Read BORANA BIBLE – KITAABA WAAQA Bahisa 27 Bible Online

Bahisa 27 - BORANA BIBLE – KITAABA WAAQA bible

Bahisa 27

¹Waan mesa fakaata ka sorio irati Waaqaa baasani mukha d'adachatiini mid'aasi. Gami isaa afraanu ch'ufti ha wolqit'e tahu, ka d'eerinnafi ballinnileeni d'und'uma shani; old'eerinnileeni d'und'uma sadi.

²Moga isaa afraanu gaafa iti mid'aasi. Gaafa sunifi wonti mesa fakaata suni ha wolti ejituti, ammalle nafa isaa ch'ufa sibiila diimani duuchi.

³Eele daaraani fiila qabdu iti jiddufi bao, qori, hookofi daboola mid'aasi, miha kana ch'ufa sibiila diima iraa mid'aasi.

⁴Sibiila diima ka aka gingilcha urani mid'aasi, ammalle gingilcha suni qube afuri ta baataniini gama ch'ufa iti mid'aasi.

⁵Gingilcha suni waan aka naanno, ka mesa suni irati jaarani, jala jiddu mesa suni kayi, aka inni wod'aka mesa suni tau.

⁶Kalcho d'adacha ta mesa suniini baatani mid'aasi, sibiila diimani duuchi.

⁷Duuba kalcho suni qube moga moga mesa suni jirtu keesa naqi, aka baataniini.

⁸Mesaani suni ha sanduqa mukhaani mid'aasani fakaatuti, akheekha anini gaara gubbati si garsiise kaani gula.

⁹Waaro Woyyuma tana naabo isii golla woya booftatiini mid'aasi. D'eerinni golla suni ka gama bitaa ha d'und'uma d'ibba toko tahuti;

¹⁰dongoraani golla suni sibiila diima diddama, kamu sibiila akasi diddama ira d'ad'aabani, ammalle hookofi ule qarsi ha qabaatuti.

¹¹Akasuma gama mirgaa ka naabo suni ha mid'aasani.

¹²D'eerinni golla gama ila adutiini dongora kud'anifi waan inni ira ejaanju kud'anile ha qabaatuti.

¹³Gama ilaboru fulla balbala, naaboo ballinni isii ha d'und'uma shantama taatuti.

¹⁴Gama balbala lachu d'eerinni golla ha d'und'uma kud'ani shani tahuti, ammalle dongora sadifi waan inni ira ejaanju sadile ha qabaatuti.

¹⁶Fullooni naabo ha golla d'eerinni isaa d'und'uma diddama qabaatu, golli suni ha woya boofta ta liilana bulefi bule diimafi ammalle diimani d'aani ch'okhani tahuti.

¹⁷Utubaani naabo suniini marsani ha ule qarsitiini dagalchani jaaraniini, ammalle hooko utuba sunile ha qarsiini mid'aasani, ammo waan dongoraani suni ira eju ha sibiila diimani mid'aasani.

¹⁸D'eerinni naabo suni ha d'und'uma d'ibba toko tahuti, ballinni ha d'und'uma shantama tahuti, old'eerinnileeni ha d'und'uma shani tahuti. Golla isii ha woya booftatiini mid'aasaniti. Ammalle waan dongoraani ira eju ha sibiila diimani mid'aasaniti.

¹⁹Miha Waaro Woyyuma sunifi d'isa isiitiifi ka naabo isiile ch'ufa ha sibiila diimani mid'aasaniti.

²⁰Waan atini worra Israeli ch'ufaani jettu, D'ad'a ch'ufa ira dansa ifse kootaani, aka ifseeni suni hojja ch'ufa ifsitu.

²¹Haruninifi ilmaani isaa ha ifse suni, Waaro Woyyuma keesa, golla Sanduqa Wold'aqisa dura jiruuni gama ala old'aabani. Arti na durati haga galgalaatifi haga diirama ha bobeetuti. Aada tana worri Israelitiifi d'alooti worraaleeni ha haga jiru jireennale tolfatu.