Read BORANA BIBLE – KITAABA WAAQA Isaya 22 Bible Online

Isaya 22 - BORANA BIBLE – KITAABA WAAQA bible

Isaya 22

¹Kunini d'aamsa waan Bale Daayya, ka d'aamani. Maani isi? Nami dira kana maanifi mana kore gubbaa ejaanja?

²Nami diraa ch'ufti maafi dibbise wolti baha? Nami ch'ufti maanifi lalabe gammada? Nami keesani ka due woraana keesati indoone.

³Jara isaniini deemu, ato worri t'iya tokole indarbanne gussani qaqabani.

⁴Amma na lakisi aka anini worra kiyya ka due laalefad'e bohu. Garaa na jabeesite iraa na inhambisini.

⁵Hojaani tunini hojja nami mudame ufi jibbaate Bale Daayya keesati waan tahu wollaalu. Nami waan kana nutiini d'ufe, AABBO Waaqa gudda naabo dira keenna ch'ach'absani balleesani, gaareeni keesa nami iyye qarqaarsa fed'ate.

⁶Askartini lafa Elamu ta guubeefi t'iya qabdu farda yaabate d'ufte. Askartini kirileeni wonte ufi kurfefatti.

⁷Bale Yuda, ta sagale guddo baaftu, gaari fardi hirkisuti guuta; balbala fullo Yerusalemu dura askartini farda yaabate ejaanjiti.

⁸Wonti Yuda nyaapa iraa d'owa ch'ufti ya badde. Gaafa woni sunini taate, isani miha lolaa ka mana badda keesa jiru gadi baaftani.

⁹Isani naabo Yerusalemu fulla mid'aasu malani agartani, maneeni Yerusalemu ch'ufa ilaaltani, haga toko ch'absitani, aka d'akhaa naabo diratini jaartani iraa guurtani. Ammalle aka bisaani olikeetani,

¹¹haro dira keesati jaartani, aka bisaani haro qara taani keesaa yaani iti naqatani. Ammo isani Waaqa, ka waan kana ch'ufa duri mala d'ae tolche, odu inkaamne.

¹²AABBO Waaqi guddaani guyya suni isani yaame, aka isani laalefatani bootani mata haadatani ch'arqi naqatani.

¹³ Ammo fulla suni isani kofaltani jila tolfatani, loonifi ree qaltani nyaatani, daad'ile d'uddani waan jettani, koota, arra nyaanne d'unna, silaaftu bori inhobaana.

¹⁴AABBO Waaqi guddaani waan nani jed'e, Haga worri kuni jiru ch'ubbu tana inaraaramanifi. Dubbi tana ana, AABBO Waaqa guddati, jed'e.

¹⁵AABBO Waaqi guddaani waan naani jed'e, Kai namicha gudda hojatu mana hayyu, ka Shebna jed'ani, d'aqi waan jettuuni,

¹⁶Atini eenu ufi seeta? Eenuti gaara kana gubbati, irreesa qotad'i siini jed'e?

¹⁷Ato atini nama jabaale taate, AABBO Waaqi si qabe gadi sigata.

¹⁸Inni aka gulluba si marse gara lafa guddo d'ibi si darbata. Duuba achiti d'aatu gaara atini kiyyibduuni kaaniti doota, waan atini worra gudda keeti ch'eersiteefi.

¹⁹AABBO Waaqi huji tante keesaa si baase, guddinna atini qabdu siraa fuud'a.

²⁰AABBO Waaqi waan Shebnaani jed'e, Gaafasi anini hojatu tiyya Eliakimu ilma Hilkia, yaame,

²¹woyaafi gurda kanke ka huji iti kaye, huji qara atini hojatu harka isaati deebisa inni worra Yerusalemutifi ka Yuda abba iti taha.

²²Anini fura mana Daudi harka isati kenna; waan inni bane nami dandae inch'ufu, waan inni ch'ufule nami tokoleeni dandae imbanu.

²³Anini akuma d'isa woini d'isani isa jabeese, gurri worra isaa isa iraa baha.

²⁴Ammo fit'a isaatiifi nami isaani bulu isa gaargalcha. Worri akuma okholeefi sorora fafannisani, isati fafannifama!

²⁵Hojja guyyaani suni d'ufu d'isaani kaani lalaafe jiga. Duuba wonti isati fannifama kaani ch'ufti inhobaati. Dubbi tana AABBO Waaqati jed'e.