Read BORANA BIBLE – KITAABA WAAQA Henna 9 Bible Online

Henna 9 - BORANA BIBLE – KITAABA WAAQA bible

Henna 9

¹AABBO Waaqi lafa aloo ta gamooji ta Sinai keesati, jia qara ka ganna lameeso keesa eegi worri Israeli lafa Misiri keesa bahe.

²Waan Musani jed'e guyya kud'ani afreeso ka jia kana galgala hojja aduuni d'iite, worri Israeli ha aada jila Pasaka, seerafi aada isii gula, tolfatuti.

⁴Jennaani Musani biyyaani, Aada jila Pasaka tolfad'a jed'eeni.

⁵Duuba biyyiti galgala guyya kud'ani afreeso, ka jia qara, jila suni lafa aloo ta Sinai keesati tolfatte. Biyyiti akuma AABBO Waaqi Musani jed'e, waan suni ch'ufa tolchite.

⁶Ammo nama gariti jira, ka reefa tuqe aada gula qulqulluma ufi d'abe; tanaafi dandae guyya suni aada Pasaka inguutu. Worri sunini gara Musafi Haruni d'aqe,

⁷waan jed'aniini, Nu yayu reefa tund'e, akasiini ufi t'ureesine, ammo maanifi waan nu AABBO Waaqaa baasu malle, gumi Israeli woliini, baasu nu d'owani.

⁸Duuba Musani waan jed'eeni, eega, haga anini AABBO Waaqa iraa waan isani tolchani d'agayuti.

⁹AABBO Waaqi waan Musani jed'e,

¹⁰waan atini worra Israelitini jettu, Hojja isani keesa nami toko, yokhaani d'alooti keesani nami toko, reefa tuqe t'urae, yokhaani inni imaltu fago jiraate, ka inni aada jila Pasaka tolfachu fed'u,

¹¹inni dandae eegi jia toko tae, galgala guyya kud'ani afreeso ka jia lameeso jila suni tolfata. Inni jila suni ha qit'a bukho inqamneefi waan aka raafu had'ooftutini tolfatuti.

¹²Inni sagale suni tokole hambise lafti iti imbariini, lafe hori suni tokole inch'absini. Inni jila Pasaka aada isii ch'ufa guutu male.

¹³Ammo nama tokole ka t'uri inqamne yokhaani ka imaltu ala injirre, ka aada jila Pasaka intolfanne ha gumi keesa kutaniiti, waan inni waan sila baasu malani guyya isii naa imbaasinifi. Inni gati daba ufi ha argatuti.

¹⁴Yo nami gosa d'ibi, ka isani keesa qubatu, aada Pasaka tolfachu fed'u, inni seerafi aada isii guute tolfachu male. Seeri jila tana nama ch'ufa ha takaa tahuti, gumi Israelitiifi nama gosa d'ibile taanaani.

¹⁵Guyya Waaro Woyyuma jaarani hobaasani, dumansi d'ufe d'osse; lafti galgalomnani dumansi sunini ibida fakaate haga lafti bariituti Waaro gubba tae.

¹⁶Hojja ch'ufa akasuma; guyya, dumansati Waaro gubba mullata, halkani, ibidati iraa mullata.

¹⁷Hojja dumansi suni Waaro iraa kau ch'ufa worri Israeli godaane ammalle fulla dumansi gadeebiuti worri qubata.

¹⁸Worri jecha AABBO Waaqa gula kae godaane, jecha isaa gula qubata. Haga dumansi Waaro Woyyuma ira tau ch'ufa worri achuma taa.

¹⁹Ato dumansi guyya hedu Waaro suni gubba taele, worri AABBO Waaqa saalfate inchochone, artuma tae.

²⁰Maro gari dumansi haguma bulti diqo Waaro gubba taa: ammo aka ch'ufafu godaanafi teesumti worra jecha AABBO Waaqa gula.

²¹Guyya gari dumansi haga galgalaatifi diirama ch'alla taa; duuba hojja dumansi kae worri ingodaana. Yokhaani ato guyya tokofi halkani tokole dumansi tae, hojja dumansi kae worrileeni ingodaana.

²²Ato guyya lama yokhaani jia toko yokhaani ganna toko yokhaani hagasile ira taate, haga dumansi Waaro ira tau, worri ingodaanu; ammo hojja dumansi kae, worrileeni ingodaana.

²³Jecha AABBO Waaqi Musani jed'e gula godaanani qubatani.