d'immu bisaani lit'e, d'akhaa galaana diima keesa buu fakaate.

¹² Atini guyya baaldo duumansa fakaate worra dura deemte, ammalle halkani goola ibidatini kara worraa ifsite.

¹³ Gaara Sinaiti atini gubbaa gabuute, gumi tanteeti dubbate Seerafi barsiisafi aada dansaafi ta d'uga kenniteefi.

¹⁴Atini aada Sabato qulqullo worra barsiifte, hojattu tante Musani aadaafi Seera worraa kennite.

¹⁵ Worri beelae jennaani qit'a gubbaa buufteefi, worri d'eebonnaani; bisaani d'akha keesaa baafteefi. Atini beena, lafa duri anini isanii kakhad'e fud'ad'a worraani jette.

¹⁶Ammo ababooti teenna kiyyibde, mata guddifate Seera kanke guutu didde.

¹⁷ Worri waan atini tolchiteefi ch'ufa ded'e, Seera kanke guutu dide, waan mama ka atini tolchite ch'ufa wollaale. Ammalle, kiyyibe nama gudda ka tissooma lafa Misiriti worra deebisu tolfate; ammo atini Waaqa namaa araaramu, ka eebaafi naasu qabu, ka hure indallanne. Jaalalti tante guddo, tanaafi atini worra illakisini.

¹⁸ Worri akheekha korma looni mid'aafate kunini Waaqa lafa Misiri keesaa nu baase jed'e kad'ate! Akanaani guddo si arabse!

¹⁹ Ammo atini maro naasuuni tante guddotifi, lafa aloole keesati worra illakime, baaldoni duumansa guyya worra biraa indeemne ammalle gooli ibida ka halkani kara worraa ifsuleeni worra duraa ingore.

²⁰Atini lubbu tante dansa nama barsiiftu worraa kennite, sagale Manna jed'ani worra nyaachifte bisaani obaafte d'eebu d'owarte.

²¹Ganna afurtama, ka worri lafa aloo keesa tae, atini worra qorqorate jabeesite, woyaani worraleeni taka inch'ich'inne, miili worraleeni taka inuranne.

²² Atini lafafi gosa d'aatu worra jirtule harka worrati kennite, keesa qubsiifte.

²³ Atini ilmaani heddu aka urji gubba jirtu worraa kennite, lafa ababoota worrati kakhate harka worrati kennite, keesa qubsiifte.

²⁴ Worri lafa Kanaani dabsate, atinileeni gosa lafa suni keesa teetu harka worrati kennite. Atini gumi tante irre worri gosafi hayyoota Kanaani waan fed'uni tolchu kenniteefi.

²⁵ Worri kanke dira jajabaafi lafa dadansaafi maneeni miha dansa qabdufi haroole qara qotanifi mukeeni ejersatifi mukeeni mid'aanitifi, zabibule boojie. Waan fed'ani ch'ufa sooratani gabbatanini, waan dansa atini kenniteefi ch'ufa iraa gammadani.

²⁶ Ammo gumiini tante si lakifte si ch'aqasu didde, Seera kanke dudda iti galte. Worri raagoota worra gorsite, Waaqati deebia worraani jette fit'e. Ammalle worri maro heddu si arabse,

²⁷tanaafi atini harka nyaapati worra kennite, akasiini nyaapi suni worra mohate. Gaargala ufi keesati worri qarqaarsa si kad'ate, atileeni gubbati worra ch'aqafte. Naasu tante guddooni atini nama harka nyaapa keesa worra baasu ergite.

²⁸Lafti nagaya taate jennaani worri deebie ch'ubbu tolche, duuba atini ammalle harka nyaapa worrati worra deebifte. Ammo ha taatu, worri ch'ubbu iraa deebie, Nu baasi jed'e si kad'ate jennaani, atini gubbati worra ch'aqafte, naasu tante guddooni worra baafte.

²⁹ Atini, barsiisa tiyya ch'aqasa jette worra gorsite, ammo worri kiyyibe Seera kanke, ka nami jiraatuni, guutu dide. Worri kiyyibe mata d'aabe si jalaa dide.

³⁰ Ganna ch'ufa atini obsite, lubbu teetiini raagooti tante worra gorsite. Ammo taatule worri ch'aqasu dide, tanaafi atini harka gosa d'ibiti worra kennite.

³¹Ammo hatuti, atini maro naasuuni tante guddotifi, worra lakifte balleesu dide. Atini Waaqa eebaafi naasu qabu!

³² Ee Waaqa, Waaqa keenna, guddinni kanke waan akami! Jabeenni kanke akami nama naasise nama mudamsiisa! Atini kara d'ugaatini kakhu duri nu kakhate ch'ufa guuta. Haguma duri bara hayyooti Ashuru nu dabsite haga arrale, nu akasuma gaargala qamna! Hayyootafi jaaroleefi qaaloleefi raagootafi ababootafi gumiini teennaleeni ch'ufti la guddo gaargalte; gaargala keenna gudda suni qaabad'i!

³³Atini d'uga qabda, ka gaargala nutiini d'ufte; ato nu ch'ubbu tolchinele, atini d'uga ch'alla gula deemte.

³⁴Ababootafi hayyootafi jaaroleefi qaaloleeni teenna Seera kanke guute jechaafi gorsa kanke inch'aqamne.

³⁵Eeba tanteetiini hayyooti gumi tante fidde, gaafa worri lafa ballo dansa atini worraa kennite keesa tau; ammo worri ch'ubbu iraa deebie si hojachu dide.

³⁶Amma lafuma dansa sagale nu baaftu, ta atini nuu kennite tana keesati, tisse taane.

³⁷Wonti lafti tuni sila nuu baaftu ch'ufti hayyoota atini maro ch'ubbu teennatifi nu mohachifte baati. Worri nuufi hori keennale ch'ufa womfed'u tolcha, tanaafi nu amma gaargala hama keesa jira!

³⁸Maro waan tahe kana ch'ufaatifi nu worri Israeli amma kakhanne kakhu suni t'aafna, jaaroleefi worra Lawitifi qaaloleeni teennaleeni beesisa ufii ira keeyatte.