Read BORANA BIBLE – KITAABA WAAQA Faaru 109 Bible Online

Faaru 109 - BORANA BIBLE – KITAABA WAAQA bible

Faaru 109

¹Ee Waaqa, anini si faarsa, afaani inqabatini!

²Ch'ubbichafi kiyyibaani nati kaate, waan kiyya ka d'ara dubbate,

³fayyuma tana hameenna kiyya haasofte na haati.

⁴Worri ato anini jaalad'e waaqa worraa kad'ad'ele nani morka.

⁵Worri anini waan dansa tolchinaani waan hamtu na tolche, anini jaalanaani na jibbe.

⁶Dubbi nyaapa kiyya nama hammaati geesi, duuba ha nami isa jibbu artiti isa himatuti.

⁷Dubbi isaa lalaani, ha wollaala iti muraniti; kad'acha isale ha aka ch'ubbuti hereganiti!

⁸ Guyyaani isaa ha gabaabatuti. Nami d'ibiini huji isaa ha fud'atuti!

⁹Ilmaani isaa ha abba d'abde, niitileeni ha d'iirsa d'abdu!

¹⁰Ilmaani isaa ha lafa marte woi kad'atuti, ona isiini keesati galtule ha keesa gussaniti!

¹¹Nami gati isaa qabu ha waan isaa ch'ufa fud'atuti. Nami inni fuula imbeenne, ha waan inni hojate horate ch'ufa guuratuti.

¹²Nami tokoleeni isaa nahe ilmaani inni iraa due inqorqoratiini.

¹³D'alooti isaa ch'ufti ha hobae, maqa isaa d'aloota taka tanale keesa ded'aniti.

¹⁴AABBO Waaqi ha ch'ubbu ababooti isaa tolchite qaabate, daba haad'a isaale araaramufi didu.

¹⁵AABBO Waaqi ha hojja ch'ufa ch'ubbu isaani qaabatu; maqa worra suni deebie nami inqaabatiini!

¹⁶Nami sunini taka namaa innaane inni hiyyeesafi d'ipatafi nama qarqaarsa womatu inqamne gusse ijeese

¹⁷Inni guddo nama abaaruu fed'e ammo Waaqi ha isa abaaruti! Inni namaa eebisu dide, namileeni isaa ineebisini!

¹⁸Inni abaarsa akuma nami woya uyifatu uyifate. Abaarsi inni nama abaaru ha isaati deebie, aka bisaani nafa isaa lit'e aka d'ad'a lafe isaa seenuti!

¹⁹Inni ha abaarsa suni hojja ch'ufa aka woya mart'ifate aka gurda hid'atuti!

²⁰Ee AABBO Waaqa, nyaapa kiyya ka akasi na abaaru akasuma gaargalchi!

²¹Ammo AABBO Waaqa kiyya, akuma atini kakhate na qarqaari, maro dansumma jaalala teetitiifi na baasi.

²²Anini hiyyeesa d'ipu qabu; garaani kiyyaleeni guddo laalefata.

²³Anini akuma gaadisa galgala dabra; akuma awaanisa bubbeeni na fuuti.

²⁴Anini beelae humniti ch'ufti nara jiddi; nafi kiyya ya d'umate, lafeefi goga ch'alla tahe.

²⁵ Nami na argu ch'ufti na koble, mata gingilfate na goyeesa.

²⁶Ee AABBO Waaqa kiyya, na qarqaari; maro jaalala tante ta ind'umanneetiifi na baasi!

²⁷Nyaapi kiyya, aka nami na baasu sii, ha beekhu.

²⁸Worri ha na abaaruti, ammo atini na eebisi. Nama na gaargalchu ha dabsaniti, ammo anini, hojattuuni tante, ha gammaduti.

²⁹Nyaapa kiyya ha ch'eeri balleesuti, worri ha ch'eera aka woya uyifatuti.

³⁰Anini afaani kiyyaani guddo AABBO Waaqa galata deebisa. Waan inni hiyyeesa qorqorate nama isa ijeecha iti murule jalaa baaseefi, gumi ch'ufa durati isa faarsa.