Read BORANA BIBLE – KITAABA WAAQA Bahisa 9 Bible Online

Bahisa 9 - BORANA BIBLE – KITAABA WAAQA bible

Bahisa 9

¹Duuba AABBO Waaqi waan Musani jed'e, Beeni, gara hayyu d'aqi waan jettuuni, AABBO Waaqi, Waaqa Ebrania, waan jed'u, Worra kiyya gad'iisi, aka worri na kad'atu.

²Yo atini worra yau d'owarte,

³anini gaargala guddaani isaniti d'ufe d'ukuba hama hori keesaniti buusa — farda keesani, harre, gaala, looni ammalle ree.

⁴Anini beesisa hori Israelitiifi hori Misiri gargari baasuni tolcha, aka horiini Israeli tokoleeni idoone.

⁵Anini AABBO Waaqi ya dubbi tana buufad'e, aka waan kana bori lafa tanati tolchu.

⁶Duuba boriyya AABBO Waaqi waan kana tolche; looni worra Misiri ch'ufti hobaani, ammo horiini gosa Israeli tokoleeni indoone.

⁷Faraoni waan tahe gaafate jennaani aka horiini gosa Israeli tokoleeni induiini iti himani. Ammo Faraoni ammalle garaa jabaate worra Israeli gad'iisu dide.

⁸Jennaani AABBO Waaqi waan Musafi Harunini jed'e, Fulla faara iti gubani keesaa daara harka guutad'a fuud'a, duuba ha Musani fuula hayyu durati oldarbu.

⁹Daaraani suni aka awaara lafa ch'ufa qabate, woni isiini ira baate ch'ufti, namaa sai lafa Misiri ch'ufti d'ulla fuud'e, nafi mamadaa.

¹⁰Duuba worri daara fulla faara iti gubani fuud'e, Musani Farao dura ejate daara oldarbate, daaraani sunini namafi horile d'ulla iti taate nafa bubuqacheesite.

¹¹Worri wo tolchu kaani Musa dura eju dad'abe, wonti akanatiifi d'ullaani ya worraafi worra Misiri ch'ufa qabate.

¹²Ammo AABBO Waaqi garaa Farao jabeese, inni akuma AABBO Waaqi Musani jed'e, worra ch'aqasu dide.

¹³Jennaani AABBO Waaqi waan Musani jed'e, Ganama lafaa kai, waan ati Faraoni jettu, AABBOONI, Waaqi Ebrania, waan jed'u, Worra kiyya gad'iisi, aka worri deeme na kad'atu.

¹⁴Maro tana hojatu tanteetiifi worra Misiri ch'alla ingaargalchu, ammo sile ingaargalcha, aka akasiini atini aka Waaqi d'ibiini na male lafa keesa injirre beetu.

¹⁵Anini sila yoona harka olfud'ad'e d'ukuba sifi nama kanke ch'ufati buuse, lafa keesa isani balleese.

¹⁶Ammo wonti anini isani fit'u dideefi, aka isani irre tiyya agartani, gurri kiyya lafa ch'ufaa gahu.

¹⁷Atini ammalle guddo ufi olfuute worra kiyya gad'iisu didde.

¹⁸Anini bori yoona bokaya d'akhaani roobu, ka haga lafti Misiri uumamte taka imbuini rooba.

¹⁹Amma waan taatu, nama ergi, loonifi hori kanke ka ala jiru ch'ufa galchi, manati olnaqi. Wonti akanatiifi bokai d'akhaani roobu suni namafi hori ala jiru ch'ufa, yo ato ingalchiini, iti roobe inhobaasa.

²⁰Hojattuuni Farao ta gari dubbi AABBO Waaqa d'ugeefate sodaate, tisseleefi hori ufii ch'ufa manati galfatte.

²¹Ammo worri dubbi AABBO Waaqa d'ugefachu dide kaani tisseleefi hori ufile alati lakise.

²²Jennaani AABBO Waaqi waan Musani jed'e, Harka d'eerefad'i olqabi, aka bokai d'akhaani roobu lafa Misiri keesafi namafi horifi ammalle waan oobru ke jiru ch'ufati roobu.

²³Jennaani Musani ule isaa taani Waaqati olqabe, AABBO Waaqi mandisufi bokaya d'akhaani roobu lafa Misiri keesati buuse.

²⁴Bokeeni d'akhaani roobu bue, angaasuuni gargari inch'inne bokaya suni keesati angaate, ka taka haga lafti Misiri uumamte nami inargini.

²⁵Bokeeni d'akhaani roobu suni waan lafa Misiri ka mana keesa injirre ch'ufa, namafi horile, iti roobe hobaase, mukha ch'ufa ch'ach'abse mid'aanile ch'ufa d'aane balleese.

²⁶Arda Gosheni ka Israeliini teetu ch'alla bokeeni d'akhaani roobu suni hanqate.

²⁷Jennaani Faraoni Musafi Haruni yaame waan jed'eeni, Arra ya ch'ubbame, AABBO Waaqi d'uga qaba, anumafi worra kiyyati wollaala qaba.

²⁸AABBO Waaqa na kad'ad'a, mandisufi bokeeni d'akhaani roobu ya nati guddate; anini isani gad'iisa, aka isani deebitani arma inteenne.

²⁹Musani waan jed'eeni, Akuma dira keesa baheeni, anini harka olqabad'e AABBO Waaqa yaamad'a. Duuba mandisuuni ch'itte, bokai d'akhaani roobu kulleeni ch'aama, akanaani aka lafti ta AABBO Waaqaa beeta.

³⁰Ammo anini imbeekha, sifi hojattuuni tante ammalle AABBO Waaqa insodaattani.

³¹Waan garbuuni mura geeteefi ammalle jibriini daraara baasu jirtuufi, jibrifi garbuleeni ch'ufti badde.

³²Ammo dargayeeni, waan eege bilchaatuufi imbanne.

³³Musani Farao biraa deeme dira keesaa bahe harka olfud'ate AABBO Waaqa kad'ate jennaani mandisuuni ch'itte, bokai d'akhaani roobu kaanifi bokeeni ch'ufti ch'aame.

³⁴Faraoni waan kana ch'ufa ka tahe arginaani ch'ubbu taaniti deebie, isaafi hojattuuni isaaleeni akuma kaani garaa jabeefatani.

³⁵Duuba Faraoni garaa jabeefate gosa Israeli galakisu dide, akuma AABBO Waaqi Musani jed'e kaani.