Read BORANA BIBLE – KITAABA WAAQA Isaya 61 Bible Online

Isaya 61 - BORANA BIBLE – KITAABA WAAQA bible

Isaya 61

¹ AABBO Waaqi guddaani yayu lubbu isaatini na guute. Inni yayu na muude na erge, aka anini odu dansa hiyyeeyiti odeese, nama guddo garaani laalala qabu fayyise, nama hid'aansa keesa jiru ha hiikhaani jed'e, nama hid'anile hiikha.

²Inni ya na erge, aka anini bara Waaqi gumi ufi baase nyaapa worra dabsatu himu. Inni ya na erge, aka anini nama bohu ch'ufa kibe garaa jabeese,

³nama Sioni keesati bohu jiru ch'ufa fulla laalala gammadafi qilit'ama kenne, fulla laalefacha faaru d'aachisu. Worri mukeeni AABBO Waaqi oobre fakaata. Worri ch'ufti waan dansa tolche, Waaqale waan inni tolcheefi faarsani.

⁴Worri dira bade ona tahe jaare, dira bara heddu balleesani mid'aasa.

⁵Gumi tiyya, nyaapi isanii hojate, ree teesani tisse, oobru teesani ta mid'aanitifi ta zabibu isanii fach'aase mura.

⁶Qaalole AABBO Waaqa isaniini jed'ani, hojatu Waaqa keenna jed'ani isani yaamani. Isani waan gochii d'ibiini horate soorattani, waan worraatini keenna jettani ufi saaddani.

⁷Ch'eerafi fokoni teesani ya hobaate. Lafa teesani keesa teetani hormaata keesani maro lama isanii darani, gammadi keesanileeni ka jiru jireennaa taha.

⁸AABBO Waaqi waan jed'u, Anini d'uga jaalad'e dabaafi ch'ubbu jibba. Anini d'uga gula gumi tiyyaa woi kenne wold'aqisa jiru jireenna worra woliini tolfad'a.

⁹D'alooti worraa gosa ch'ufa keesa gurra baafate, nami worra argu ch'ufti, aka worri gumi anini eebise, beekha.

¹⁰Anini AABBO Waaqa keesa gammade, waan Waaqi kiyya wo naa tolcheefi qilit'ama. Inni yayu woya baafama nati uyise, ubaara d'uga naa kaaye, akuma worri wolfuud'u faaya dadansa naqate ufi mid'aasu.

¹¹ Akuma sanyini fach'aasini baate latu, akasuma AABBO Waaqi guddaani gumi ufi baase gochiti ch'uftileeni isa faarsiti.