Read BORANA BIBLE – KITAABA WAAQA Faaru 71 Bible Online

Faaru 71 - BORANA BIBLE – KITAABA WAAQA bible

Faaru 71

¹Ee AABBO Waaqa, anini siti baqad'a, ch'eeru na d'owi!

²D'uga teetiini na qarqaari na baasi, na d'agayi na baasi!

³Siida anini iti baqad'uufi fulla jabdu na baaftu naa tahi; atini siida kiyya ka anini iti baqad'u.

⁴Ee Waaqa kiyya, harka worra ch'ubbuu, ka naasu inqamne, ka hameenna gula yau, keesaa na baasi,

⁵Ee AABBO Waaqa, anini si abdad'a. haguma d'aloota kiyyati siuma d'ugeefad'a.

⁶Anini haguma d'alad'e si d'aabad'e; haguma d'aloota kiyyati asi atini ya na qorqorate, tanaafi anini guyya ch'ufa si faarsa.

⁷Waan atini aka jaba na qorqorateefi, jireenni kiyya yayu akheekha nama hedduu tahe.

⁸Guyya ch'ufa anini si faarse, guddinna kanke odeesa.

⁹Anini amma ya jaare, na illakisiini; anini amma ya irre d'abe, lafa na imbuusini.

¹⁰Nyaapi kiyya mala nati d'aate waan kiyya dubbate na ijeesu fed'a.

¹¹Worri waan jed'u Waaqi ya lafa isa buuse; koota, yaane isa qamna, nami isa baasu injiru.

¹²Ee Waaqa, naraa imfagaatini; ee Waaqa kiyya, hurrisi kooti, na qarqaari!

¹³Nama na had'u ha dabsatani balleesani. Nama na gaargalchu fed'ule ha ch'eersani gurra balleesani.

¹⁴Anini hojja ch'ufa si abdad'e, haga qara ira si faarsa.

¹⁵Anini dansuma tante odeese, hojja ch'ufa waan baafama keeti dubbad'a, ato dandae waan isii hubachu baad'ele.

¹⁶Ee AABBO Waaqa gudda, anini irre tante faarse, dansuma tante ch'alla odeesa.

¹⁷Haguma ijoolluma tiyyaati asi, siumati na qarqaara, anini arrale waan dansa atini naa tolchite odeesumati jira.

¹⁸Anini amma ya jaare, rifeensi kiyyaleeni ch'ufti ya arrae, Ee Waaqa, na illakisiini! Hojja anini jabeenna kanke d'aloota ch'ufati odeesu naa wahelchi.

¹⁹Ee Waaqa, atini yayu waan mama tolchite, d'ugaani teetileeni guddo, gubbale ind'aqabdi. Nami aka keeti tokoleeni lafa keesa injiru.

²⁰Atini yayu d'ipufi gaargala nati ergite, ammo siumati ammalle irre tiyya naa deebise, boola duaa keesaa na fuud'a.

²¹Atini haga duri ira guddinna naa kennite ammalle na jabeesita.

²²Anini kiraari d'ae, maro d'uga teetitiifi si faarsa, Ee Waaqa kiyya. Anini dibbe d'ae sirbe si faarsa, Ee Qulqullo Israeli.

²³Anini hojja sii sirbu, guddise gammadaani sirba; garaafi qalbi tiyya ch'ufaani anini waan atini na baafteefi sii sirba.

²⁴Anini waan d'uga teeti guyya ch'ufa dubbad'a, wonti akanatiifi jara na balleesuu fed'u kaani yayu dabsatani ch'eersani.