Read BORANA BIBLE – KITAABA WAAQA Bahisa 6 Bible Online

Bahisa 6 - BORANA BIBLE – KITAABA WAAQA bible

Bahisa 6

¹Jennaani AABBO Waaqi waan Musani jed'e, Amma waan anini Farao tolchu ingarta; inni irrumaani gosa Israeli lafa keesaa baasa, yokhaani irree jabduuni lafa ufii keesaa worra baasa.

²Waaqi waan Musani jed'e, Anini AABBO Waaqa.

³Anini Abrahamufi Isaaqofi Yakobo aka Waaqa Gudda, waan ch'ufaa, iti mullad'e, ammo maqa kiyya qulqullo AABBO Waaqatini ufi imbeesimne.

⁴Anini ammalle wold'aqisa kiyya worra woliini tolfad'e, aka lafa Kanaani, lafa duri worri aka keessuma keesa tae, kennuufi.

⁵Ammalle anini boha worra Israeli, ka worri Misiri tisse tolche d'ageennaani wold'aqisa kiyya qaabad'e.

⁶Duuba waan worra Israelitini jettu, Anini AABBO Waaqa; anini huji hamtu gosa Misirii keesaa isani fuud'e, tissooma worrale keesaa isani baase, harka kiyya d'eerefad'e worra suni balleese isani baasa.

⁷Ammalle anini nama kiyya isani tolfad'e Waaqa keesani taha. Hojja anini tissooma lafa Misiri keesa isani baasu, aka anini AABBO Waaqa keesani beetani.

⁸Anini lafa Abrahamufi Isaaqofi Yakobo kakhad'e isani geese, lafa suni d'aaltani. Anini AABBO Waaqa.

⁹Jennaani Musani waan kana worra Israeliti haasae, ammo worri waan garaani hamaate tissooma gaargala gudda ke jiruufi isa jalaa qabu dide.

¹⁰AABBO Waaqi waan Musani jed'e,

¹¹Beeni, gara Farao d'aqi, waan jettuuni, Worra kiyya ka Israeli lafa tante keesaa gad'iisi.

¹²Ammo Musani waan jed'eeni, Ufuuftu gochiti Israelitu na ind'ageetu, Faraoni eesaa fuud'e nama aka kiyya ka afaani laafa kana d'agaya re?

¹³Ammo AABBO Waaqi Musafi Harunini dubbate waan jed'eeni, Anini yayu isani fohad'e, aka isani yaatani gosa Israeli lafa Misiri keesaa baaftani, ammo qara waan kana gosa Israelitiifi Faraoti hima.

¹⁴Reubeni, ka angafa Yakobo, ilmaani d'iira afuri d'ale: Hanoki, Palu, Hesroni, Karmi; balbala worra kana maqa worratiini yaamani.

¹⁵Simeonileeni ilmaani d'iira jaa d'ale: Yemueli, Yamini, Ohadi, Yakini, Sohari ammalle Shauli, ka niiti gosa Kanaani d'alte; balbala worra kana maqa worratiini yaamani.

¹⁶Lawiini ilmaani d'iira sadi d'ale: Gershoni, Kohathi, Merari; balbala worra kana maqa worratiini yaamani. Lawiini gaafa due ganni isaa d'ibbafi sodomi torba.

¹⁷Gershoniini ilmaani d'iira lama d'ale: Libnifi Shimei. Worri sunileeni nama heddu d'ale.

¹⁸Kohathiini ilmaani d'iira afuri d'ale: Amramu, Ishari, Hebroni, Uzieli. Kohathiini gaafa due ganni isaa d'ibafi sodomi sadi.

¹⁹Merariini ilmaani d'iira lama d'ale: Malifi Mushi. Tunini balbala gosa Lawi, ilmaani isaa gula.

²⁰Amramuuni oboleeti abba isaa Yokebedi fuud'e Harunifi Musa d'alteefi. Amramuuni gaafa due ganni isaa d'ibbafi sodomi torba.

²¹Ishariini ilmaani sadi d'ale: Kora, Nefegi, Zikri.

²²Uzieliini ilmaani d'iira sadi d'ale: Mishaeli, Elisafani, Sithri.

²³Harunini Elisheba, ta dubra Aminadabu, ta oboleeti Nashoni, fuud'e; isiini Nadabufi Abihufi Eleazarifi Ithamari d'alteefi.

²⁴Korani ilmaani d'iira sadi d'ale: Asiri, Elkana, Abiasafu. Balbalti Kora, ta fulla saditi gargari baate, worra kana iraa baate.

²⁵Eleazarini, ka ilma Haruni, dubra Putieli fuud'e, isiileeni Finehasi d'alteefi. Worri kunini nama gosa Lawi ch'ufafi balbala gosa sunile ch'ufa iti angafa.

²⁶Harunifi Musani worruma AABBO Waaqi worra Israeliti erge, Beena, lafa Misiri keesaa worra Israeli baasa jed'eeni.

²⁷Worri hayyu Misiritiini, Gosa Israeli galakisa jed'eenileeni worruma.

²⁸AABBO Waaqi gaafa Musani lafa Misiri keesati dubbate waan jed'eeni,

²⁹Anini AABBO Waaqa. Waan anini siini jed'u ch'ufa Farao hayyu Misiriti himi.

³⁰Ammo Musani waan jed'eeni, Anini nama araba laafati; hayyuuni eesa fuud'e na d'agaya re?