Read BORANA BIBLE – KITAABA WAAQA Bahisa 8 Bible Online

Bahisa 8 - BORANA BIBLE – KITAABA WAAQA bible

Bahisa 8

¹Jennaani AABBO Waaqi waan Musani jed'e, Faraoti olseeni waan jettuuni, Worra kiyya galakisi, aka worri na kad'atu.

²Ammo yo atini worra gad'iisu didde, lafa tante ch'ufa raachaani balleesa.

³Raachi galaana ch'ufa guute ira dabre, mana kanke fulla atini bultu, sire tante, maneeni hojattu tanteetiifi fulla iti wo d'aabani, ibida ch'ufa guuta.

⁴Eege d'ufe sifi hojattu tantetile kore gubbaa yaa.

⁵Duuba AABBO Waaqi waan Musani jed'e, Waan atini Harunini jettu, Ule tante galaana, dambala, fulla bisaani naqattu ch'ufa ira qabi, aka akanaani raachi lafa Misiri ch'ufa keesa guutu.

⁶Tanaafi Harunini bisaani Misiri ch'ufa harka ira olqabate, raachi gabaafate lafa Misiri ch'ufa guute.

⁷Ammo worri wo tolchu kaani akuma suni wo tolche lafa Misiri keesa raachaani d'ufe.

⁸Jennaani Faraoni Musafi Haruni yaame waan jed'eeni, AABBO Waaqa kad'ad'a aka inni raacha kana naafi lafa tiyyale iraa balleesu. Anileeni worra keesani galakisa, aka d'aqani sorio Waaqaa baasani.

⁹Musani waan jed'eeni, Anini inuma kad'ad'a, ammo hojja anini sifi hojattu teeti, worra lafa teetiti kad'ad'u nati himi, aka raacha suni sifi worra kanke keesaa balleesani galaana Nile ch'alla keesati hambisani.

¹⁰Inni waan jed'eeni, Ha bori taatu, Musani waan jed'eeni, Aki atini jette ha tahu. Akanaani aka Waaqi d'ibiini, ka aka AABBO Waaqa keenna jiru, injirre beeta.

¹¹Raachi sifi worra keeti, hojattu teeti, worra lafa teeti ch'ufa iraa bade galaana lafa Misiri ch'alla keesati hafa.

¹²Duuba Musafi Harunini Farao biraa yaani, Musani waan raacha suni, ka AABBO Waaqi Faraotiini d'ufe, Iraa balleesi jed'e, Waaqa kad'ate.

¹³AABBO Waaqi akuma Musani jed'e tolche, raachi manafi qayeefi ka oobru ke jiruleeni ch'ufti hobae.

¹⁴Raacha ch'ufa wolti guurani tuulani, lafti ajoofte.

¹⁵Ammo Faraoni aka raachi hobae arginaani garaa jabaate Musafa ch'aqasu dide, akuma qara AABBO Waaqi jed'e.

¹⁶Jennaani AABBO Waaqi waan Musani jed'e, Waan Harunini jettu, Harka d'eerefad'u, ule tante olfud'ad'u, lafaani d'ai, duuba awaarti kaatu ch'ufa biinni taati.

¹⁷Jennaani Harunini ule lafaani d'ae, awaarti kaate, awaarti lafa Misiri keesati kaate ch'ufti biinni taate.

¹⁸Worri wo tolchu kaani tolcha ufii tolche, aka biinni gabaasu, ammo indad'abani. Biinnini suni nama, bineensa, horile ch'ufati baafatte.

¹⁹Duuba worri wo tolchu kaani waan Faraoni jed'e, Kunini waan Waaqi tolche. Ammo Faraoni garaa jabaate, akuma AABBO Waaqi qara jed'e kaani worra ch'aqasu dide.

²⁰Jennaani AABBO Waaqi waan Musani jed'e, Bori ganama lafaa kai, Farao gara galaana deemu eegi waan jettuuni, AABBO Waaqi waan jed'e, Worra kiyya gad'iisi, aka worri na kad'atu.

²¹Yo atini gad'iisu didde, anini tiite heddu sifi hojattu tanteetiifi worra lafa tanteetiifi maneeni teesaniti buusa. Maneeni gosa Misiri tiiteeni guute, biyyeeni lafaleeni ch'ufti tiite taati.

²²Anini ammo guyya suni arda Gosheni, ka worri kiyya keesa jiru, illakisa, aka tiiteeni tokoleeni achi ind'umne. Akanaani aka anini, AABBO Waaqi, lafa tana keesa jiru beeta.

²³Akanaani worra kiyyafi kanke gargari baasa. Akheekhi kunini bori guutama.

²⁴AABBO Waaqi akuma suni tolche; duuba tuuti tiite guddooni mana Faraotiifi ka hojattu isaa iti duude. Lafa Misiri ch'ufa haguma geetuuni tiiteeni balleese.

²⁵Jennaani Faraoni Musafi Haruni yaame waan jed'e, Beena, lafa tana keesati sorio qala.

²⁶Ammo Musani waan jed'e, Akasi nuu intaatu, wonti akanatiifi sorioni nu AABBO Waaqa keenna baamnu worra Misiriti waan laguti. Yo nu sorio akana tana, ta worri Misiri lagatu, ila worraa dura qalle, worri d'akhaani nu had'a.

²⁷Akasi intahu, nu guyya sadi imaltu lafa aloo ke yaane AABBO Waaqa keenna sorio baasu male, akuma inni nuuni jed'e.

²⁸Duuba Faraoni waan jed'eeni, Inuma isani gad'iisa, aka AABBO Waaqa keesani lafa alooti sorio baaftanifi, ammo imfagaatiina. Nale Waaqa kad'ad'i.

²⁹Musani, waan jed'eeni, Anini ammumatana si biraa deeme AABBO Waaqa kad'ad'a, aka inni tuuta tiite tana sifi hojattu tanteetiifi worra kankele bori iraa balleesu. Ammo atini deebite nu sobde worra keenna AABBO Waaqaa sorio baasu ind'owiini.

³⁰Duuba Musani, Farao biraa deeme AABBO Waaqa kad'ate.

³¹AABBO Waaqi akuma Musani, kad'ate tolcheefi. Tuuti tiite taani ch'ufti Faraofi hojattu isaatiifi gosa Misiri ch'ufa iraa badde; tiiteeni tokochi qubaleeni inhamne.

³²Ammo Faraoni akuma kaani garaa jabaate biyya taani yau d'owe.