Read BORANA BIBLE – KITAABA WAAQA Ezekieli 28 Bible Online

Ezekieli 28 - BORANA BIBLE – KITAABA WAAQA bible

Ezekieli 28

¹AABBO Waaqi na yaame waan nani jed'e,

²Namicha, waan atini hayyu Tirotini jettu, Atini ufi guddifte, kiyyibde keesa dabarte, waaqa ufiini jette. Ammalle atini, Anini waaqa ka barch'uma guddinna ira jiddu baariini tau jetta. Ato waaqa ufi tolchitele atini waaqaniti, namuma.

³Atini waan Danieli ira qaro ufi seeta waan wonti tokoleeni dandeete si duraa d'okhatu inseetu.

⁴Qaroomafi beekhi kanke worqifi qarsiini si duroomse.

⁵Atini daldala keesa jabaatte, akasiini guddo woi horatte, duuba hori sunini kiyyibde!

⁶Duuba amma wonti AABBO Waaqi guddaani jed'u tana: waan atini qaro aka Waaqa ufi seetufi,

⁷anini nyaapa naasu inqamne si haasise, worri hori kanke dansa ka atini beekhafi qaroomani horatte siraa balleesa.

⁸Worri si ijeese boola bisaani keesati si awaala.

⁹Yo worri si ijeesu d'ufu, atini hojja sunile Waaquma ufiini jetta? Atini Waaqaniti, namuma, yo si ijeesu d'ufani inuma doota.

¹⁰Atini akuma sare harka worra Waaqa imbeennetini doota. Nami waan kana jed'e ana, AABBO Waaqa gudda.

¹¹AABBO Waaqi na yaame waan nani jed'e,

¹²Namicha, dira Tiro faarsi bohi waan jettuuni AABBO Waaqi guddaani waan jed'u, Atini duri nama d'ugaa qajeela, ka nama ch'ufaa akheekha dansaa tae. Ee, atini akami qaro, ammalle akami mid'aada!

¹³Atini oobru Waaqa ta Edeni keesa qubatte, faaya ch'uch'uluqa gosa heddu naqate: d'akha diima, d'akha adi ch'ulkicha, d'akha baricha, d'akha doti, ch'abbi ch'ululut'u d'akha ch'ulkicha, d'akha bule ch'ulkicha aka dulo dooqa, d'akha doti, d'akha diima d'iiga. Atini ammalle faaya worqi inqabda faaya kana ch'ufa, gaafa si uumani, sii mid'aasani.

¹⁴Anini malaika nama mudamsiiftu ta si eeddu d'aatu te kaye. Atini gaara kiyya qulqullo gubbaa qubatte, d'akhaye ch'uch'ulut'u ira deemte.

¹⁵Haga si uumani asi, haga ch'ubbuuni si inqabatini, adabi kanke dansa.

¹⁶Atini guddo daldalte duuba wonti sunini had'iisafi ch'ubbu keesa si buufte. Tanaafi anini gaara kiyya qulqullo iraa si had'e, malaikaani si eeddu taanileeni d'akhaye ch'uch'ulut'u taani biraa si gussite.

¹⁷Atini mid'aguma tanteetiini ufi koorsite, guddinni kanke mata si d'owe si daallese. Maro waan kanatifi anini darbaad'e lafa si buuse, aka hayyooti d'ibiini yo waan si tolchani kana gartu sodaatu.

¹⁸Atini daldala kara dabatini tolchite, akanaani fulla Waaqa iti kad'atule t'ureesite. Tanaafi anini amma dira kanke ibida iti kaye gube balleesa. Nami amma d'ufe si laalu daara male woma inargu.

¹⁹Atini yayu badde! Deebiani si inargani, ammalle gochiti ch'ufti ta fuula si beetuleeni rifate, waan wonti sunini worra qabatu seete mudamti.

²⁰AABBO Waaqi na yaame waan nani jed'e,

²¹Namicha, dira Sidoni abaari

²²waan jettuuni, wonti AABBO Waaqi guddaani jed'u tana: Ee Sidoni, anini yayu nyaapa siti tae, biyyitileeni waan anini si tolchu kana gula na faarsiti. Ammalle hojja anini nama si keesa tau gaargalchu qulqullooma tiyya argani, akanaani aka anini AABBO Waaqa beekhani.

²³Anini d'ukuba siti erge, kara kanke ch'ufa keesati d'iiga lolaasa. Gama ch'ufa si had'ani, nama kanke ch'ufa fit'ani, duuba akanaani aka anini AABBO Waaqa beeta.

²⁴AABBO Waaqi waan jed'e, Gochiti d'aatu Israeli jirtu, ta worra tufate, deebite gufufi qoraati worrati intaatu. Duuba akanaani worri aka anini AABBO Waaqa gudda beekha.

²⁵Wonti AABBO Waaqi guddaani jed'u tana: Anini worra Israeli gosa qara worra keesati firfirse keesaa galcha. Duuba akanaani gochiti ch'ufti aka anini qulqullo beeti. Ammalle worri Israeli lafuma ufi ta anini hojatu tiyya Yakoboo kenne keesa qubate,

²⁶nagayaani tae mana jaarate zabibu oobrata. Anini nama gosa d'ibi ka worra tufate kaani gaargalche akanaani worri Israeli soda male nagayaani taa. Duuba worri akasiini aka anini AABBO Waaqa isaani beekha.