Read BORANA BIBLE – KITAABA WAAQA Bahisa 29 Bible Online

Bahisa 29 - BORANA BIBLE – KITAABA WAAQA bible

Bahisa 29

¹Hojja atini Harunifi ilmaani isaa eebifte qaalole naa hojattu tolchitu, aada tana gula tolchi. Jibicha korma tokofi elemiye lama ta aabbo inqamne fuud'i.

²Dargaye dargaye ch'ufa ira dansa ta daakhani fuud'i, ammo bukho iti innaqiini, qit'a d'ad'aani jissanifi keki d'ad'a ifsaani d'aabi.

³Dadu keesa kayi, natiini kooti, jibichaafi elemiye lamaani taani woliini.

⁴Ammalle Harunifi ilmaani isaa fulla balbala Waaro Woyyumatiini kooti, bisaani d'iqiifi.

⁵Duuba woya qaallu taani ch'ufa Haruni kayi — ubaara, woya aka korrbo mid'aasanifi ubaara d'eera isi woliini keeyatani, ukha qomatiifi gurdale.

⁶Sure iti mari, beesisa, Inni Waaqaa qulqullo jed'u kaani iti hid'i.

⁷Duuba d'ad'a fuud'i, mata isaa muudi.

⁸Ilmaani isaaleeni kooti, ubaara naqifi;

⁹ammalle gurda hid'aanati hid'ifi, kofiale kayifi, akanaani Harunifi ilmaani isaa eebisi. Worraafi d'alooti worraleeni ha haga jiru jireenna qaalole tahe naa hojatu.

¹⁰Duuba jibicha kaani Waaro Woyyuma duraani kooti, Harunifi ilmaani isaa ha arirataniti.

¹¹Dubba jibicha suni fulla Waaro Woyyumati na durati qali.

¹²D'iiga jibicha suni harkaani fuud'i, waan aka mesa ka sorio irati baasani gaafa isii dibi. Duuba d'iiga hafele fuud'i, mesa suni jalati naqi.

¹³Eegi suni gabbinna miha garaa ch'ufafi tirufi kaleefi moora isiile fuud'i, mesa suni irati gubi.

¹⁴Foonifi gogafi miha garaa ka jibicha suni fuud'i, alati baasi fageesi gubi. Tunini sorio daba qaalole iraa balleesitu.

¹⁵Elemiye suni toko fuud'i, Harunifi ilmaani isaa ha arirataniti.

¹⁶Qali, d'iiga isaa fuud'i, gama mesa afraaniti jijissi.

¹⁷Duuba elemo suni fuud'i, fooni isaa gargari ch'iri, miha garaa ch'ufafi miila isaa ka lukha lamaani d'iqi, fooni ch'irani kaanifi mata woliini olkayi.

¹⁸Duuba elemo suni ch'ufa mesa irati gubi. Wonti sunini ch'ufti waan gubani AABBO Waaqa baasani, ta fooleeni isii isa gammachiiftu.

¹⁹Elemo lameeso kaani fuud'i, Harunifi ilmaani isaa ha arirataniti.

²⁰Duuba qali, d'iiga isaa hagiini fuud'i, nyaaba guraatifi quba hagicho, ka harka mirgatifi ka miila mirgichale, ka Harunitifi ka ilmaani isaaleeni qabiini. D'iiga hafe kaani fulla sorio iti qalani gama ch'ufati jijissi.

²¹D'iiga waan mesa fakaata kaani gubba jiru, d'ad'a muudaa woliini fuud'i, Harunifi ilmaani isaa nafafi woya worraleeti fifit'i. Akanaani isaafi ilmaani isaatiifi woya worrale qulqulleesani.

²²Gabbinna elemo suni dubbafi moora garaachatiifi arabicho tiruti ejitufi moora kale lamaanitiifi lukha mirgiti kuti.

²³Ammalle dadu qit'a bukho inqamne ka AABBO Waaqaa baasani keesaa, qit'a d'ad'aani jiisani kaani tokofi ka d'ad'a inqamneefi keki toko woliini fuud'i.

²⁴Sagale tana ch'ufa harka Harunitifi ilmaani isaati kenni, ha olqabani, aka AABBO Waaqaa baasani garsiisaniti.

²⁵Duuba worra iraa fuud'i, waan mesa fakaata kaani irati gubi, waan qara gubani Waaqaa baasani kaani woliini. Isiini foole urgooftu ta gubani AABBO Waaqaa baasani.

²⁶Handaraafa elemo eeba Haruniti qalani suni olfuud'i, aka AABBO Waaqa baasani agarsiisi. Inni ha qooda kanke tahuti.

²⁷Hojja qaallu eebisani, handaraafafi lukha elemo ka aadaani guutani baasani, ta olqabani aka AABBO Waaqaa baasani garsiisani kaani, ha Harunifi ilmaani isaati olkayaniti.

²⁸Waan kana worri Israeli ha haga jiru ch'ufa Harunifi ilmaani isaati baasuti. Wonti akanatiifi isiini qooda sorio ta worri Israeli AABBO Waaqaa sorio wold'ageeti keesaa baasu.

²⁹Woya qulqullo Harunini keeyatu, eegi inni due, ha ilmaani isaa hojja muudani qaalole tolchani keeyatuti.

³⁰Ilmi isaa, ka fulla isaa qaallu tahu, hojja Waaro Woyyuma nati olseenu, aka fulla qulqullooti naa hojatu, ha guyya torba woya suni keeyatuti.

³¹Fooni elemo jila qaalole eebisani qalani kaani fuud'i, fulla woyyoomsaniti d'aabi.

³²Balbala Waaro Woyyuma durati Harunifi ilmaani isaa ha fooni elemotiifi qit'a dadu keesa jiru kaanile nyaataniti.

³³Worri ha waan hojja worraa eebisani baasani kaani, ka waan suni worraafi Waaqa wolti araarsani nyaatuti. Ammo qaalole male nami d'ibiini tokoleeni inyaatini, wonti akanatiifi wonti sunini qulqullo.

³⁴Hojja foonifi qit'aani aadaani guutani kaani haga bori gahe ha gubaniti, nami inyaatini, waan isiini qulqullootifi.

³⁵Haga guyya torba Harunifi ilmaani isaa, aka anini siini jed'e ch'ufa gula, aada worraani eebisani tana tolchiifi.

³⁶Guyya torbaani suni ch'ufa korma looni toko sorio qali, aka daba araaramani, akanaani fulla sorio iti qalani qulqulleesani, d'ad'aani muudani qulqullo tolchani.

³⁷Waan kana ch'ufa guyya torba tolchi. Yo atini akasi tolchite, mesaani suni qulqullae, wonti isaa tuqaleeni ch'ufti qulqulloofti.

³⁸Wonti atini guyya ch'ufa haga jiru jireenna mesa sorio irati naa baaftu tana: ilmaani hoola lama ta ganna toko.

³⁹Ilmoole suni toko diirama qali, taani galgala qali.

⁴⁰Ilme hoola ta qara suni fuud'i, ammalle dargaye kilo toko ta daakhanifi d'ad'a dulo tokotini wolti naqi, sorio baasi, ammalle daad'i dulo toko d'ibaayu Waaqaa baasi.

⁴¹Ilme lameeso galgala qali, duuba ilme suni woliini, akuma diirama kaani, dargayefi d'ad'afi daad'i Waaqa baasi. Wonti kunini ch'ufti sagale gubani, ta foole dansa, ta AABBO Waaqaa baasani.

⁴²Haga jiru jireenna waan gubani Waaqaa baasani kana ha fulla balbala Waaro Woyyuma durati AABBO Waaqaa baasani. Artiti worra kiyyaani wolargine sileeni dubbad'a.

⁴³Achiti worra Israeli wolargine humna tiyyaani ifse tiyya bibilise fulla sorio suni qulqulleesa.

⁴⁴Anini Waaro Woyyumatiifi waan sorio irati baasani, ka mesa fakaata qulqulleese, ammalle Harunifi ilmaani isaale eebisa, aka qaalole tahani naa hojatani.

⁴⁵Anini worra Israeli keesa tae Waaqa worraa taha.

⁴⁶Worrileeni imbeekha aka anini AABBO, Waaqa isaani, ka lafa Misiri keesa worra baase worra keesa tau. Anini AABBO, Waaqa worraati.