Read BORANA BIBLE – KITAABA WAAQA Yeremia 51 Bible Online

Yeremia 51 - BORANA BIBLE – KITAABA WAAQA bible

Yeremia 51

¹AABBO Waaqi waan jed'u, Anini bubbe woi balleesitu lafa Babilonitifi worra isiitiini d'ufa.

²Anini nama gosa d'ibi, ka aka bubbeeni bua buuyo fuutu, Babiloni fuud'e balleesu, iti erga. Hojja guyyaani badi sunini d'ufu, worri moga ch'ufaani had'e lafa duwa tolcha.

³Askarti worraa t'iya darbachu d'owa, miha lolaale keeyachu d'owa. Kaima inhambisina, duula worraa ch'ufa hobaasa!

⁴Worri mamadae, kara dira keesati hobaa.

⁵Anini AABBO Waaqi guddaani worra Israelitiifi ka Yuda illakimne, Ato worri, ana qulqullo Israeliti ch'ubbamele.

⁶Babiloni keesaa baqad'a, lubbu teesani baasa! Maro ch'ubbu Babilonitifi induina. Anini amma haalo baafad'e, akuma isii male gaargalchuu jira.

⁷Babilonini muduunu worqi, ta harka kiyya keesa jirtu, ta lafa ch'ufa macheesitu. Gochiti ch'ufti daad'i isi d'udde maraati.

⁸Diri Babiloni tassa jige bade! Bohafi! Maddaa isaa qorsa iti barbaada, hegeri infayyiti.

⁹Nami gosa d'ibi ka achi tau waan jed'u, nu dira Babiloni qarqaaru feene, ammo wonti sunini ya dabarte. Koota, amma lakimne kaane biraa galla. Waaqi yayu Babiloni irre isaa ch'ufaani gaargalche aka male balleese.

¹⁰AABBO Waaqi waan jed'u, gumiini tiyya lalabde waan jettu, AABBO Waaqi yayu d'uga nuu galche, koota, worra Yerusalemu d'anne, waan Waaqi keenna nuu tolche iti himna.

¹¹AABBO Waaqi yayu hayyoota Medi kaase, waan inni Babiloni balleesu fed'ufi. Aki inni waan worri mana isani qulqullo balleesefi haalo baafatu akasi. Worri lafa had'u waan jed'u. T'iya teesani qarad'a! Wonte teesani kurfeesa!

¹²Akheekha naabo Babilonitini ch'absitani garsiisa! Nama lafa eegu heddeesa! Nama lafa tissu tolfad'a! Nama woi gaadu kurfeesa! AABBO Waaqi waan worra Babiloni, Intolcha jed'e ya tolche.

¹³Lafti suni galaanafi hori gudda qabdi, ammo guyyaani isii ya alaa hobae, isiini ya badu geete.

¹⁴AABBO Waaqi guddaani maqa ufiitini kakhate waan jed'e, Anini duula guddaani d'ufa ka aka awaanisa d'ufe isani had'e dabsate, geerara galu.

¹⁵AABBO Waaqi jabeenna ufitini lafa uume; qarooma ufitini mid'aase, gubbale ballise;

¹⁶jecha isatini bisaaleeni gubba dibbisani, duumansileeni muumme lafale d'ufe. Inni bokaya keesa angae, bubbele goda isii keesaa gayaase.

¹⁷Nami waan kana arge ch'ufti, daalle woma imbeenne ufi sehe; nami waan harkaani boch'ani kad'atuleeni, maro wonti worri kad'atu suni waan d'ara, ka lubbu inqamne taateefi waan tahu wollaale ufi d'aareefata.

¹⁸Wonti worri mid'aasu sunini waan woma keesa jiraatiniti, waan tufatani miid'u malani; guyya Waaqi qorsumaa d'ufu, imballeesani.

¹⁹Waaqi Yakobo waaqa akasi suniniti isumati waan ch'ufa uume Israeli fohate gumi ufi tolfate. Maqaani isa AABBO Waaqa gudda.

²⁰AABBO Waaqi waan jed'u, Babiloni atini burrisa kiyya, miha kiyya ka lola ka anini namaani had'u, anini siini lafafi namale balleese,

²¹fardoole nama yaabatule hobaase, gaari fardi hirkisufi nama oofule balleese.

²²D'iirafi nad'eenile fit'e, jaarsafi kaimale hobaase, ijoolle d'iiratifi ta dubrale gate.

²³Ammalle tissitufi reele qaqale, worra lafa qotufi fardoole worrale gogorae, nama lafa mohatufi jaarole gugurdole hobaasa.

²⁴AABBO Waaqi waan jed'u, Isani inagartani waan anini Babilonifi, nama isii tolchu, maro waan hamtu worri Yerusalemu tolcheefi.

²⁵Babiloni, atini gaara lafa ch'ufa balleesu fakaata, ammo ato akasi taatele, anini, AABBO Waaqi, nyaapa keeti. Anini si qabe, si ch'ach'abse, sii bulleese daara si tolcha.

²⁶Deebiani d'akha ona keetile manani injaarani. Atini haga jiru jireenna lafa aloo taata. Nami dubbi suni jed'e ana, AABBO Waaqa.

²⁷Akheekha diraani haatani garsiisa! Magalata aka gochiti ch'ufti d'ageetu d'aa. Gosa ch'ufa had'iisa Babiloniti kurfeesa! Worra lafa Araratitifi Minitifi ka Ashkenazitini, Had'a jed'a. Worra suni abba duula iti tolcha. Fardoole aka tuuta awaanisaa gabaasa.

²⁸Gosa ch'ufa had'iisa Babiloniti kurfeesa, hayyoota Meditifi jaaroleefi jara worraa gugurdafi askarti lafa worri mohatu keesa jirtule woliini baasa.

²⁹Waan AABBO Waaqi aka Babiloni balleese ona nami keesa inteenne tolchu malateefi, lafti hollatte chochoote.

³⁰Askartini Babiloni yayu had'iisa lakifte maneeni worraa jajabduti hafte. Worri ya ufi jibbaate waan tahu wollaale, irre d'abe, nad'eeni fakaate. Ch'ufana fullo dira ya ch'ach'absani, maneenile ch'ufa ibida iti kayani.

³¹Nami qonqo iyyanna woluma duubani d'ufe waan hayyu Babilonitini jed'u, Nyaapi ya dira kanke moga ch'ufaani d'ufe iti ch'abse had'e.

³²Ammalle nyaapi yayu malka galaana qabate, maneeni jajabdu taanile ibida iti naqe, askarti tante mudamsiise.

³³D'iotu nyaapa worra ch'ire akuma mid'aani oobdi keesati d'aanani ira ejaanjata. Nami dubbi tana jed'e ana, AABBO Waaqa gudda, Waaqa Israeli.

³⁴Hayyuuni Babiloni dira Yerusalemu had'e, nama isaa nyaate fit'e, akuma okhole aanani fooqise, akuma gorjama liqimse, waan fed'u ch'ufa fud'ate, ka iraa hafele ch'ufa gadigate.

³⁵Worri Sioni ha akana jed'u: D'iigi keenna gubbaa worra Babiloni ha tahu. Worri Yerusalemuleeni akana ha jed'u, gaargali keenna worra Babiloni ha qabatu.

³⁶Tanaafi AABBO Waaqi waan worra Yerusalemutini jed'e, Anini d'iba keesani ya arge, amma isanii dubbad'e, nyaapa keesanile haalo isanii baasa. Anini madda bisaani Babiloni gosse galaana worraale kuta.

³⁷Lafti sunini badde, ona bineensi ala iti galu ka ilti namaa jibbitu taati. Nami tokoleeni ka iti galu injiru, nami arguleeni nahe mudama.

³⁸Worri Babiloni ch'ufti akuma nyeench'a itane, akuma kuble nyeench'a gururia.

³⁹Worri sabdii? Yoosi anini jila worraa tolche, sagale d'aabeefi macheese gammachiisa. Duuba worri d'aqe rafa itumaa deebie lafaa inkau.

⁴⁰Anini worra qalmati geesa, aka ilmaani hoolatifi laleesafi Elemiye. Nami dubbi tana jed'e ana, AABBO Waaqa.

⁴¹AABBO Waaqi waan Babiloni dubbate waan jed'e, Dira gochiti lafa keesa jirti ch'ufti duri faarsite ya had'ani qabani! Babilonini akami waan ilti gosa ch'ufa jibbitu taate!

⁴²Bisaani baariini yayu Babiloni gubbati fach'aani, d'awani isaanileeni isii ira deebite mullachu d'owarte.

⁴³Diri isiileeni yayu bade, ona bisaani inqamne ka nami keesa injirre yokhaani ka keesale imbaane tahe.

⁴⁴Anini waaqa Babiloni ka Beli, jed'ani balleese waan inni saame guurate ch'ufa iraa buuse, aka gochiti tokoleeni deebite isa iyyaamanne tolcha. Naaboni Babiloni ya ch'ach'abt'e.

⁴⁵Gumi Israeli, arti baqad'a! Dallansu tiyya hamtu duraa baqad'a, lubbu ufi baasa.

⁴⁶Waan d'ageetani kana jettani, garaa laaftani insodaatina. Ganna ch'ufa woma hareeti d'ageetani — odu had'iisa lafatifi aka hayyooti lafa lafaani woli haatu.

⁴⁷Duuba amma hojaani ya geete, ta anini waaqoota Babiloni, ta d'ara, balleese, lafa ch'ufa ch'eerse nama ch'ufa hobaasu.

⁴⁸Wonti lafafi gubba jira ch'ufti gammade qilit'amti; hojja worri mirgaa d'ufu Babiloni dabsate balleesu.

⁴⁹Babilonini, waan duri lafa ch'ufa keesa nama hobaafteefi, ammo isiileeni badu malte, ammalle maro nama Israeli heddu hobaafteefi balleesu malani. Nami dubbi tana jed'e ana, AABBO Waaqa.

⁵⁰AABBO Waaqi waan gumi isaa ta Babiloni jirtuuni jed'e. Isani ya lubbu duraa baatani! Woma ineegina, amma kaa, yaa! Ato isani worra keesani ira fago jiraatanile, ana AABBO Waaqafi Yerusalemu qaabad'a.

⁵¹Isani waan jettani, yayu nu arabsani, nu ch'eersani lafaa nu balleesani waan nyaapi fulla qulqullo mana Waaqa keesaa jirtu ch'ufa fud'ateefi nu qarqaarsa d'amne.

⁵²Tanaafi waan anini jed'u, Guyyaani ind'ufa, ka anini waan harkaani boch'ani, ka worri Babiloni kad'atu, ch'ufa balleese nami madaleeni ch'ufti lafa suni keesa waachaa yau.

⁵³Ato Babilonini gubba yaabatte achiti mana jajaba jaarattele, anini inuma nama isi balleesu iti erga. Nami dubbi tana jed'e ana, AABBO Waaqa.

⁵⁴AABBO Waaqi waan jed'u, Waan lafa Babiloni balleesanifi, aka nami bahe iyyu d'agaya.

⁵⁵Anini Babiloni balleese, iyyanna isii ch'allisisa. Duuli nyaapaa akuma d'awa baariini worrati baafate, aka male iyye worra had'a.

⁵⁶Worri ya Babiloni balleesu d'ufe; askarti isii yayu qabani guube worrale ch'ach'absani. Anini Waaqa waan hamtu balleesu, tanaafi Babiloni waan isii male tolchaafi.

⁵⁷Anini nama isii mohatu, jara qaqaroofi jaaroleefi askarti worraale ch'ufa farso iti guure macheesa, worri d'aqe rafa, itumaa deebie lafaa inkau. Nami dubbi tana jed'e ana hayyicha AABBO Waaqa gudda.

⁵⁸Naabo jabdu Babiloni butuchani, ch'ufana fullo isii gugurda kaanile gubani, akasiini wonti ch'ufti gubate, hujiini duri gochiti hedduuni hojate taani lafati badi. Nami dubbi tana jed'e ana, AABBO Waaqa gudda.

⁵⁹Serayani, ilmi Neria, ka ilma Maaseya, makala hayyu Sedekia. Duuba ganna afreeso ka Sedekiani lafa Yuda mohate, ka Serayani isa woliini Babiloni deemuu jiru, anini dubbi woi iti d'aame.

⁶⁰Anini badi Babiloniti gad'uftufi waan Babilonini taatu d'ibile kitaaba keesati t'aafe.

⁶¹Anini waan Serayani jed'e, Yoyu Babilonini baate, waan kitaaba kana keesa jira ch'ufa lalabi, biyyaa soomi.

⁶²Duuba Waaqa kad'ad'i, waan jettu, Ee AABBO Waaqa, atini qara, anini fulla tana imballeesa jette, aka wonti lubbu qaba, namaafi bineensale taanaani iti ingalle, ammo haga jiru jireenna ona taatu.

⁶³Seraya, duuba yo kitaaba kana biyyaa soomte hobaafte, d'akhati hid'i, galaana Frati keesa buusi.

⁶⁴Waan jettu, Tunini waan Babiloniti d'ufaati — isiini akana lit'i, deebite oli imbaatu waan AABBO Waaqi badi itiini d'ufufi, isiini akasi taati. Dubbini Yeremia asi buufatti.