Read BORANA BIBLE – KITAABA WAAQA Henna 10 Bible Online

Henna 10 - BORANA BIBLE – KITAABA WAAQA bible

Henna 10

¹AABBO Waaqi waan Musani jed'e,

²Qarsi tumi, magalata lama mid'aasi, aka biyyaani wolti yaamte guyya, godaanani namati himtu.

³Hojja magalata lachu guddisani d'aani, gumiini ch'ufti ha fulla balbala Waaro Woyyumati siti d'uftuti.

⁴Ammo hojja magalata toko ch'alla d'aani, jaaroleeni balbala gosaa mataa ch'allaani ha siti d'uftuti.

⁵Hojja magalata diqo d'aani, gochiti gama ilaboru qubatu ha godaantuti.

⁶Ammalle hojja maro lameeso magalata diquma d'aani, gochiti guma bitaa jirtu ha godaantuti. Duuba hojja godaanu fed'ani magalata diqeesani d'aani,

⁷ammo hojja gumi wolti yaamu fed'ani guddisani d'aani.

⁸Magalata qaalole ilmaani Haruniti d'aa. Haga jirtani ch'ufa aada tana guutu maltani.

⁹Ato isani lafa teesani keesa jirtanu ka, nyaapi d'ufe isani had'e, nyaapa suni ufi iraa d'owu feetani, magalata kana d'aa iyya. Duuba anini, AABBO Waaqi keesani, isani qarqaare harka nyaapa keesani keesaa isani baasa.

¹⁰Ammalle guyya gammadale ka isani jila baatitifi jila d'ibi aada tolfatanile, isani magalata d'au maltani, hojja isani sorio gubanifi sorio wold'ageeti baaftani. Duuba anini isani qaabad'e qarqaara. Anini AABBO Waaqa keesani.

¹¹Guyya diddameeso, ka jia lameeso, ganna lameeso eegi worri Israeli lafa Misiri keesaa bahe, dumansi Waaro Woyyuma gubba jiru kaani iraa kae,

¹²jennaani worri Israeli aka lafa aloo ta Sinai keesaa bahu godaana kae. Worri lafa aloo ta Paranitini bahe jennaani dumansi kaani ammalle Waaro ira tae.

¹³Worri dubbi AABBO Waaqi Musani jed'e gula godaane,

¹⁴ammalle hojja godaanani ch'ufa, worri akana godaana. Worri bandera gosa Yuda jala jiru dura godaane mana manani, ka Nashoni ilmi Aminadabu gudda worraa.

¹⁵Nethaneli ilmi Suari gudda gosa Isakari.

¹⁶Ammalle Eliabu ilmi Heloni gudda gosa Zabuloni.

¹⁷Jennaani Waaro Woyyuma, hiikhani, worri balbala Gershonitifi Merari ka godaana Waaro suni baatu; godaana.

¹⁸Eegi suni worri bandera gosa Reubeni jala jiruleeni mana manani kae godaana, ka Elisuri ilmi Shedeuri gudda worraa.

¹⁹Sheumieli ilma Surishadai gudda gosa Simeoni,

²⁰ammalle Eliasafu ilma Deueli gudda gosa Gadi.

²¹Duuba eegi suni worri balbala Kohathi, ka godaana miha woyyuma baatu godaana. Hojja worri fulla qutumati worra kaani d'aqabe, Waaro ya jaarani.

²²Eegi suni worri bandera gosa Efraimu jala jiru mana manani kae godaana, ka Elishama ilmi Amihudi gudda worraa.

²³Gamalieli ilmi Pedasuri gudda gosa Manase,

²⁴ammalle Abidani ilmi Gideoni gudda gosa Benjamini.

²⁵Duuba eege worri bandera gosa Dani jala jiru ka qorqorti eege biyya godaanu, mana manani kae godaana, ka Ahiezeri ilmi Amishadai gudda worraa.

²⁶Pagieli ilmi Okrani gudda gosa Asheri

²⁷ammalle Ahira ilmi Enani gudda gosa Naftali.

²⁸Akanaani worri Israeli, hojja godaanu ch'ufa, mana manani wolgula godaana.

²⁹Musani waan Hobabu ilma Yethro, ka gosa Midiani, ka sodda isaatini jed'e, Nu yayu lafa AABBO Waaqi, isanii kenna jed'e taaniti godaanu geenne. Inni yayu kakhate, aka gumi Israeli tana horsiisu, tanaafi atinileeni nu woliini kooti, woliini horraa.

³⁰Ammo Hobabuni waan jed'eeni, Hiyo anini lafa tiyyafi worra kiyyati galu fed'a.

³¹Ammo Musani waan jed'eeni, sodda kiyya, si eebimna, nu biraa indeemini, atini lafa gamooji tana ch'ufa imbeeta, fulla ch'ufa nu geesite nu qubachiifta.

³²Hojja atini nu woliini godaante eeba AABBO Waaqi nu kennu ch'ufa woliini qoodanna.

³³Gumiini Israeli gaara qulqullo Sinaiti kaate, godaana guyya sadi godaante. Sanduqi Wold'aqisa AABBO Waaqa hojja ch'ufa worra dura deeme, aka fulla qutuma worraa laalu.

³⁴Hojja worri godaanu ch'ufa, dumansi AABBO Waaqaa worraa gadiseesa.

³⁵ Hojja Sanduqi Wold'aqisa godaana kae ch'ufa, Musani waan jed'u, AABBO Waaqa, kai: Nyaapa kanke gargari baasi, nama si jibbule ufi duraa gussi!

³⁶Ammalle hojja Sanduqi miilad'aabate, inni waan jed'u, AABBO Waaqa, worra Israeli ka kunkiti deebii.