Read BORANA BIBLE – KITAABA WAAQA Danieli 11 Bible Online

Danieli 11 - BORANA BIBLE – KITAABA WAAQA bible

Danieli 11

¹Nami na kalche na qorqoratu isuma.

²Tanaafi wonti anini amma siti himu kunini dubbi d'ugaati. Malaikaani waan jette, Hayyoota sadi d'ibiti lafa Ajemi mohata; ka afreeso ka kaani ch'ufa ira dureesa, eege d'ufa. Gaafa inni guddo wo horate gurra baafate, inni lafa Grikitiini morke nama ch'ufa iti kaasa.

³Duuba eege hayyichi jabaani toko d'ufe, lafa ballo guddo mohate waan fed'u taha.

⁴Eegi inni irre guddo horate, lafti inni mohatu suni irre d'abde, fulla afuriti gargari qoodamte baddi. Hayyoota d'aloota isaa intahiniti d'ufe lafa mohata, ammo worri irre aka inni qabu taani inqabu.

⁵Hayyuuni lafa bitaa jaba taha, ammo jari isaa gugurdaani nami toko isale ch'aale lafa ta isale ira guddole mohata.

⁶Eegi ganna heddu, hayyichi lafa bitaa hayyicha lafa mirgaatini wold'aqani, dubra isaa iti gurgura: Ammo wold'aqisi worraa suni inturu, intala sunifi d'iirsa isiitiifi ilmeeni isiini d'alteefi hojattuuni isii baasanile ch'ufa fit'ani.

⁷Eegi bulti diqo nami fiit'a isii toko hayyu taha. Inni askarti hayyu lafa mirga had'e, dira worra jajaba seene worra dabsata.

⁸Inni akheekha waaqa worraatifi miha worqifi qarsi ka waaqa sunii kennani boojie lafa Misiritiini gala. Eegi lafti ganna heddu nagaya horatte

⁹hayyuuni mirga kaani d'ufe isa had'a, ammo taatule hayyu suni dabsatani lafa Isati galchani.

¹⁰Ilmaani hayyu lafa mirgaa duula gudda kaafte lola kurfefatti duuba duuli suni d'ufe aka lolaa worrati fach'ae, dira worraa jajaba ch'ufa had'a.

¹¹Hayyuuni lafa bitaa dallane, hayyu lafa mirgaa had'e duula isa gudda kaani dabsate.

¹²Inni waan duula suni dabsate nama heddu fit'eefi koora, ammo eegi suni deebie woma indabsatu.

¹³Hayyichi lafa mirgaa deebie duula haga duri kaanile ira jiru kaasa. Gaafa guyyaani gahe, inni duula gudda muumme inqamne, ka miha lola ch'ufa qabuuni deebia.

¹⁴Jennaani nami hedduuni garagale finna hayyu lafa bitaa dida. Ammalle nami gosa teeti ee Danieli jajallaani, maro daayya argeefi garagale finna jalati bulu didda, ammo taatule worra inuma dabsatani.

¹⁵Duuba hayyuuni lafa mirga kaani d'ufe dira jabeesani jaarani toko marse had'e qaba. Askartini lafa bita nyaapa ufiraa d'owu dad'abdi, askartini worraa jajannileeni ch'ufti humna d'aabdi.

¹⁶Nyaapi mirgaa d'ufu kaani waan fed'u worra tolcha, nami dandae d'owu injiru. Nyaapi suni lafa gabbo d'ufe waan fed'u keesati tolcha.

¹⁷Hayyichi lafa mirgaa duula kaase, nyaapa suni had'u d'ufa. Duuba aka lafa nyaapa suni balleesu, inni goli worraa tahe intala ufi nyaapa suniti gurgura; ammo mali isaa suni intahu.

¹⁸Eegi suni inni gosa afaani baariini teetu had'e heddu dabsata. Ammo namichi abba duula ka lafa d'ibi isa dabsate, kiyyiba isaa suni iraa kuta; d'uguma inni kiyyiba hayyu lafa mirgaa isumati deebisa.

¹⁹Hayyichi kaani dira jajaba lafa isati deebie, ammo isa inuma dabsatani, muummeeni isaleeni sunuma.

²⁰Fulla isaa nama d'ibi ka hojatu ufi erge biyya dabse damoosa iraa guuruti d'ufe hayyu taa, aka akanaani lafa ufi dureeti tolchu. Bulti gabaabduti hayyu suni ijeesani, ammo taatule isa gumi keesafi had'iisa keesaleti inijeesani.

²¹Ammalle malaikaani waan jette: Fulla isaa namicha hama toko ka huji sunii immaliniti hayyu taha; ammo inni tassa d'ufe kara sobaatini guddinna suni fud'ata.

²²Nama isa didu, ato inni qaallicha Waaqa guddale teete, lafa iraa balleesani qile boola buusani.

²³Inni gosa d'ibi sobe, akasiini goli woli tahani, ammalle ato inni gosa diqo mohatele kara sunini guddo jabaata.

²⁴Inni tassa d'ufe, lafa dureeti had'e, waan ababooti isaa takaa intolchini tolcha. Duuba waan lola keesati boojie ch'ufa jara isaatini gargari qoodata. Inni mala d'aate dira jajaba had'a, ammo guyyaani isa ingababata.

²⁵Inni garaa jabaate duula gudda kaase hayyu lafa bitaa had'a. Hayyuuni lafa sunileeni kurfefate, duula jaba toko kaase isale had'a; ammo ha taatu inni maro mala iti d'awatanifi dandae indabsatu.

²⁶Namuma isaa woliini golofataniti isa balleese, duula isaa nama heddu hobaasani dabsatani.

²⁷Duuba hayyoota taani lamaani ta garaani worraa wolballeesu fed'u, mesa takaa ira woliini teteete wolti kiyyibdi. Ammo waan tahu fed'ani inargatani, wonti akanatiifi guyyaani wonti sunini taatu ingeenne.

²⁸Hayyichi lafa mirgaa ka wold'aqisa Waaqa qulqullo balleesu fed'u, waan boojie ch'ufaani galata. Inni waan fed'u tolche, duuba lafa ufiti deebia.

²⁹Eegi suni inni ammalle lafa bitaa suni d'ufe had'a, ammo marooni tunini aka d'ibi taati.

³⁰Hobolooni lafa Kitimuti d'ufte isa haate mudamsiifti. Duuba inni dallane garagale wold'aqisa qulqullo balleesu fed'a. Inni mala worra wold'aqisa qulqullo ch'absu gula deema.

³¹Askartini isaa hagi toko d'ufte Mana Waaqa t'ureesite, sorio guyya ch'ufa baasani d'owarte waan hamtu nama rifachiisa kaani old'aabdi.

³²Kara sobaatini hayyichi worra wold'aqisa ch'abse suni gama ufi deebisa, ammo worri Waaqa beekhu garaa jabaate isa dida.

³³Jaaroleeni qalbi qabdu nama heddu d'ibi barsiifte qalbi kennitifi ammo worra haga toko haga diqa toko, goradeefi ibidaani fit'ani, ka garile miha iraa saamani boojiani.

³⁴Ato nama fit'u jiranu jari Waaqa qarqaarsa diqa toko argata, ato nami gari worra sobe goli worraa tahele.

³⁵Jaarole qalbi qabdu suni haga toko infit'ani, aka akasiini gumi taani qulqulleesani aabo d'owani. Wonti kunini haga muummeeni Waaqi kurfeese d'uftuti halkani guyya inuma taati.

³⁶ Hayyuuni lafa mirgaa waan fed'u tahe, anini waaqa ch'ufa ira jira jed'e ufi guddise, Waaqa guddale aka hama arabse akasiini nama mamsiisa. Inni haga Waaqi dallane badi isatini d'ufuti akasuma taha. Waaqi waan herege suni inuma guuta.

³⁷Hayyichi suni waaqa ababooti isaa kad'atufi waaqa nad'eeni jaalatule yalabaha. Inni waaqa tokole womatu indaru, wonti akanatiifi inni waan waaqa ch'ufa ira jiru ufi seha.

³⁸Ammo waaqi inni guddisu waaqa maneeni jajabdu qorqoratu. Inni waaqa taka ababooti isaa inkad'atiini, worqifi qarsifi d'akhaye ch'uch'ulut'ufi waan dadansa d'ibile ch'ufa baasafi.

³⁹Ammalle jara waaqa d'ibi kad'atu yaame, maneeni jajabdu tana qorqorad'a jed'aani. Inni nama isaa saalfatu guddinna gudda kenne nama heddu mohachise lafale kennaafi.

⁴⁰Gaafa muummeeni geete hayyuuni lafa bitaa d'ufe isa had'e, hayyuuni mirgaleni fardafi gaari fardi hirkisufi hobolooni d'ufe isa ufi ira had'a. Inni akuma bisaani faach'aani, lafa fud'atani lafa heddu fud'ata.

⁴¹Inni lafa gabbole had'e nama kuma heddule hobaasa, ammo lafti Edomutifi ta Moabutifi lafti Hamoni hagi toko duraa baati.

⁴²Gaafa inni lafa suni ch'ufa had'u lafti Misirileeni duraa imbaatu.

⁴³Inni worqifi qarsifi waan dansa lafa Misiri ta olkayani ch'ufa, d'ufe boojia. Ammalle lafa Libiyatifi ta Kushile dabsata.

⁴⁴Duuba qonqooni mirgaafi ilaboruti d'ufte isa mudamsiifte, inni aka hama dallane, d'aqe, nama heddu had'e fit'a.

⁴⁵Inni waaro isaa ta hayyule jiddu baariinitifi gaara Mani Waaqa iraa eju d'ad'aaba. Ammo taatule inni ka wahela inqamne qofuma dua.