Read BORANA BIBLE – KITAABA WAAQA Aayubu 24 Bible Online

Aayubu 24 - BORANA BIBLE – KITAABA WAAQA bible

Aayubu 24

¹Waaqi guddaani maafi guyya qorsumma intolchini? Nami isa beekhu maafi guyya suni barbaade d'aba?

²Nami aka lafa ufi ballifatu d'akha seera guura; ree biyyaa hatani ta ufiiti naqatani.

³Harrele ilmaani hiyyeeyi iraa fud'atani, sanga haad'a hiyyeesale qabdo fud'atani.

⁴Hiyyeesa d'uga d'owani, nama woma inqamnele baqachisani.

⁵Tanaafi hiyyeeyiini akuma harre diidaa lafa aloo keesa sagale barbaadati; achi male dandaani fulla d'ibi ilmaani worraati sagale inargani.

⁶Hiyyeeyiini oobru biyyaa murte oobru ch'ubbicha keesa mid'aani zabibu guurti.

⁷Halkanile woya male qulla bulani, waan d'aamocha iraa d'owa d'abani.

⁸Bokeeni gareeniti roobu worra jisse, worri d'akha jalati baqate aka qobatu.

⁹Ch'ubbichi daima abba inqamne tisse tolfate, ilmaani hiyyeesaa qabdo fud'ata.

¹⁰Ammo hiyyeeyiini woya d'abde qulla yaate, ka woma garaa inqamne mid'aani biyya galchiti.

¹¹Worri mid'aani ejersa d'ad'a keesaa baase, mid'aani zabibule daad'i keesa baasa, ka ufiftu d'eebu injirre.

¹²Dira keesati nami mada qabuufi ka duu jiru iyye qarqaarsa kad'ata, ammo Waaqi kad'acha suni ind'agayu.

¹³Nama gariti jira ka ifsa didu; worri ifsa inhubatu yokhaani gara inni deemu gula indeemu.

¹⁴Ganama nami wo ijeesu lafaa kae hiyyeesa ijeesu d'aqa; halkani d'aqe wo hata.

¹⁵Nami nad'eeni biyyaa d'aqu, d'ia adu eege, namu na inargu jed'e d'okhate iti d'aabata.

¹⁶Halkani hattuuni mana ch'absiti, ammo guyya d'okhate, ifsa diddi.

¹⁷Worri ifsa guyya sodaate, dukana halkani jaalata.

¹⁸Ati waan jettu, Nama ch'ubbicha bisaaniti fach'ae fud'ata, lafa isaale ya Waaqi abaare; inni deebie oobru isa ta zabibu keesa inhojatu.

¹⁹Akuma wonti qabanooftuuni hojja aduuni owite bat'u akasuma ch'ubbichi due lafa iraa bada.

²⁰Haati isaaleeni deebite isa inqaabatu; raamooni isa nyaate, inni akuma mukhaa qaarie bada.

²¹Wonti isa akasi tolchanifi waan inni nad'eeni hiyyeeyi dabse, nad'eeni woma ind'aliinile nahu dideefi.

²²Waaqi irre isaatini worra jajaba balleese, ch'ubbichale wo tolche hobaasa.

²³Waaqi yo fed'e, nagayaani isa teesise ammo hojja ch'ufa ilaani isaa qorqorata.

²⁴Bulti diqo toko ch'ubbichi wo horata, ammo eege aka raafu qanch'oorate akuma guma badala ka buqisani, bada.

²⁵Nami waan kana mormu injira? Nami dubbi tiyya tanaani d'ara jed'u injira?