Read BORANA BIBLE – KITAABA WAAQA Ezekieli 47 Bible Online

Ezekieli 47 - BORANA BIBLE – KITAABA WAAQA bible

Ezekieli 47

¹ Jennaani namichi fulla balbala Mana Waaqati na deebise. Bisaaniti balbala suni jala ilaboru yaa, gara Mani Waaqa fuula deefatu. Bisaani suni Mana Waaqa gama bita jala yaani, waan sorio irati baasani kaani moga bitaa qajeelani.

²Jennaani namichi fullo mirgaatini na bahe, qaye Mana Waaqa keesani na bahe, gara fullo ilaboru fuula deefatu na geese. Bisaani diqo tokoti fullo suni gama bitatini keesaa yau jira.

³Namichi kaani gama ilaboru deeme, ule isaa ta woini biimani taanini d'und'uma kuma toko biime, bisaani suni keesani na deeme. Bisaani sunini kometuti naa ch'iisani.

⁴Jennaani inni d'und'uma kuma toko d'ibi biime, bisaani jilbati naa ch'iisani. Inni ammalle d'und'uma kuma toko d'ibi biiminaani bisaani hid'aanati naa ch'iisani.

⁵Ammalle inni d'und'uma kuma toko d'ibi biiminaani bisaani kaani na dabsatani anini keesa deemu dad'abe. Yo daakhani male dandaani intaakani.

⁶Duuba inni waan nani jed'e, Namicha, waan kana ch'ufa ya garteyu? Jennaani namichi afaani galaana suniti na deebise.

⁷Anini achi geennaani mukeeni heddu, afaani galaana gama ch'ufati baatu, arge.

⁸Inni waan nani jed'e, Bisaani kunini lafa keesa ilaboru yaani, bale Yordaniti gabuani galaana soodaati naqani. Isaani, yo galaana soodatini bahani bisaani kurao kaani jijirani mid'aasani.

⁹Bisaani sunini fulla yaani ch'ufati bineensaafi qurt'umi d'alani. Ammalle bisaani galaana soodale mid'aasani, fulla yaani ch'ufati woi jireesani.

¹⁰Maddo Engeditifi maddo Eneglaimu jiddu, nami qurt'umi guura afaani galaana ejaanje, qurt'umi guurate, t'urura ufi afate gossa. Qurt'umi gosa gosa ta muumme inqamneti achi jira, ta akuma galaana gudda keesa jirtu.

¹¹Ammo bisaani ch'affa lafaa keesa ch'iisa, ka d'aatu galaana suni jira, diqole jijirani imid'aasani, artiti booqe sooda taati.

¹² Afaani galaana suni gama lachu mukeeni gosa heddu baate mid'aani namaa baafti. Baali isii haga jiru ingogu ammalle mukeeni tunini haga jirtu mid'aani d'alu illakiftu jia ch'ufa mid'aani baafti, wonti akanatiifi bisaani Mana Waaqa keesaa yaa kaaniti iti yaa. Mid'aani mukha suni sagale namaa tahani Baali isaaleeni qorsa namaa taha.

¹³AABBO Waaqi guddaani waan jed'e, kunini seera lafaa ka gosa kud'ani lamaati gargari qoodani, ka gochiti Yusufu lamaanileeni qooda ufi lamaani argata.

¹⁴Anini duri ababoota teesani kakhad'e, amma tana wolqit'eti qoodad'a.

¹⁵Seeri mirga Baariini Gudda iraa bahe, ilaboru qajeele, dira Hethlonitifi kara Hamathitifi dira Sedaadatifi

¹⁶dira Berothatifi ka Sibraimu keesa bahe dabra. (Diri lamaani kunini jiddu lafa Damaskitifi ta Hamathi jira.) Ammalle seeri sunini dira Tikoni (ka d'aatu seera Haurani jiruti eje).

¹⁷Duuba akanaani seeri lafa suni, ka moga mirga Baariini Gudda iraa bahe, dira Enoniti qajeela, ammalle lafti d'aatu seera suni gama mirgaatini jirtu Damaskifi Hamathi.

¹⁸Seeri lafa suni ka ilaboru lafa toko ta jiddu Damaskitifi ta Haurani iraa bahe bita qajeela. Duuba seeri sunini galaana Yordani gula deema; lafti Israeli gama ila aduti hafte, ta Gileadi ilaboruti hafti seeri sunini deemuma deeme, dira Tamari, ka d'aatu galaana soodati, eja.

¹⁹Seeri lafa suni, ka moga bita, Tamari iraa bahe, maddo Kaderiti qajeele, laga seera Misiri ira bahu gula deeme, Baariini Guddaani baha.

²⁰Seeri lafa suni, ka moga ilaadu, Baariini Gudda iraa bahe mirga qajeele, kara Hamathitini moga ila aduti eja.

²¹Lafa tana gosa teesani ta Israeliti gargari qooda.

²²Isiini haga jiru jireenna teesani taati. Nami gosa d'ibi ka isani woliini godaanu, ka ilmaani isani asi d'alateleeni, hojja isani lafa qoodattani worrileeni qooda lafaa argachu male. Worra suni akuma worra Israeliti hereguu malani, duuba worrileeni worra Israeli woliini hit'a buufate, qooda lafa argachuu male.

²³Nami gosa d'ibi, ka gosa Israeli keesa godaanu, ha worra woliini godaanu suni woliini qooda lafaa argatuti. Nami dubbi tana jed'e ana, AABBO Waaqa gudda.