Read BORANA BIBLE – KITAABA WAAQA Bahisa 37 Bible Online

Bahisa 37 - BORANA BIBLE – KITAABA WAAQA bible

Bahisa 37

¹Bezalelini Sanduqa Wold'aqisaa mukha d'adachatiini mid'aase, ka d'eerinni isaa d'und'uma lamafi taaku toko, ballinni isaa d'und'uma tokofi taaku toko, old'eerinnileeni d'und'uma tokofi taaku toko.

²Alaafi garaa isaa keesale inni worqi qulqullitiini duuche, ammalle gubbaa isaale ch'ufa worqiini marse.

³Qube worqi afuri ta baataniini mid'aase, miila isaa afraaniti gama lachu qube lama mat'anse.

⁴Kalcho mukha d'adacha iraa ch'irani, ta baataniini, ta nafa isii ch'ufa worqiini duuchani mullachu d'owani mid'aase.

⁵Duuba kalcho suni qube Sanduqa gama gama jirtuti naqe, aka baataniini.

⁶Qadaada worqi ch'alla mid'aase, ka d'eerinni isaa d'und'uma lamafi taaku toko, ballinni isaleeni d'und'uma tokofi taaku toko.

⁷Akheekha waan lubbu qabati ka khoola, ka worqi tumani, lama mid'aase, ka qadaada gubaa gama gama ejaanju.

⁸Waan khoola ka lubbu qaba toko gama toko d'aabe, taanile gama kaani d'ibi d'aabe, qadaadafi waan khoola suni worqi taka iraa mid'aase.

⁹Wonti lubbu qaba suni khoola ballifte qadaada suni gaadiseesite fuula wolti deefatte qadaada laalte.

¹⁰Inni mesa mukha d'adachatiini mid'aase, ka d'eerinni d'und'uma lama, ballinni d'und'uma toko, old'eerinnileeni d'und'uma tokofi taaku toko.

¹¹Nafa isaa ch'ufa worqi ch'allaani duuche, ammalle worqiini marse.

¹²Mukha hafalicha ka ballinni isaa haga gana harkaa, ka worqiini duuchani marseeni.

¹³Qube afuri ta worqi mid'aaseefi, gaafa afraani mesa fulla miili iti ejuti naqe.

¹⁴Qube suni ta kalcho mesaani baatani keesa kayani mukha hafalicha mesaani marsani kaani d'aatu kaye.

¹⁵Kalcho mukha d'adacha ka mesaani baatani nafa isii ch'ufa worqiini mullachu d'owe duuche.

¹⁶Inni miha mesa ka golola worqi ch'allaani mid'aase: sahani, muduunu, d'ameela qori ta daad'i Waaqaa baasani iti naqani.

¹⁷Inni waan ifseeni ira ejitu worqi ch'allaani mid'aase. Jalafi nafa isii worqi tumaniini mid'aase; daraarafi fulla daraaraani keesa baqafatufi kalacha isaale worqi taka iraa tume mid'aase.

¹⁸Dameeni jaa, ta gama lachu sadi sadi, waan ifseeni suni ira ejitu iraa baate.

¹⁹Dameeni jaani suni ch'ufti daraara woi sadi ka kalachafi kalacha imbaqafatiini qabdi.

²⁰Nafi waan ifseeni ira ejitu suni daraara woi afuri, ka kalachafi kalacha imbaqafatiini qabu, qaba.

²¹Kalachi imbaqafatiini toko dame lamaani wolti ejitu taani sadeenu jala jira.

²²Kalacha imbaqafatiinifi dameefi waan ifseeni ira ejitu ch'ufa worqi takaa iraa tume mid'aase.

²³Waan ifseeni ira ejitu ifse torba mid'aase, ammalle qad'abe isiitiifi sahani isii worqi ch'allaani mid'aase.

²⁴Waan ifseeni ira ejitufi miha isii ch'ufa kilo worqi ch'alla ta sodomi shanitiini mid'aase.

²⁵Inni waan mesa fakaata ka hit'aana irati aarsani mukha d'adachatiini mid'aase. D'eerinni isaa d'und'uma toko, ballinnileeni d'und'uma toko, gami lachu haga takaa; ammalle old'eerinni d'und'uma lama; isaafi gaafa isaa afraanile woma taka iraa mid'aasani.

²⁶Gubba, moga isa afraanifi gaafa isaa afraanu worqi ch'allaani duuche qota isaale ch'ufa worqiini marse.

²⁷Qube worqi lama ta baataniini mid'aase, gama lachutu qota jalati mat'anse, aka kalcho baataniini keesa kayani.

²⁸Kalcho mukha d'adacha ta mesaani baatani nafa isii ch'ufa worqiini duuche.

²⁹ Inni ammalle d'ad'a muuda qulqulloofi hit'aana urgaa aarsani, ka aka qayya wolti makhani mid'aase.