Read BORANA BIBLE – KITAABA WAAQA Danieli 3 Bible Online

Danieli 3 - BORANA BIBLE – KITAABA WAAQA bible

Danieli 3

¹Hayyu Nebukadrezani akheekha woi ka worqi, ka d'eerinni isaa d'und'uma jaatama, ka ballinni d'und'uma jaa, mid'aase, lafa Babiloni keesa dira Dura jed'ani keesa old'aabe.

²Jennaani hayyichi hojattu isaa ch'ufa wolti yaame: jara gugurda, jaarole gugurdo makaloota, jara isaa mala d'au, jara beese olkayu, jaallaboota, shumoota, jara gugurda lafa suni ch'ufa. Duuba inni, koota, akheekha woi ka anini old'aabe kana eebisu fed'a jed'e, worra ch'ufa wolti baase.

³Jari gugurdaani suni ch'ufti akheekha suni durati eebaa wolti bahe jennaani,

⁴nami magalata d'au lalabe, biyya yaame waan jed'e, gumi gosa gosa, ta d'aloota d'aloota, ta afaani afaani dubbatu!

⁵Hojja isani magalatafi dibbefi bilbilafi kiraarifi fulludoofi qonqo miha sirba heddu d'ageetani, gajejed'a, akheekha woi, ka worqiini mid'aasani, ka Nebukadrezani mid'aase guddisa.

⁶Nama waan kana ingudisini ch'ufa hojuma suni fuud'ani goola ibida keesa buusani.

⁷Jennaani akuma qonqo miha sirba suni d'agayaanini, nami gosa gosa, ka d'aloota d'aloota, ka afaani afaani dubbatu ch'ufti gajejed'e, akheekha worqiini mid'aasani, ka hayyu Nebukadrezani old'aabe kad'ate.

⁸Jennaani gaafasi jari Babiloni toko ka gosa Yahudi qot'isu hayyu Nebukadrezati d'ufe, worra Yahudi ka seera suni ch'abse hime,

⁹waan jed'eeni, Ee hayyicha, lubbu buli!

¹⁰Atini seera baafte waan jette, Hojja qonqo sirba d'ageetani, nami ch'ufti ha gajed'e, akheekha worqiini mid'aasani kana guddisu;

¹¹ammalle nama gajed'e kad'achu dide ha goola ibida keesa buusaniti jette.

¹²Jari Yahudi, Shadrakafi Meshekifi Abednegoni, ka atini ufiftu huji lafa Babiloni harka worrati kennite, ya seera kanke suni ch'abse. Worri waaqa kanketifi akheekha atini old'aabde durati gajed'e kad'achu dide.

¹³Dubbi suni d'ageennaani hayyichi aka male dallane. Jara suni sadeeni natiini koota jed'e.

¹⁴Worri d'ufe jennaani waan jed'eeni, Shadraka, Mesheki, Abednego, isani d'uguma waaqa kiyyaafi akheekha worqiini mid'aasani ka anini old'aabe kana durati gajettani kad'acha diddani?

¹⁵Amma tana akuma qonqo magalatatiifi ta dibbetifi ta bilbilatifi ta kiraaritifi fulludoofi ta miha sirba d'ibi ch'ufa d'ageetanini gajed'a akheekha suni kad'ad'a; ammo yo kad'achu baatani, hojuma suni goola ibida keesa isani buusani. Waaqa kamiti harka kiyya keesaa dandae isani baasa?

¹⁶Shadrakafi Meshekifi Abednegoni waan jed'aniini, Ee hayyicha, nu dubbi sini jennu d'ibi inqamnu.

¹⁷Yo goola ibida keesa nu buusani, Waaqi keenna, ka nu hojannu, dandae nu baasa, ammalle inuma harka kanke keesa nu baasa, ee hayyicha.

¹⁸Ammo yo inni nu baasule baate, nu waaqa kanketifi akheekha worqiini mid'aasani ka atini old'aabde durati gajenne inkad'annu, beekad'i.

¹⁹Jennaani Nebukadrezani aka male dallane, Shadrakafi Meshekifi Abednegoni fuula yakate, ibida kaani haga qarale ch'ufa ira maro torba goola jed'e.

²⁰Ammalle askarti isaa keesa nama jajaba yaame, worra kana sadeeni hid'a, ibida suni keesa buusa jed'e.

²¹Duuba worra suni hid'aani hid'ani, ka worri ubaarafi hid'aafi kootifi koofia ufira qabu, ibida suni keesa buusani.

²²Waan hayyichi seera jaba baase ibida suni haga qarale ira goola jed'eefi, ibidi suni aka male bobae, jara worra sadeeni kaaniini yaule gube hobaase.

²³Duuba Shadrakafi Meshekifi Abednegoni ka hid'aansa kaani qabani, wod'aka ibida suni keesati jigani.

²⁴Jennaani maro tokotu Nebukadrezani mame olch'ee waan jara ufitini jed'e, Nu nama sadi hiine ibida keesa imbumne? Worri waan jed'eeni, Ee, yayu buumne.

²⁵Inni waan jed'eeni, Anini maanifi nama afuri ka ufumaa ibida keesa yau arga re? Worri hid'ansale inqabu ammalle nafi worraleeni diqole ingubanne namichi afreeso suni, inninu waaqa fakaata.

²⁶Jennaani Nebukadrezani fulla ibida kaani d'ufe, worra kaani yaame waan jed'e Shadraka, Mesheki, Abednego. Hojattu Waaqa gudda, gabaha! Jennaani worri hojuma suni ibida suni keesaa yae.

²⁷Jennaani jara gugurdafi jaarole gugurdofi makalootafi jari hayyu gugurdaani kaani ch'ufti wolti gad'ufe, jara sadeeni kaani ka ibidi gubu dad'abe dawate. Rifeensafi woyaani worraleeni tokoleeni ingubanne nafi worraleeni diqole aara ind'au.

²⁸Hayyichi waan jed'e, Waaqa Shadrakatifi ka Meshekitifi ka Abednego faarsa! Inni malaika isaa erge, jara hojattu isaa ka isa d'ugeefate kana, baase. Worri lubbu ufi jibbaate seera kiyya ch'abse fulla gajed'e Waaqa isaani male waaqa d'ibi kad'atu.

²⁹Anini amma seera baasa: Yo nami gosafi d'alootafi afaani tateefu Waaqa Shadrakatifi ka Meshekitifi ka Abednego tufate arabse, nama suni ha harkaafi miila iraa ch'irani mana isale onsani balleesaniti. Waaqi d'ibiini tokoleeni ka dandae akana nama baasu injiru.

³⁰Jennaani hayyichi Shadrakafi Meshekifi Abednego lafa Babiloni keesa guddinna d'ibi, worri qara inqamne, kenneefi.