Read BORANA BIBLE – KITAABA WAAQA Danieli 4 Bible Online

Danieli 4 - BORANA BIBLE – KITAABA WAAQA bible

Danieli 4

¹Hayyu Nebukadrezani qonqo tana nama gosa ch'ufatiifi ka d'aloota ch'ufatiifi ka afaani afaani dubbatu, ka lafa keesa jiru ch'ufa iti erge bultiini isani nagaya? Nageenni isani bad'aad'a? jed'e nagaya fuud'e.

²Akheekha jabaafi waan mama ka Waaqi guddaani na garsiise ka anini amma isaniti himu ch'aqasa.

³Akheekhi Waaqi na garsiise akami gudda! Wonti mama ka inni tolche akami guddo! Waaqi hayyu haga jiru jireenna ch'ufa jiru; ka ammalle hojja ch'ufa jiru ka ammalle hojja ch'ufa lafa fidu.

⁴Anini ato quufafi gammadaani mana kiyya keesa tau,

⁵oobju na mudamsiiftu oobjad'e, hiriba keesa daayya naa naasiftu arge.

⁶Jennaani nama qaqaro Babiloni ch'ufa wolti yaame, waan oobjuuni suni d'ooftu gaafad'e.

⁷Duuba worra wohimufi falfaltufi ka ayyaana heddu, worra qaqarole ch'ufa natiini d'ufani, anini oobju iti hime ammo worri tokoleeni waan isii nati himu dad'abe.

⁸Jennaani Danielini d'ufe. (Isaa maqa waaqa kiyya gula maqa d'ibi Belteshaza iti baasani.) Inni lubbu waaqoota qulqullo qaba tanaafi anini oobju tiyya iti hime. Anini waan jed'eeni:

⁹Belteshaza, gudda worra wohimu, anini imbeekha, aka lubbuuni waaqoota qulqullo si keesa jirtu, ammalle aka atini waan d'ossani ch'ufa beetu. Oobjuuni tiyya tana: Waan isiini d'ooftu naati himi.

¹⁰Anini, ato rafu, mukha gudda toko, ka wod'aka lafa keesa eju daayyani arge.

¹¹Mukhi suni guddate old'eerate, waaqati eje, duuba nami laafa keesa jiru ch'ufti dandae arga.

¹²Obeensi isaa waan mid'aaga, mid'aani isaaleeni guddo nama lafa keesa jiru ch'ufa ingahani. Bineensi gaadisa isaa jala boqota, simpirreeni dameele isaa irati mana jaarate, wonti lubbu qaba ch'ufti mid'aani isaa nyaati.

¹³Ato tae waan daayya suni heregu, anini malaika qulqullo, ta kurfoofte gubbaa gadi buutu arge.

¹⁴Malaikaani suni lalabde waan jette, mukha kana muri, dame isaa ch'ufa iraa ch'ich'iri; obeensa iraa guuri, mid'aani iraa d'abbi, bineensa jalaa gussi, simpirrele dameele iraa gussi.

¹⁵Ammo hundafi hidda lafa keesati hambisi, hunda isaa suni sibiila guraachafi diima iti kayi hid'i, lafuma keesati buuyooni woliini lakisi. Duuba ha fiit'eesi isa jiisuti, ha bineensafi buuyo woliini tauti.

¹⁶Haga ganna torba inni ha qalbi nama d'abe, ta bineensa argatuti.

¹⁷Tunini dubbi malaikaani qulqullooni kurfo d'ufte taani ch'ufti dubbate buufate. Tanaafi nami lafa keesa jiru ch'ufti ha beekhu, aka Waaqi guddaani nama nama fidu ch'ufa fide abba fed'u finna suni kennu — nama woma keesa injirrele ch'ufa.

¹⁸Oobjuuni, anini hayyu Nebukadrezani oobjad'e tana. Duuba amma Belteshaza, waan isiini d'ooftu nati himi jari kiyya qaqarooni, ka dandae nati himu injiru, si male; wonti akanatiifi atini lubbu waaqoota qulqullo qabda.

¹⁹Dubbi suni d'agaye jennaani Danielini ka maqaani d'ibiini Belteshaza, aka male rifate waan jed'u wollaale. Hayyichi waan jed'eeni, Belteshaza, oobjufi wonti isiini d'ooftu si irifachisini. Belteshazani waan jed'eeni, Ee hayyicha, oobjuuni sunifi wonti isiini d'ooftu ha ta nyaapa keeti taatuti.

²⁰Mukhi atini garte, ka d'eerinni isaa Waaqati eju, ka nami lafa keesa jiru ch'ufti argu;

²¹ka obeensi mid'aaga, ka mid'aani heddu, nama lafa keesa jiru ch'ufa gaha qabu; ka bineensi ala jala boqote, simpirreeni dameele isaa irati mana jaaratu.

²²Ee hayyicha, mukhi d'eerani jabaani suni si. Atini guddatte, guddinni kanke waaqa d'aqabe, jabeenni kankeleeni muumme lafa ch'ufaa gaha.

²³Ato atini ilaaltu, ee hayyicha malaikaani gubbaa ga buute waan jette, mukha kana muri, balleesi, ammo hunda isaa lafati hambisi. Sibiila guraachafi diima iti kayi hid'i, buuyo woliini achumati lakisi, duuba ha fiit'eesi isa jiisuti; ha ganna torba bineensafi buuyo woliini tauti.

²⁴Wonti oobjuuni sunini d'ooftu tana, ee hayyicha, ammalle wonti Waaqi guddaani si tolcha jed'e buufate tana.

²⁵Namaani gargari si baasani, bineensani wolti sigalchani, ganna torba akuma karaaba buuyo si nyaachisani fit'eesa keesa ala si bulchani. Duuba eegi suni atini ee jetta, aka Waaqi guddaani dandae lafafi nama ch'ufa fide, abba fed'u kennu.

²⁶Ammalle akuma malaikaani hundafi hidda lafa keesati hambifte, atinileeni deebite hayyu taata, yo atini aka Waaqi lafa ch'ufa fidu ee jette.

²⁷Tanaafi amma, ee hayyicha gorsa kiyya ch'aqasi, fud'ad'i. Ch'ubbu lakisi, waan dansaa tolchi, hiyyeesale nahi, duuba atini horteeti bulta.

²⁸Wonti kunini ch'ufti hayyu Nebukadrezati d'ufti.

²⁹Jii kud'ani lama hobaanaani Nebukadrezani, ato mana isaa ka Babiloni gubbaa deemu,

³⁰waan jed'e, Diri guddaani kunini ch'ufti Babiloniniti? Ka anini irre tiyyaani jaare, keesa qubad'e, guddinnaafi jabeenna kiyya garsiise.

³¹Ato inni dubbi suni afaani qabu, qonqooni gubbaa ga d'ufte waan jette, ee hayyu Nebukadreza dubbi tiyya ch'aqasi! Finna lafaatifi jabeenna atini qabdu ya siraa fuud'ani,

³²namaani gargari si baasani bineensani wolti si galchani, duuba ganna torba atini aka karaaba buuyo nyaatta. Duuba aka Waaqi guddaani lafafi namale ch'ufa fide finna isiile ch'ufa nama fed'u kennu hubata.

³³Dubbini suni hojuma suni guutamte. Nebukadreza namaani gargari baasani, inni alati gale, aka karaaba buuyo nyaate. Fiit'eesi nafa isaa jiise, rifeensi isaa guddate dabbasae koola risa fakaate, qeench'i isaleeni d'ed'eerate qeench'a allaati fakaate.

³⁴Ganni torbaani kaani hobaanaani, anini, hayyu Nebukadrezani waaqa ollale, jennaani qalbini nati deebite. Jennaani anini Waaqa gudda faarse, isa ka haga jiru jireenna jiru guddise. Inni haga jiru jireenna mohata, finni isaleeni bara ch'ufa jira.

³⁵Inni nama lafa keesa jiru ch'ufa womatu indaru, malaikaani gubbatiifi nami lafaleeni ch'ufti finna isaa jalati bula. Nami woi isani morme, Atini maani taata? jed'e gaafatu injiru.

³⁶Qalbini nati deebinaani, ulfinnaafi jabeennafi guddinna kiyya ch'ufa naa deebisani, anini akuma kaani deebie hayyu tahe. Hojatufi jari gugurdaani kiyya aka jaba na fud'ate finna kiyya ka duri kaaniti na deebisani, haga qarale iraa na ulfeesani.

³⁷Amma anini, Nebukadrezani, hayyu gubbaa faarse ulfeese guddisa, hujiifi karaani isaleeni ch'ufti ka d'ugaati. Inni nama ufi guddisu ch'ufa dandae kiyyiba iraa kuta.