Read BORANA BIBLE – KITAABA WAAQA Bahisa 28 Bible Online

Bahisa 28 - BORANA BIBLE – KITAABA WAAQA bible

Bahisa 28

¹Oboleesa kanke Harunifi ilmaani isaa Nadabu, Abihu, Eleazarifi Ithamari wolti yaami, gosa worra Israeli taanini gargari baasi, aka worri qaalole naa tahe huji qaalole hojatu.

²Woya qulqullo oboleesa kanke Haruni hod'i, ta mid'aagumafi guddinna kennituufi.

³Ogeeyi ch'ufa ta anini qalbi kenneefi wolti yaami, ha woya Haruni suni mid'aasitu, aka isaa eebisani qaallu tolchani.

⁴Woyaani worri mid'aasu male tana: ukha fulla qomati hod'ani, woya toko ta aka korrbo hid'atani, ubaara d'eera miila gahu, ubaara barreesani, sure, ammalle gurda. Miha kana ch'ufa worri ha oboleesa kanke Harunifi ilmaani isati mid'aasuti, aka worri qaalole tahe naa hojatu.

⁵Ogeeyiini tunini ha liilana worqitiifi liilana bule, bule diima, diima, ammalle woya booftatiini hojatuti.

⁶Ammalle worri ha woya toko, ta aka korrbo hid'atani, liilana worqitiifi liilana bule, bule diima, diima ammalle woya boofta ta barreesanini mid'aasuti.

⁷Haada lama ka fulla gurmu lachu iraa bahu ha iti hod'aniti.

⁸Gurda mid'aaga toko, ka liilanuma kaaniini mid'aasani, woya aka korrbo suniini wolti hod'ani.

⁹D'akha ch'ululuqa lama fuud'i, maqa ilmaani Israeli irati qori.

¹⁰Akuma worri d'aloota wolti aanuni, jaa d'akha toko irati qori, jaalle kaani irati qori.

¹¹Akuma ogeesi d'akha qube beesisa irati qoru, akasuma maqa ilmaani Israeli ha qorani. D'akha lamaani suni ha worqiini marsaniti.

¹²D'akha suni haada gurmu ira baasani kaani lamaani ka woya aka korrbo mid'aasani taaniti ha hod'ani, aka gosa kud'ani lamaani Israeli yo ch'ufa qaabatani. Akanaani Harunini hojja ch'ufa maqa worraa gurmu ufiiti baate, hojja ch'ufa AABBO Waaqileeni worra ufii qaabatu.

¹³Worqi d'akhaani Marsani lama,

¹⁴ammalle looti lama ta worqi qulqullo, ta aka museensa fohani mid'aasi, worqi marsani suniti kayi.

¹⁵Ukha qoma qaallicha guddaa mid'aasi, aka inni suniini dubbi muru. Ukha kanale liilanuma woya aka korrbo mid'aasani taanini ha mid'aasani.

¹⁶Qoti isaa ch'ufti ha haga takaa tahuti, ammalle ha wolti dachaasaniti. D'eerinnafi ballinnileeni ha taaku toko tahuti.

¹⁷D'akha ch'ululuqa ch'ororsi, dacha afuri irati hod'i. Dachaani qara ta d'akha diimatifi, barricha, ammalle diima d'iiga;

¹⁸ta lameeso d'akha dotifi, bule chulkicha aka dulo dooqaati, adi chulkicha;

¹⁹ta sadeeso d'akha bule had'icha, haama, ammalle bule diima;

²⁰ta afreeso d'akha doti, diima, ammalle chulkicha. D'akhaye tana ch'ufa ha worqiini marsaniti.

²¹D'akhaye kud'ani lama tana irati ha maqa ilmaani Israeli toko tokooni qoraniti.

²²Ukha isaa ka qomati looti worqi qulqulliti, aka museensa fohani, mid'aasi.

²³Qube worqi lama mid'aasi, ukha suni afaani isaa ka gubbaa qota lachuti hod'i.

²⁴Museensa worqi kaani lamaani qube taani lamaaniti kayi.

²⁵Museensa kaani lamaani, fiit'e isaa, worqi marsani taaniti kayi, aka akanaani haada gurmu ira bahu ka woya aka korrbo taanitiini hod'ani.

²⁶Eegi suni qube lama ta worqi mid'aasi, qube suni ukha kaani qota jalaa moga lamaaniti woya aka korrbo mid'aasani suni qota garaa keesa kayi.

²⁷Qube worqi lama d'ibi mid'aasi, qube suni haada woya aka korrbo taani, fuula dura fulla qoma jalati, d'aatu fulla haada woya aka korrbo suniini wolti hod'ani, ta gurdaani oliiti hod'i.

²⁸Qube ukhatiifi ta woya aka korrbo taani haada buleeni wolti hid'i, aka ukhi gurda gubba tau kaani inchochone.

²⁹Hojja Harunini fulla qulqullo olseenu, inni ha ukha maqa ilmaani Israeli irati qorani kaani ufira qabaatuti, aka hojja olseenu ch'ufa AABBO Waaqi ilmaani Israeli qaabatu.

³⁰Urimufi Thumimu ukha kaani keesa kayi, duuba Harunini ka waan suni ufira qabu ha nati olseenu. Yo akasi suni ch'ufa Harunini ukha qoma suni ufira qabaachuu male, aka dubbi worra Israeli qore muru.

³¹Ubaara d'eera woya aka korrbo taani woliini keeyatani ha dabassa buleeni mid'aasani.

³²Fulla maatani keeyatani iti tolchi, fulla suni tirisa d'ai, aka intarsaane.

³³Afaani jala mid'aani aka okhoku ka liilana bule, bule diima ammalle diimani hod'i, agalo worqitiini makhi iti hod'i,

³⁴aka ubaara suni afaani isaa ka jala okhokufi agalooni makhani marsani.

³⁵Harunini hojja Waaro Woyyuma suni keesa hojatu, miha kana keeyachuu male, aka hojja inni fulla qulqullo AABBO Waaqa durati olseene keesaa bahu, AABBO Waaqi qonqo agalo d'agaye isa inijeemne.

³⁶Worqi qulqulliti fuud'i hafaleesi, kara qube beesisatiini qorani, dubbi tana irati qori: Inni AABBO Waaqaa qulqullo.

³⁷Worqi suni sure durati liilana buleeni hid'i.

³⁸Harunini ha addati keeyatu, aka anini AABBO Waaqi, waan worri Israeli naa baasu ch'ufa, ato worrileeni waan baasu suni keesa wollaala tolchele, ee jed'e fud'ad'u.

³⁹Woya booftatiini ubaara barreesanifi surele mid'aasi, ammalle gurda ch'okhani barreesanile mid'aasi.

⁴⁰Ubaarafi gurdafi kofiale ilmaani Haruniti mid'aasi, ta mid'aagumafi guddinna kennituufi.

⁴¹Woya tana Harunifi ilmaani isaati naqi, muudi, eebisi qulqulleesi, aka worri qaalole tahe naa hojatu.

⁴²Hid'a gagabaabdu woya boofta, ta qullaani d'oftani woya booftatiini hod'iifi.

⁴³Harunifi ilmaani isaa, yo Waaro Woyyuma olduudani yokhaani waan mesa fakaata ka sorio irati Waaqaa baasaniti d'iaatani, aka fulla qulqullooti huji qaalole hojatani ufira qabaachuu malani, aka worri wollaala argate idoone. Aada tana Harunifi d'alooti isaaleeni ha haga jiru jireenna tolfatuti.