Read BORANA BIBLE – KITAABA WAAQA Esta 5 Bible Online

Esta 5 - BORANA BIBLE – KITAABA WAAQA bible

Esta 5

¹Guyya sadeeso Estani woya hayyiti keeyatte, deemte balbala hayyu keesa fuula barch'uma hayyuti deefatte ejite. Hayyichi fuula isaa balbalati deefate, barch'uma ufii ira mana suni keesa taa.

²Hayyichi Esta ala ejitu arge jennaani gammade, ule isaa ta worqi isii olqabe. Isiini d'ufte ule taani fiit'e qubaani tut'e.

³Hayyichi waan jed'eeni, Maani, hayyiti Esta? Maani feeta? Ato lafa anini fidu gama toko feetele anini sii keenna.

⁴Estani waan jetteeni, Wonti ani fed'u, yo sii taate, siifi Hamani galgala kana mana kiyya woliini koota sagale nyaad'a.

⁵Duuba hayyuuni waan jed'e, Hamani hurrisa gadi yaama, aka waan Estani feetu tolchinu. Jennaani hayyufi Hamaniini sagale Estani mid'aasite nyaachuu d'aqani.

⁶Ato daad'i d'ugu jiranu, hayyuuni waan Estani jed'e, Atini maani fed'atta? Maani sii tolcha? Ato lafa anini fidu gama toko taatele sii keenna.

⁷Estani waan jette,

⁸Wonti ani fed'u ta ani kad'ad'u tana: yo atini na d'ugeefatte, ee hayyicha, ammalle yo sii taate, borile Hamani woliini mana kiyya koota, sagale nyaad'a, hojja suni waan fed'u siti himad'a.

⁹Hamaniini, ka gammachu injirre, kae worra biraa deeme; ammo aka Mordekaiini, ka fullo worra hayyutini seenani ke tau, olkae isaa saalfachu dide arge jennaani aka jaba isati dallane.

¹⁰Ammo ufi d'owe gale, jaallowaani isaatiifi niiti isaa ta Zereshi jed'ani yaame.

¹¹Ufi d'aade waan jed'e, Dureesa aka kiyya lafa tana keesati ingartani. Ilmaani tiyya heddu, hayyuuni ya guddinna naa dare, hojattu isaa taana ch'ufa ira na dabarse.

¹²Ammalle inni waan jed'e, Suni malele, hayyiti Estani, nama d'ibi lakifte naafi hayyu ch'alla sagalee yaamte, borile ya nu yaamte.

¹³Ammo wonti kunini maal na baati, haga anini Yahudichi Mordekai jed'ani kaani, ka fullo hayyu keesa tau argu?

¹⁴Jennaani niiti isaa Zereshifi jaallowaani isaa waan jetteeni, Mukha d'ed'eera lama, ka d'eerinni d'und'uma shantama, old'aabi, mukha d'ibi ira dagalchi, bori diirama hayyuuni, Mordekai t'urura kayi, irati fannisi jed'iini; duuba hayyu woliini sagale suni gammadaani nyaachu d'aqi. Dubbini tunini Hamani quufsite, akuma jari suni jed'eeni tolche mukha suni old'aabani.