Read BORANA BIBLE – KITAABA WAAQA Isaya 3 Bible Online

Isaya 3 - BORANA BIBLE – KITAABA WAAQA bible

Isaya 3

¹Amma tana AABBO Waaqi guddaani yayu namaafi waan diri Yudatifi ka Yerusalemu jiruuni ch'ufa iraa fuud'uu gahe. Inni sagaleefi bisaani,

²worra jajabaafi askartiifi jaallabootaafi raagootafi yuubaafi jaaroleefi,

³worra gugurda askartitifi worra gurra qabuufi worra nama dura yaufi falfaltule ch'ufa iraa fuud'a.

⁴AABBO Waaqi ijoolle didiqo worra mohachisa.

⁵Nami ch'ufti woldabsa, kaimi jaarole insaalfatu, nami seseegi ufitu woma keesa injirre gudda ufiti saalfachuu dida.

⁶Guyyaani ind'ufa, ka nami balbala gosa toko nama balbala ufi toko fohate waan jed'uuni, Atini waan keeyatu qabda, kai lafa badde ona taate tana gudda iti tahi.

⁷Ammo inni waan jed'uuni, lakisa, anini indandau, anini sagaleefi woyale inqabu, gudda keesani na intolfatina!

⁸Yerusalemuni ya badde, Yudaleeni jiguu jirti! Worri waan hojatufi waan dubbatu ch'ufa keesa Waaqaani morka; worri diiduma keesa Waaqa didu jira.

⁹Fuuli worraleeni aka worri ch'ubbu tolche ingarsiisa; akuma worri Sodoma duri ch'eera d'abe ch'ubbu tolche, worrileeni akasuma tolche. Tunini baddi worrati, ka worri ufiitini d'ufe.

¹⁰Nami d'ugaa ingammada, wonti ch'ufti intoltifi. Worri waan hojate iraa wo argata,

¹¹ammo worri ch'ubbu imbada, badiini worraa inooltu. Waan worri duri nama tolche amma worra tolchani.

¹²Ijoolleeni gumi tiyya dabsite, nad'eeni worra mohatti. Gumi tiyya, jari isani dura deemu ya kara iraa isani gorse, duuba isani gara yaatani wollaaltani.

¹³AABBO Waaqi ya gumi isaa himachu d'ufe; inni aka worra qoru kurfo jiru.

¹⁴AABBO Waaqi jaaroleefi jara gumi isaa dura yaule ya qorsumatiini d'ufe; wonti inni worra himatu tana: Isani oobru zabibu saamtani. Mana keesanile ya wonti isani hiyyeesa iraa guuratani guute.

¹⁵Isani maanifi gumi tiyya dabsitani hiyyeesa balleesitani? Dubbi tana, ana, AABBO Waaqa guddati, jed'e.

¹⁶AABBO Waaqi waan jed'e, me aka nad'eeni Yerusalemu kiyyibdu ilaala! Isiini funnaani, d'aabde ilaani d'iira barbaada yaati. Worri shoobaa yae, faayi worri miilati naqatu qiqilisa.

¹⁷Ammo anini ch'ito worrati buuse, mata worraa haade qulqulleese lakisa.

¹⁸Guyyaani ind'ufa, ka AABBO Waaqi waan nad'eeni Yerusalemu kiyyibduuni iraa yaasu — faaya worri miilaafi matafi mormaafi

¹⁹harkati naqatu. Inni hagogoofi

²⁰kofiaafi, qud'aama worri harkaafi hid'aanati naqatufi

²¹qube worri qubati naqatufi ta funnaaniti mat'anfatufi

²²woya mimid'aadu aka heddu ta worri naqatufi, borsaafi

²³woya nafi namaa keesaani mullatuufi woya booftatiifi gaarbisarafi, hagogo worri matati uyifatu — waan kana ch'ufa inni worra iraa fuud'a.

²⁴Worri fulla qayya urgau, inajaa; fulla hanfala mid'aaga hid'atu, haada hid'ati; fulla rifeensa mid'aaga baaftu, imoloofti; fulla woya mid'aaduni yaatu, ch'arqiini yaati; mid'aagumti worraa garagalte ch'eera taati!

²⁵Nami d'iira ka dira suni, jannileeni woraanani dua.

²⁶Balbalti fullo dira laalefate booti, dirileeni niiti qulla lafa teetu fakaata.