Read BORANA BIBLE – KITAABA WAAQA Bahisa 3 Bible Online

Bahisa 3 - BORANA BIBLE – KITAABA WAAQA bible

Bahisa 3

¹Gaafa toko ka Musani ree sodda isaa Yethro qaallu Midiani tissu, inni ree suni lafa aloo keesa gama ila adu fach'aase, reeni suni gaara qulqullo Sinaitiini baate.

²Jennaani malaikaani AABBO Waaqaa wod'aka gurbi keesa aka bobaa ibidaa iti mullate. Musani mukha suni ka bobau ammo ka ingubanne arge.

³Musani mame waan ufiini jed'e, Mukhi kunini kuno bobaa, maalifi ingubanne? Eegi, iti d'iaad'e waan mama kana laala.

⁴AABBO Waaqi aka Musani iti d'iaatu arge jennaani, Musa! Musa! jed'e mukha kaani keesaa isa yaame. Musani waan jed'eeni, Anini kunooti.

⁵Jennaani Waaqi waan jed'eeni, Gadi ind'iaatiini, kobe baafad'u fullaani atini ejitu sunini qulqullo.

⁶Anini Waaqa abba keetiti, Waaqa Abrahamuti, ka Isaaqoti, ka Yakobooti. Jennaani Musani Waaqa laalu sodaate fuula d'ofate.

⁷Duuba AABBO Waaqi waan jed'e, Anini yayu gaargala worra kiyya ka lafa Misiri keesa tau arge, boha worri nama worra hojachiisu iraa bohu d'agaye, d'iba worra kiyya hubad'e.

⁸Tanaafi anini amma aka harka worra Misiri keesaa baasufi gadi bue, ammalle aka lafa suni keesaa baase lafa ballo dansa, ta aananifi dammi aka lolaa yau, lafa gosa Kanaani, ta Hiti, ta Amori, ta Parizi, ta Hivi, ta Yebusii geesa.

⁹Ammatana me ilaali, booti gosa Israeli ya naa geete, anini gaargala worri Misiri worra gaargalchu ya arge.

¹⁰Amma kooti, Farao si erga, aka atini worra kiyya, ilmaani Israeli, lafa Misiri keesaa baaftu.

¹¹Musani waan Waaqaani jed'e, Anini woma keesa injiru, akami dandae gara Farao d'aqe ilmaani Israeli lafa Misiri keesaa baasa?

¹²Waaqi waan jed'eeni, Anini wahela sii taha, aka anini si ergu waan kanaani beeta: eegi atini worra kana lafa Misiri keesaa baafte, isani gaaruma kana irati Waaqa kad'attani.

¹³Jennaani Musani waan Waaqaani jed'e, Yo anini gara gosa Israeli d'aqe, Waaqi abba keesaniti isaniti na erge jed'eeni, worri na gaafate, Maqaani isaa eenu? naani jed'e, anini duuba eenu jed'aani?

¹⁴Waaqi waan jed'eeni, ANINI ANUMA. Wonti atini gosa Israelitini jettu tana: ka ANUMA jed'aniti gara keesani na erge.

¹⁵Ammalle Waaqi waan Musani jed'e, Dubbi tana worra Israeliti himi waan jettuuni, AABBO, Waaqa ababoota teesani, Waaqa Abrahamu, ka Isaaqo, ka Yakobo, ya gara keesani na erge. Haga jiru jireenna maqaani kiyya kana, maquma kanaani d'aloota ch'ufti na yaama.

¹⁶Beeni, jaarole Israeli ch'ufa wolti yaami waan jettuuni, AABBOONI, Waaqi ababoota teesani, Waaqi Abrahamu, ka Isaaqo, ka Yakobo, nati mullate waan naani jed'e, Anini waan lafa Misiri keesati isani tolchani ya arge.

¹⁷Anini ya buufad'e aka gaargala lafa Misiri keesa isani baase lafa gosa Kanaani, ta Hiti, ta Amori, ta Perizi, ta Hivi, ta Yebusi, lafa aananifi dammi aka lolaa yauti isani geesu.

¹⁸Duuba dubbi tante ch'aqasani sifi jaaroleeni Israeli gara hayyu Misiri deemtani waan jettaniini, AABBO Waaqa, Waaqa Ebraniatini ya wolgarre. Amma si kad'anna, aka atini guyya sadi nu gadi d'iifte lafa alooti imaltu yaana, aka sorio AABBO Waaqa keenna qallu.

¹⁹Anini imbeekha, hayyichi Misiri akanati isani gadi illakisu, haga irreeni tolchaniti.

²⁰Duuba anini harka kiyya iti olfud'ad'e worra Misiri d'ae waan mama jabdu iti tolcha. Eegi suni inni isani galakisa.

²¹Anini worra Misiri isani saalfachiise, yo yaatanile harka duwa iyyaatani.

²²Ammo nad'eeni Israeli ch'ufti nad'eeni olla ufii ta Misiri, yokhaani keessuma mana isii keesa jirtu, d'at'e, woya, faaya nafaa ka worqifi qarsiini mid'aasani kad'atti. Duuba worri Israeli waan kana ch'ufa ilmaani isaaniti naqe, akasiini worra Misiri iraa wo boojia.