Read BORANA BIBLE – KITAABA WAAQA Henna 32 Bible Online

Henna 32 - BORANA BIBLE – KITAABA WAAQA bible

Henna 32

¹Gochiti Reubenitifi ta Gadi looni guddo qabdi. Worri aka lafti Yazeritifi Gileadi looni dansa, arge jennaani

²Musafi Eleazarifi jaarole gumi taaniti d'ufani waan jed'aniini,

³Diri Atarothi, Diboni, Yazeri, Nimra, Heshboni, Eleale, Sebamu, Nebofi Beoni, ka AABBO Waaqi worra qara keesa jiru iraa fuud'e worra Israeliti kenne, ardaani isaa guddo looni dansa, nuleeni looni guddo qamna.

⁵Nu amma isani kad'anna, lafa tana nuu kenna, galaana Yordani takisiftani gama nu inqubsisina.

⁶Musani waan jed'eeni, Ka oboleyaani teesani taani duula yaatu asi hafu feetani?

⁷Isani akami gumi Israeli garaa laafiftani, galaana Yordani taku sodaachiftani, lafa AABBO Waaqi worraa kenne iti dabru d'owartani?

⁸Wonti isani taatani kunini woma qara abbootini teesani taate, gaafa anini, lafa Kadesh-Barnea keesa, lafa dooyad'a jed'e erge.

⁹Gaafasi worri haga bale Eshkoli d'aqe lafa arge, ammo galani jennaani biyya garaa laafisani lafa AABBO Waaqi worraa kenne seenu sodaachisani.

¹⁰Guyya suni AABBO Waaqi dallane, kakhate waan jed'e:

¹¹Anini inkakhad'a aka worri kuni, waan garaa tokooni na gula yau dideefi, nami worra ka ganna diddamati oli, ka lafa Misiri keesaa bahe, lafa anini Abrahamufi Isaaqofi Yakobo kakhad'e, tokoleeni inseenne.

¹²Nami waan suni keesa injirre Kalebu ilma Yefune ka gosa Kenisitifi, Yoshua ilma Nuni ch'alla; jara kana lamaani ch'allati garaa tokooni AABBO Waaqa gula yae.

¹³AABBO Waaqi gumi Israeli suniti dallane, lafa aloo ta gamooji keesa, haga ganna afurtama lafa marse, haga d'alooti isa dallansiise kaani ch'ufti hobauti.

¹⁴Amma isanileeni yayu abbooti teesani suni gula baatani, d'aloota d'ibi ka daba taatani, dallansu hamtu AABBO Waaqaa worra Israelitini d'uftani.

¹⁵Yo isani, gochiti Reubenitifi ta Gadi, amma tana isa gula yau didani, inni ammalle deebie gumi tana ch'ufa lafa alooti lakisa, duuba nami badii suni worratiini d'ufu isani.

¹⁶Worri Musati gad'ufe waan jed'eeni, Qara aka nu moona d'akhaa ree teennaa jaarre, ilmaani teennale maneeni jajabdu diraa jaarufi nu lakisi.

¹⁷Duuba nu kurfo jirra, aka gumi Israeli dura deemne nyaapa haanu, haga nu worra lafa worratiini geenuti. Hagasi ilmaani teenna dandeete dira kana keesa teete, worra lafa tana duraa baati.

¹⁸Nu worra keennati indeebinu, haga worri Israeli ch'ufti lafa kennanifi taaniti qubatuti.

¹⁹Nu lafa galaana Yordani gama tokole worra duraa infud'annu; wonti akanatiifi nu qooda keenna ya arma galaana Yordani ila boruti fud'anne.

²⁰Jennaani Musani waan jed'eeni, Yo isani d'uguma baantani, ammatana arma, AABBO Waaqa durati, had'iisaa kurfaa.

²¹Worri keesani ka woraana ch'ufti ha galaana Yordani, taakuti ammalle jabeenna AABBO Waaqatini ha nyaapa kenna had'aniti, haga AABBO Waaqi worra dabsate

²²lafa iraa fuud'uti. Eegi suni dandeetani deebitani; wonti akanatiifi isani yo suni ya fed'i AABBO Waaqatifi ta worra Israeli guutani. Duuba hojja suni AABBO Waaqi aka lafti galaana Yordani ilaboru teesani beekha.

²³Ammo yo kakhu teesani suni guutu baatani, beekha, ya AABBO Waaqati dabdani, imamina, gati ch'ubbu teesani ind'abdani.

²⁴Duuba dira ilmaani teesanifi moona ree teesani jaarad'a, ammo waan kakhatani kana guuta.

²⁵Worri gosa Gaditifi ta Reubeni waan Musani jed'e, AABBO nu jecha kanke inguunna.

²⁶Nad'eeni teennafi ilmaani teennafi loonifi reeni teennaleeni armuma dira lafa Gileadi kana ch'ufa keesati hafti.

²⁷Amma nu ch'ufti jecha AABBO Waaqa gula had'iisaa kurfo jira. Nu galaana Yordani taakine, akuma atini jette nyaapa haana.

²⁸Duuba Musani dubbi tana Eleazarifi Yoshuafi jaarole Israeli taanini jed'e:

²⁹Yo worri Gaditifi ka Reubeni, dubbi AABBO Waaqa gula, had'iisa kurfae galaana Yordani taake, duuba yo qarqaarsa worratiini lafa suni dabsatani fud'atani, lafa Gileadi ha worri fud'atuti, d'aala kennaafi.

³⁰Ammo yo worri galaana Yordani taake had'iisa isani woliini yau baate, worri ha akuma keesani lafa Kanaani keesati qooda lafa argatuti.

³¹Worri Gaditifi ka Reubeni waan jed'eeni, Aabbo, nu akuma AABBO Waaqi jed'e tolchina.

³²Nu jecha isaa gula lafa Kanaaniti taakine duula d'anna, aka nu d'aala lafa galaana Yordani ilaboru ind'amne.

³³Duuba Musani gosa Gaditifi ta Reubeni gosa Manase ta haga gari, lafa hayyu Sioni, ka gosa Amoritifi, lafa hayyu Ogu ka gosa Bashani, dirafi lafa d'aatu jirtule, kenneefi.

³⁴Gochiti Gadi dira maneeni jajabdu qabu jaarte: diri suni Diboni, Atarothi, Aroeri,

³⁵Atroth-Shofani, Yazeri, Yogbeha,

³⁶Beth-Nimra, Beth-Harani.

³⁷Gochiti Reubeni dira kana jaarte, Heshboni, Eleale, Kiriathaimu,

³⁸Nebo, Baal-Meoni (maqa dira kana ya jijirani), Sibima. Worri dira kana eege jabeese jaare maqa d'ibi baaseefi.

³⁹Balbalti gosa Makiri, ta ilma Manase iraa baate, lafa Gileadi haate, fud'ate, worra gosa Amori ka keesa jiru keesaa kaafte.

⁴⁰Duuba Musani lafa Gileadi balbala Makiriti kenne, worrileeni iti qubate.

⁴¹Yeirini, ka gosa Manase, ollowaani gari had'e dabsate fud'ate, ollowaani Yeiri maqa baaseefi.

⁴²Nobani Kenathifi ollowaani isaa had'e dabsate fud'ate, maqa ufi gula Noba maqa baaseefi.