Read BORANA BIBLE – KITAABA WAAQA Ezekieli 40 Bible Online

Ezekieli 40 - BORANA BIBLE – KITAABA WAAQA bible

Ezekieli 40

¹Guyya kud'anneeso, ka jia qara, ka ganna diddami shaneeso ka nu haga nu boojiani teenne, ka ammalle Yerusalemuni haga qabani ganna kud'ani afuri teete, guyyuma suni jabeenni AABBO Waaqa nati d'ufe, fuud'e

²daayya keesa lafa Israeli na geese gaara d'eera ira na d'aabe. Anini ufi durati maneeni heddu dira fakaatu arge.

³Inni maneeni sunitini na d'iannaani, anini nama aka sibiila diima bibiliqu arge. Inni haada horogeetiifi ule woini biimani harkati qabate, balbala mana toko keesa eja.

⁴Duuba namichi suni waan nani jed'e, Namicha laali, ch'aqasi, waan anini si agarsiisu kana ch'ufa aka dansaa hubad'i. Wonti armaani si d'ufanifi tana; duuba waan agartu ch'ufa worra Israeliti himi.

⁵Jennaani anini akuma inni baane kaani laale, Mana Waaqa ka naabo d'akhaatini marsani jaarani arge. Namichi ule isaa ta woini biimani ta d'eerinni isii d'und'uma jaa, fuud'e, naabo suni biime. Naabo suni d'eerinni isii ule toko furdinnileeni ule toko.

⁶Jennaani inni ammalle fullo ilaboruti fuula deebitu taani d'aqe, faano gula iti olikore, gubba geennaani inni balbala suni biime, biimani furdinna mikhikila balbala suni ule toko tae.

⁷Balbala suni, yo keesa seenani oldabrani, mirgaa bita d'iibu saditi jira, ka nami woi eegu keesa ejaanju. D'iibu suni ch'ufa d'eerinnafi ballinnileeni d'und'uma jaa jaa. D'iibu suni ch'ufa, kutaani isi jiddu, d'und'uma shani. D'iibu keesati woi eegani, yo ejata sadi dabrani, mana Mana Waaqati fuula deefatu tokooni bahani.

⁸Inni mana suni biime jennaani mani sunini d'und'uma saddeeti tae. Mana sunifi fullooni Mana Waaqati d'iaatu taani wolti ejiti, furdinni girgida isaa ka Mana Waaqati aanuleeni d'und'uma lama.

⁹

¹⁰(D'iibuni keesaa woi eegani tunini ta balbala qara seenaniini taani mirgaa bita jirtu ch'ufti haguma taka, kuta jiddu d'iibu suni jirtule ch'ufa furdinni isii haguma taka.)

¹¹Eegi suni namichi kaani ballina kara d'ibu taani jiddu jiru biime, biimani isaa d'und'uma kud'ani sadi taate, ammalle balbala olinisenanile biime, biimani isii d'und'uma kud'ani taate.

¹²D'iibu keesati woi eegani taani ch'ufa dura kuta gagabaabdu, d'eerinnafi furdinni isii d'und'uma tokoti jira. (D'iibu suni ch'ufa, biimani isii d'eerinnafi furdinnileeni d'und'uma jaa jaa.)

¹³Jennaani inni d'iibu mirgaafi bitaatifi kara jiddu deemule wolti biime, d'eerinni isi d'und'uma diddami shani tae.

¹⁴Mana suni hojja moga tanaani seenani dinqa moga taanitini keesaa bahani ch'icha ballo tokoti bahani. Inni ballina dinqa suni biime, biimani isaa d'und'uma diddama taate.

¹⁵Karaani jiddu mana suni keesa deemu haguma balbala moga tanaati eje, balabala moga taaniti eja, d'eerinni isaa d'und'uma shantama.

¹⁶D'iibufi dinqi mana suni ch'ufti boro duubani deresha qaba. Kutani d'iibu taani jiddu jirtu ch'ufti gole qabdi. Kuta garaa keesa moga karaati aantu, waan aka meet'i jira, ta irati boch'ani barreesani.

¹⁷Namichi kaani balbala dinqa taani keesani na bahe fulla, naabotini na d'ufe. Ammalle mana sodoma naabo suni moga alaatini iti mat'ansani jaarani. Maneeni suni dura d'akha qarrisani naqani,

¹⁸naabo suni ch'ufaani marsani. Naaboni alaa tunini gabaabate naabo garaa keesa jalaa buuti.

¹⁹Ammalle balbala iti olkoraniti jira, ta naabo garaa keesatini seenani: Namichi kaani balbala naabo alaatifi ta naabo keesa jiddu biime, biimani isii d'und'uma d'ibba toko taate.

²⁰Jennaani namichi kaani ammalle fullo mirgaa, ta naabo alaatini seenani biime.

²¹D'iibuni sadeeni eeddoni keesa ejaanjitu taani, ta mirgaa bitaa karaa jirtufi kuta jiddu d'iibu suni ch'ufa jiddu jirtufi dinqale, yo uleeni biimani, biimani waan suni ch'ufti biima fullo ilaborutini qit'e mura. Karaani jiddu mana suni keesa deemu haguma balbala moga tanaati eje, balbala moga taaniti eja, D'eerinni isaa d'und'uma shantama, ballinni d'und'uma diddami shani.

²²Dinqaafi dereshafi meet'ini kuta irati barreesani taanileeni akuma ta fullo ilaboru taani jirti. Fulla suni faano torbati jira, ta balbalatini olkorani, ammalle dinqi kaanileeni naaboti fuula deefata.

²³Yo naabo ala taanaani seenani ta garaa keesati taakani, fullo aka fullo ilaboru taaniti jira. Namichi kaani fullo tana lamaani jiddu biime, biimani isii d'und'uma d'ibba toko taate.

²⁴Jennaani namichi naabo suni moga bitaati na geese achileti fullo d'ibi agarre. Inni fullo sunini biiminaani biimani isiileeni fullo taani d'ibi ch'ufaani woli qit'e taate.

²⁵Maneeni fullo tanaleeni akuma maneeni fullo taani deresha qaqabdi. Karaani jiddu mana suni keesa deemu haguma balbala moga taaniti eje, balbala moga taaniti eja, d'eerinni isaa d'und'uma shantama, ballinni d'und'uma diddami shani.

²⁶Faano torbati jira, ta balbalaani oli korani, ammalle dinqa kaanile naaboti fuula dura jira. Kuta garaa keesa, moga karaati aantu, waan aka meet'i jira, ta irati boch'ani barreesani.

²⁷Ammalle fulloti jira, ta naabo keesatini seenani. Namichi kaani Fullo tana lamaani jiddu biime, biimani isii d'und'uma d'ibba toko taate.

²⁸Namichi kaani ammalle fullo bitatini oli naa seene, naabo keesatini na d'aqe. Inni fullo naabo suni biime, biimani isiileeni qit'uma biima fullo naabo ala taani sadeeni taate.

²⁹D'iibufi dinqaafi kutaani keesa ch'ufti, ta naabo ala taani ch'ufaani wolqit'e. Maneeni fullo tanaleeni deresha qaqabdi. Karaani jiddu mana suni keesa deemuleeni haguma balabala taana eje balbala moga taaniti eja, d'eerinni isaa d'und'uma shantama, ballinni d'und'uma diddami shani.

³⁰

³¹Dinqi isiileeni, naabo alaati fuula deefata, kuta garaa keesa moga karaati aantu, waan aka meet'i irati boch'ani barreesani. Faano saddeetiti jira, ta balbala fullo suninitini oli korani.

³²Namichi ammalle fullo ilaborutini oli naa seene, naabo keesatini na d'aqe. Inni fullo naabo suni biime, biimani isiileeni qit'uma fullo naabo taani taate.

³³D'iibufi dinqaafi kutaani keesaa ch'ufti ta naabo taani ch'ufatini wolqit'e. Wonti kuni ch'ufti dinqaani wolileeni deresha qaqabdi. Karaani jiddu mana suni keesa deemuleeni haguma balbala tana eje balbala moga taaniti eja, d'eerinni isaa d'und'uma shantamati, ballinni d'und'uma diddami shani.

³⁴Dinqi isiileeni naabo alaati fuula deefata. Kuta karaati aantu ch'ufa waan aka meet'i irati boch'ani barreesani. Faano saddeetifi jira, ta balbala fullo sunitini olkorani.

³⁵Jennaani namichi ammalle fullo mirgatini na d'aqe. Inni fullo naabo suni biime, biimani isi qit'uma fullo naabo taani taate.

³⁶Akuma fullo taani, tunileeni d'iibufi kuta barreesanifi dinqaafi deresha gama ch'ufa qabdi. D'eerinni isii d'und'uma shantama, ballinni d'und'uma diddami shani.

³⁷Dinqi isii naabo alaati fuula deefata. Kuta karaati aantu ch'ufa waan aka meet'i irati boch'ani barreesani. Faano saddeetiti jira, ta balbala fullo sunitini oli korani.

³⁸Naabo alaa suni garaa keesa, mana tokoti jira, ka fullo naabo keesa taaniti mat'ansani jaarani. Mani kunini dinqa naabo ala taaniti fuula deefate eja, duuba achiti hori gubani sorio baasani ch'ufa d'iqani.

³⁹Dinqa suni keesa mesa afuriti jira, mesa suni lama lamaani moga moga d'ad'aabani. Mesa kana irati hori sorio qalanifi ka gubani baasanifi ka sorio dabaani ufi iraa baasani baasanifi, hori sorio gati baasani ch'ufa qalani.

⁴⁰Mana suni alaani mesa afuri d'ibi ka mesa kaani afraani fakaatuti jira, ka lama lamaani fullo mirga taani moga moga ejaanju.

⁴¹Mesaani hori sorio suni irati qalani ch'ufti wolti saddeeti: Mesaani afuri dinqa keesa ejaanja, afuri d'ibileeni naabo keesa ejaanja.

⁴²Mesa afuri mana fullo naabo keesa alaani iti mat'ansani jaarani kaani keesa jira; mesa suni afraani d'akha boch'aniini mid'aasani, ammalle hori gubani sorio baasani ira kayani. Mesa kana old'eerinni isaa d'und'uma toko, d'eerinni isaa ka dalalleeni d'und'uma tokofi taaku toko, ballinni gubba isaaleeni d'und'uma tokofi taaku toko. Miha huji soriotiini tolchani ch'ufa mesa kana ira naqani.

⁴³Qota mesa suni ch'ufa waan hohookiti iti naqani, ka ch'ufa d'eerinni taaku toko. Fooni sorio qalani ch'ufa mesa kana ira naqani.

⁴⁴Jennaani inni naabo keesatini na d'ufe. Naabo tana keesa mana lamati jira; toko, ka d'aatu fullo mirga jiru, bita fuula deefata, kaani d'ibileeni ka d'aatu fullo bita jiru, fuula mirga deefata.

⁴⁵Namichi waan nani jed'e, mani bita fuula deefatu kunini ka qaalole Mana Waaqa keesa hojatu.

⁴⁶Ammalle mani mirga fuula deefatu ka qaalole fulla waan sorio irati qalani hojattu. Qaaloleeni tunini ch'ufti nama d'aloota Sadoki. Gosa Lawi keesa worra ch'allati dandae fulla AABBO Waaqa sorio irati baasaniti d'iaate isaa hojata.

⁴⁷Namichi kaani naabo garaa keesa biime, d'eerinni isii d'und'uma d'ibba toko tae, ballinnileeni hagasuma tae, biimani isii ch'ufti wolqit'e. Mani Waaqa gama ila adu eja, isa dura waan sorio irati qalaniti jira.

⁴⁸Jennaani inni balbala bada Mana Waaqatini seenaniini na d'ufe. Inni balbala suni biime: Furdinni mikhikila isii d'und'uma shani tae, ballinni isiileeni d'und'uma kud'ani afuri tae; furdinni girgida isii, ka gama lachu d'und'uma shani.

⁴⁹Bada suni faano itiini olkoraniti jira. Ballinni bada suni d'und'uma kud'ani lama. Bada suni dura utuba lamati moga moga ejaanja.