Read BORANA BIBLE – KITAABA WAAQA Yeremia 31 Bible Online

Yeremia 31 - BORANA BIBLE – KITAABA WAAQA bible

Yeremia 31

¹AABBO Waaqi waan jed'u, Guyyaani ind'ufa, ka anini gosa Israeli ch'ufaa Waaqa tahe, worrileeni gumi tiyya tahu.

²Wonti AABBO Waaqi jed'u tana: Nama woraana jalaa bahe anini lafa gamoojiti naheefi. Gaafa gumiini Israeli guddo boqochu feete,

³anini fago worrati mullad'e waan jed'e, Worra Israeli, anini haguma duriti isani jaalad'e, tanaafi hojja ch'ufa jaalala tiyya ta muumme inqamne isani agarsiisa.

⁴Anini deebie ammalle isani jaare, isani ammalle dibbe teesani fud'attani gammaddani sirbitani.

⁵Isani ammalle gaareeni Samaria irati oobru zabibu oobrattani, nami oobruleeni woma isiini baaftu nyaata.

⁶Ee, guyyaani ind'ufa, ka nami woi eegu gaareeni Efraimu iraa iyye waan jed'u, koota gara AABBO Waaqa keenna, Sioniti nu yaasa.

⁷AABBO Waaqi waan jed'u, Maro Yakobotiifi gammadani sirba, maro gosa gosa ch'ufa ira guddotifi lalaba, faaru teesani d'aad'a. AABBO Waaqi ya gumi ufi baase, nama hafele ch'ufa ya baase jed'a.

⁸Anini mirgaa worraani d'ufe muumme lafale worra guure galcha. Naafafi ballaleeni worra woliini d'ufe, nad'eeni garaacha qabdufi, ta diquma ind'alinileeni worra woliini d'ufti, worra gumi heddu muumme inqamneti gala.

⁹Gumiini tiyya boote na kad'atti, ato anini worra galchuu jiru. Anini afaani galaana daandi qajeeltu worri keesati ingufanne gula worraani godaana. Anini abba Israeliti, ilmi kiyya ka angafa Efraimu.

¹⁰AABBO Waaqi waan jed'u, Gosa ch'ufa, na ch'aqasa, dubbi tiyya lafa fago ta afaani galaana ch'ufati haasaa. Anini gumi tiyya ta Israeli gargari firfirse, duuba eege wolti deebise, akuma tissituuni hooliye ufi qorqoratu qorqorad'a.

¹¹Anini yayu gumi Yakobo baase, harka gosa irre qabdu keesaa fuud'e.

¹²Worri d'ufe gaara Sioni irati sirbe, waan anini kenneefi maache iraa gammada — mid'aani, daad'i d'ad'a, loonifi reele. Worri oobru bisaani quufte fakaata, waan fed'u ch'ufa argata.

¹³Dubarti gammade sirbite, d'iirti kaimafi jaaroleeni qilit'amti. Anini boha worraa garagalche gammada tolche, garaa worra jabeese laalala worraa garagalche qilit'ama tolcha.

¹⁴Anini qaalole sagale dansaani quubse, gumi tiyyale waan isiini feetu ch'ufa kennafi. Nami dubbi tana jed'e ana, AABBO Waaqa.

¹⁵ AABBO Waaqi waan jed'u: Qonqo Rama keesa d'agayani, ta laalalafi boha guddo. Raheliini ilmaani ufiti boote iraa hafu dad'abdi, waan isiini ch'ufti raawateefi.

¹⁶Bohu lakisi imimaani ufi ira haaqi. Hujiini atini ilmaani teeti tolchite tokoleeni lafati inhaftu; worri lafa nyaapa keesaa gala.

¹⁷Abdiini injirti, aka takaa tana ilmaani tante worra ufiti galtu. Nami dubbi tana jed'e ana, AABBO Waaqa.

¹⁸Anini worra Efraimu ka laalefate akana jed'u d'agaye: AABBO Waaqa, nu hori mandiida fakaanna, ammo atini nu lenjifte. Nu galchi, nu kurfo jira, aka AABBO Waaqa keennati deebinu.

¹⁹Nu siraa gorre ammo eege siti deebiu feene, eegi atini nu gorsite nu qajeelchite, nu aka male ch'eere lafa lalale; wonti akanatiifi nu gaafa ijoolle ch'ubbu hojanne.

²⁰Ee Efraimu atini ilma kiyya dansa anini guddo jaalad'uniti? Anini yo maqa kanke d'au ch'ufa, aka si jaalad'u qaabad'a garaani kiyya sii d'arae, sii naha.

²¹Akheekha kara isani garsiisu mid'aasa, kara duri isani gula yaatani qaabad'a. Ee worra Israeli kaa gala, dira duri lakiftaniti dachaa.

²²Worra d'ugefacha inqamne kana, isani haga yoomi garaa lama qabaachu lakiftani? Anini yayu waan takaa inargini lafaani d'ufe — nami d'iira harka nama uwati bula.

²³AABBO Waaqi, guddaani Israeli, waan jed'u, Gaafa anini gumi tana lafa isiiti deebisu, isiini deebiteti lafa Yudatifi dira isii keesati waan jettu, AABBO Waaqi gaara qulqullo Yerusalemu fulla inni tau eebisinna.

²⁴Nami lafa Yudatifi dira isii ch'ufa keesa tae, nami oobru qotufi ka ree tissuleeni woliini taa.

²⁵Anini nama dad'abi qabu hafuura baase, nama beelti ijeefte sagale quubsa.

²⁶Duuba gaafasi nami, Anini rafe, ka dad'abi inqamne lafaa kae jed'a.

²⁷Anini, AABBO Waaqi, waan jed'u, Guyyaani ind'ufa, ka anini lafa Israelitiifi ta Yudale namaafi saani guutu.

²⁸Ammalle akuma duri anumani aka mukha worra buqise qaarise, garagalche, bulleese butuche, akasuma anini amma tana aka mukhaa worra oobre, aka mana jaara.

²⁹Hojja guyyaani sunini gahu nami deebie, Abbootini mid'aani zabibu kurao nyaate, ammo ilmaani ilkaani diilalaani injed'u.

³⁰Ammo nami ch'ufti daba isatini dua, ammalle nami zabibu kurooftu nyaatu ilkaanti diilalaa.

³¹ AABBO Waaqi waan jed'u, Guyyaani ind'ufa, ka anini wold'aqisa haraa worra Israelitiifi ka Yuda woliini tolfad'u.

³²Wold'aqisi sunini wold'aqisa duri anini ababoota worraa gaafa anini harka kiyyaani worra fuud'e lafa Misiri keesaa baase woliini tolfad'eeni takaaniti. Ato anini d'iirsa worra fakaad'ele, worri wold'aqisa suni injabeesine.

³³Wold'aqisi haraai anini worra Israeli woliini tolfad'u kana; anini seera kiyya qalbi worra keesa kaye, garaa worraa keesati t'aafa. Anini Waaqa worraa tahe, worrileeni gumi tiyya taha.

³⁴Nami tokoleeni deebie nama gosa isaa yokhaani oboleesa isatini, AABBO Waaqa beekhi jed'e, imbarsiisu; wonti akanatiifi worri ch'ufti, diqaafi guddaleeni, na beekha. Anini daba worraa araarameefi ch'ubbu worraale deebie inqaabad'u. Nami dubbi tana jed'e ana, AABBO Waaqa.

³⁵AABBO Waaqi adu ifsa guyya tolche, halkani jiaafi urji ifsaa tolcha. Inni baariini chochoose roraasa; maqaani isaa AABBO Waaqa gudda.

³⁶Inni waan jed'u, Haga lafafi gubbaani jirtu, Israeliini gosuma taati.

³⁷Yo sila guyya toko ballinna gubbaa biimani, yayaba lafale dandaani, laalani, yo suni ch'alla anini gumi Israeli maro huji worraatifi dida. Nami dubbi tana jed'e ana, AABBO Waaqa.

³⁸AABBO Waaqi waan jed'u, Guyyaani ind'ufa, ka dira Yerusalemu ch'ufa deebiani naa jaarani, haguma doofi Hananeliti iti keeyatani Fullo mogaati d'aabani.

³⁹Biimani isaa arti baate, ila aduu qajeelte, gaara Garebuti ejite, ammalle Goati deebite.

⁴⁰Bale reefa iti awaalani huura iti jissani ch'ufafi oobru galaana Kidroni gubbale haga Fullo Farda, ta ilaboru ch'ufa, naa jed'ani, qulqulleesani olkayani. Dira suni deebiani ch'absani imballeesani.