Read BORANA BIBLE – KITAABA WAAQA Lawi 5 Bible Online

Lawi 5 - BORANA BIBLE – KITAABA WAAQA bible

Lawi 5

¹Nami waan akana kana tolchu sorio dabaani ufiraa baasani baasu male. Hojja nama dubbi yaamani, waan atini agarte yokhaani ka atini d'ageete nuti himi jed'aniini, ammo inni himu dide, nama suni wollaali ch'ufa gubba isaa taha.

²Hojja nami danu waan aada keesa qulqullo intahini tuqe, reefa bineensa taanaani reefa hori taanaani, reefa bineensa garaani lafa ira lohu taanaani, nami suni ya qulqullooma d'abe wollaala keesa seene.

³Hojja nami danu waan nami iraa bahe ka qulqullo intahini tuqe, waan tateefu hojuma inni waan tahe suni beekate wollaala seena.

⁴Hojja nami heregaani waan tateefu dansaafi hamtu taanaani, kakhate hojuma inni waan tahe suni beekate wollaala seena.

⁵Yo nami kara kana tokoleeni wollaala seene nami suni ha daba ufi himate,

⁶gati hoola d'ala yokhaani reeti toko maro wollaala isaati AABBO Waaqatini d'ufu. Qaallichi ha sorio suni maro wollaala nama suniti jed'e baasu.

⁷Yo nami ree baasu inqamne, inni ha sabaliisa gugurda lamafi yokhaani didiqa lama AABBO Waaqatini d'ufe, maro daba isaati jed'e sorio baasu, toko ka sorio dabaani ufira baasaniti. kaani ka sorio gubani baasani.

⁸Inni ha qaallutini d'ufu, duuba qaallichi suni ha simpirre qara sorio dabaani ufira baasani baasu. Inni simpirre suni, ka mata ira inkunne,

⁹morma miich'ire ijeese, duuba d'iiga isii haga toko ha d'aatu waan mesa fakaata kaaniti fifit'u. D'iiga hafe kaani ha waan mesa fakaata kaani jalati jissani. Kunini sorio dabaani ufi ira baasani.

¹⁰Duuba eege inni ha simpirre lameeso aada sorio gubani gula baasuti. Akanaani qaallichi sorio daba nama sunitini baasani baase, daba isaa araaramanifi.

¹¹Yo nami sabaliisa gugurdafi yokhaani didiqa baasu dad'abe, nami suni ha mid'aani daakhani ka kilo toko ka aka sorio dabaani ufiraa baasani, baasuti. Inni d'ad'a yokhaani hit'aana tokole iti naqu himmalle, wonti akanatiifi sorioni suni ta dabaani ufiraa baasani.

¹²Inni ha qaalluti geese, duuba qaallichi suni ha harka guutate iraa fuud'e, waan mesa fakaata kaani irati gubuti aka akasiini aka waan kana ch'ufa Waaqa iraa argatani garsiisu. Isiini sorio dabaani ufiraa baasani.

¹³Akanaani qaallichi sorio daba nama sunitini baasani baase, daba isaa araaramanifi. Mid'aani daakhani kaani ka hafe qaalluti fud'ata, akamu sorio mid'aani ta baasani taani.

¹⁴AABBO Waaqi waan Musani jed'e,

¹⁵Yo nami danu waan qulqullo sila AABBO Waaqa baasani lakise, akasiini ch'ubbu tolche, nami suni ha gati waan suni elemo yokhaani korbeesa toko, ka kamu aabo inqamne, AABBO Waaqaa baasu. Gati hori suni ha aada Waaro Woyyuma gula laalani.

¹⁶Duuba inni waan sila baasu male baase, ammalle waan shani keesa toko ha iti daruti. Inni waan suni ha qaallichati kennuti duuba qaallichi hori suni sorio daba nama sunitini baasani baase, akasiini daba isaa araaramanifi.

¹⁷Hojja nami danu seera AABBO Waaqa ch'abse ch'ubbu seene, inni gati baasu male.

¹⁸Inni ha elemo yokhaani korbeesa, ka kamu aabo inqamne, gati baase qaallutini d'ufu. Gati hori suni ha aada Waaro Woyyuma gula laalaniti. Qaallichi sorio daba nama sunitini baasani baase, akasiini daba isaa araaramanifi.

¹⁹Inni sorio suni waan AABBO Waaqati ch'ubbamefi gati baase.