Read BORANA BIBLE – KITAABA WAAQA Yoeli 2 Bible Online

Yoeli 2 - BORANA BIBLE – KITAABA WAAQA bible

Yoeli 2

¹Magalata Sioni irati d'aa; gaara kiyya qulqullo irati arrifad'a! Nami lafa Yuda keesa jiru ch'ufti ha mudamuti! Guyyaani AABBO Waaqa ya d'iaate.

²Guyyaani suni gaandidae dukanae, guraatae dumansaa. Duuli awaanisaa dukanae, lafa ira dabre, gaara gubbaa gad'ufuu jira. Wonti kunini waan nami taka inargini, ammalle itumaa deebiani inargani.

³Duraafi duubale aka ibida mid'aani gubani. Tuuta suni dura lafti oobru Edeni fakaate, ammo worra duuba lafa aloo ta duwa fakaatti. Wonti tokoleeni duraa imbaatu.

⁴ Worri farda fakaata, akuma farda lolaa oria.

⁵Hojja worri fiit'e gaara gubba gulufu, akuma gaari fardi hirkisu qiqillisa; ammalle akuma ibida jirma marraa gubu d'ud'uqisa; akuma nama lola yau ch'orora.

⁶Ato nyaapi gad'ufu jiru, biyyiti mudamte hollatti.

⁷Aka worra woraanaa oriani, aka worra lolaa naabo ch'absani olseenani. Worri tokoleeni, ka wolira ingorre, ch'orore durati yaa,

⁸ka namu wolti imbuune. Tuuta worraa woraani ind'owu, irrumaani d'ufti.

⁹Dirati oriani, naabo korani, maneeni aka hattu qaani duudani.

¹⁰ Lafti worra durati chochoote, gubbaleeni hollatte, adufi jiileeni dukanae, urjileeni ifsu diddi.

¹¹ AABBO Waaqi duula isaati mandie, duuli irre qabu, guddaani muumme inqamne, isa ch'aqasa. Guyyaani AABBO Waaqa suni guyya gudda, ka gaargala gudda qabu! Eentu dandae iraa hafa?

¹²AABBO Waaqi waan jed'u, Ammo amma tanale, garaa keesani ch'ufaani nati deebia, ufi agabsa, laalalaani boha.

¹³Woya tarsaaftani laalala ingarsiisina, ammo garaa keesaniini garsiisa. AABBO Waaqa keesaniti deebia, inni eebaafi naasu qaba; obse kakhu ufii guute, hojja ch'ufa namaa nahe araraama.

¹⁴Hegeri AABBO Waaqi keesani garagale, isani eebise mid'aani guddo isanii keenna. Duuba isani mid'aanifi daad'i isaa baaftani.

¹⁵Magalata gaara Sioni ira d'aa! Gumi wolti yaama, guyya ufi agabsitani tolfad'a!

¹⁶Gumi wolwoldeesisa, gumi suni woldeenna qulqullo kurfeesa. Jaarole yaama, ijoolleefi daimale ch'ufa wolti guura; nami intala fuud'eefi intalti fuud'anileeni ha mana ufii lakisani d'ufaniti.

¹⁷Qaaloleeni ta fulla sorio iti baasanifi balbala Mana AABBO Waaqaa jiddu hojattu ha, Ee AABBO Waaqa, gumi tanteeti nahi, jette bootuti. Gochiti d'ibiini nu tufatte nu goyeesite, Waaqi keesani me? nuuni injed'iini.

¹⁸Jennaani AABBO Waaqi lafa isaa qaabate, nama isaati nahe waan jed'eeni,

¹⁹Anini amma tana mid'aanifi daad'ifi d'ad'a isanii kenna; duuba inquuftani. Gochiti d'ibileeni deebite isani intufattu.

²⁰Anini nyaapa awaanisaa, ka mirgaa d'ufe, isani iraa balleese, lafa aloo, ta gogodde woma imbaaneti gussa. Tuuta qara Galaana ilaboruti jisse, ta lameeso baariini ila aduti jissa. Reefi worraleeni ajae shama. Waan worri isani tolche kana ch'ufafi anini worra balleesa.

²¹Oobru, insodaatina, ammo gammada, qilit'ama. AABBO Waaqi ya waan guddo isanii tolche.

²²Bineensa, insodaatina, marri ya dottaate, mukhileeni ya mid'aani baase, odafi zabibuleeni ya baate lafa ira dabarte.

²³Worra Sioni, gammada, AABBO Waaqa keesaniti qilit'ama. Inni bokaya hagayya ka haga isanii roobe, gannale isanii kenne, furmaatale akuma duri isanii roobe.

²⁴Oobdiini mid'aaniini guutamte, daad'ifi d'ad'aani fulla iti naqani guute iraani dambalaa.

²⁵Anini waan duri tuuti awaanisaa nyaatte isani iraa balleesite isanii deebisa. Nami duula awaanisaa suni isaniti erge anuma.

²⁶Amma isani waan guddo nyaattani quuftani, maqa AABBO Waaqa keesani, ka waan jabdu mama isani tolche, faarsitani. Deebiani gumi tiyya intufatani.

²⁷Duuba isani, worri Israeli, aka anini jiddu teesani jirufi aka anini AABBO Waaqa keesani, ka Waaqi d'ibiini injirre, beetani. Deebiani gumi tiyya intufatani.

²⁸Duuba eegee anini lubbu tiyya nama ch'ufa ira buusa: ilmaani teesani ta d'iiratiifi ta uwalealeeni wo fadde, jaaroleeni teesani oobju oobjatte, kaimi keesanileeni daayyani wo arga.

²⁹Anini gaafasi hojattu tiyya ta d'iiratiifi ta uwale lubbu tiyya ira buusa.

³⁰Anini akheekha guyya suni gubbafi lafa iraleti agarsiisa; d'iigafi ibidaafi aarale lafati buusa.

³¹ Aduuni dukanoofte, jiileeni aka d'iiga diimata, ato guyyaani guddaani jabaani AABBO Waaqaa ingahiini.

³²Duuba nami maqa AABBO Waaqaa yaamatu ch'ufti imbaafama. Akuma AABBO Waaqi jed'e, Gaara Sionitiifi Yerusalemu keesale nami baqate fiigu injira; nami fiige suni worra anini fohad'e.