Read BORANA BIBLE – KITAABA WAAQA Lawi 22 Bible Online

Lawi 22 - BORANA BIBLE – KITAABA WAAQA bible

Lawi 22

¹AABBO Waaqi waan Musani jed'e,

²Waan atini Harunifi ilmaani isaatini jettu: Isani maqa kiyya qulqullo t'ureesu himmalle, tanaafi sorio qulqullo worri Israeli naa baasu ulfeesu maltani. Anini AABBO Waaqa.

³Hojja nami d'aloota keesani ka qulqullo intahini, sorio qulqullo worri Israeli na baaseti d'iaate, nama suni huji Waaro Woyyuma keesaa malani. Anini AABBO Waaqa.

⁴Nami d'aloota Haruni ka d'akuba hama aka qomaat'a qabu, yokhaani ch'oftu qabu, sorio qulqullo nyaachu himmalle, haga fayye qulqullauti. Ammalle qaalluuni waan reefati d'iaate qulqulluma d'abe qabate, yokhaani ufiti oobjate,

⁵yokhaani bineensafi nama qulqullo intahini tuqe, qulqullooniti.

⁶Qaalluuni akasi tahe ch'ufti haga aduuni d'iituti qulqullooniti, ammalle ato akasile taate, haga nafa d'iqatuti inni sagale qulqullo suni inyaatini.

⁷Eegi aduuni d'iite inni qulqullo. Duuba sagale sorio qulqullo suni ha nyaatu, wonti akanatiifi sagaleeni isa suni.

⁸Inni fooni hori ufiini due, yokhaani ka bineensi ijeese inyaatini; wonti suni isa t'ureesiti. Anini AABBO Waaqa.

⁹Qaaloleeni ch'ufti seera kiyya kana jabeesu malte. Yo worri akasi intahini, worri wollaala seene dua; wonti akanatiifi worri ya seera qulqullo gula yau dide. Anini AABBO Waaqa, ka worra qulqulleesu.

¹⁰Nami worra qaallu intahini tokoleeni sagale sorio qulqullo inyaatini, keessumafi nami qaallu hojatuleeni dandae inyaatu.

¹¹Ammo tisseeni qaallu, ta inni beese ufitini bitate taanaani, yokhaani ta worra isaa keesati d'alate taanaani, sagale qaalluuni argatu dandeete nyaati.

¹²Dubarti qaallu, ta nami qaallu intahini fuud'u, sagale sorio qulqullo nyaachu himmalle.

¹³Ammo intalti qaallu ta d'iirsi iraa due, yokhaani ta d'iirsi lakise, ta ijoolle inqamne, ta galte worra abba keesa teetu, isiini sagale qaallu qooda abbaani isii argatu dandeete nyaati. Nami worra qaallu intahini sagale suni inyaatini.

¹⁴Hojja nami worra qaallu intahini sagale sorio qulqullo suni beekha inyaatini, inni waan nyaate suni ha qaallicha baase ammalle waan shani keesa toko iti daruufi.

¹⁵Qaaloleeni sorio qulqullo worri Israeli AABBO Waaqa baasu,

¹⁶nama qaalole intahini kennite int'ureesini, wonti akasi suni wollaalafi gaargala nama sunitini d'ufti. Anini AABBO Waaqa, ka sorio suni qulqulleesu.

¹⁷AABBO Waaqi waan Musani jed'e,

¹⁸Waan atini Harunifi ilmaani isaatiifi worra Israeli ch'ufaani jettu: Hojja nami Israeli yokhaani nami gosa d'ibi, ka worra keesa godaanu, sorio gubani baasu, waan kakhu gula Waaqaa baasani taanaani, yokhaani waan fed'i ufi gula baasani taanaani, horini sunini aabo womati qabaachu himmalle.

¹⁹Horini suni ka hanch'afa aabo inqamne tahuti, aka AABBO Waaqi fud'atu.

²⁰Hojja hori aabo qabu baaftani AABBO Waaqi infud'atu.

²¹Hojja nami sorio world'ageeti AABBO Waaqaa baasu, waan kakhu gula Waaqa baasani taanaani, yokhaani waan fed'i ufi gula baasani taanaani horini suni aabo womatu qabaachu himmalle, yo ka Waaqi fud'atu taate.

²²Hori balla, yokhaani naafa, yokhaani ka mogolchani yokhaani ka nafi mamada qabu, yokhaani ka ch'itae, AABBO Waaqaa imbaasina. Hori akana kana tokole waan mesa fakaata irati guddani AABBO Waaqaa imbaasina.

²³Yo fed'i gula wobaaftani, wonti isani baaftani suni farra yokhaani baach'a taate, waan suni dandaani isani iraa fud'atani; ammo yo isani waan akasi suni waan kakhu gula Waaqaa baasani baaftani isani ira infud'atani.

²⁴Hori kolaasani, yokhaani ka tumani, yokhaani ka kolaani mamadae ch'ich'ite AABBO Waaqaa imbaasina. Waan akana kana lafa teesani keesati ee injed'ani, ya seerani.

²⁵Hori gosa d'ibi iraa argatani sorio sagale Waaqaa imbaasina. Hori akasi suni hori aabo qabuti heregani, tanaafi isani iraa infud'atani.

²⁶Hojja ilmooleeni yokhaani watiyeni d'alate, haga isiini torba bultuti haad'a jalaa imfuud'ina, ammo eegi suni dandaani sorio gubani baasani.

²⁸Saa d'alafi ilme isaa, yokhaani hoola d'alafi ilme isaa, yokhaani reeti d'altufi ilme isii, guyya taka sorio woliini imbaasina.

²⁹Hojja sorio baaftani AABBO Waaqaa galata deebiftani, aada gula baasa, aka Waaqa isani iraa fud'atu;

³⁰guyyuma suni nyaad'a, imbulchina. Anini AABBO Waaqa.

³¹Seera kiyya jabeesa guuta, anini AABBO Waaqa.

³²Maqa kiyya qulqullo int'ureesina; gumiini Israeli ch'ufti ha aka anini qulqullo beetu, anini AABBO Waaqa, ka isani qulqulleesu.

³³Anini lafa Misiri keesaa isani baase, Waaqa keesani tahe. Anini AABBO Waaqa.