Read BORANA BIBLE – KITAABA WAAQA Mika 1 Bible Online

Mika 1 - BORANA BIBLE – KITAABA WAAQA bible

Mika 1

¹ Gaafa Yothamufi Ahazifi Hezekiani hayyoota Yuda, dubbini AABBO Waaqa Mika nama Moreshethi d'ufte. AABBO Waaqi dubbi tana ch'ufa, ta waan Samariatifi ta Yerusalemu, Mika daayyani agarsiise.

²Gosa ch'ufa, d'agaya; nama lafa keesa tau ch'ufa ch'aqasa! AABBO Waaqi Guddaani Mana isaa qulqullo keesa dubbate ha isani himatu!

³AABBO Waaqi fulla isaa qulqullo kae gad'ufe, fiit'e gaareeni d'eertu gubba deema.

⁴Duuba gaareeni isa jalati, aka hanch'aani ibida keesati baqu, bat'e, yaate bale tarsaafte, aka bisaani gaara iraa jigani yaati.

⁵Wonti woni kunini ch'ufti taatuufi, maro wollaala Yakobotiifi ch'ubbu worra Israeliti. Wollaala Yakobo eentu d'ufeeni? Worra Samariatiniti? Ch'ubbu worra Yuda eentu d'ufeeni? Worra Yerusalemutiniti?

⁶Tanaafi AABBO Waaqi waan jed'u, Anini dira Samaria mana ona ka lafa diida keesati jige tolcha, fulla zabibu iti oobrani. Anini d'akhaye maneeni worraa ta jidde suni bale keesa jisse, yayaba dira suni diidati gabaasa.

⁷Waan worri boch'e kad'atu ch'ufa ch'ach'absani, waan sharmut'a mana waaqoota suni ke jiru baasani ch'ufa gubani, ammalle wonti boch'ani kad'atani suni ch'ufti onte baddi. Waan kana ch'ufa Samariani kara sharmut'omatiini argate, amma nyaapi isii waan suni ch'ufa fud'ate lafa d'ibi geese kad'ata.

⁸Jennaani Mikaani waan jed'e, Maro waan kana ch'ufatiifi anini laalefad'e bohe kobefi woya baafad'e qullaa deema. Anini aka geedala waakise, aka guchi boha.

⁹Mada Samaria wonti fayyisa injirtu, Yudaleeni diquma akasi intahiini; gaargalileeni ya balbala fullo Yerusalemu, fulla worri kiyya tau, gahe.

¹⁰Nyaapa keenna ka Gathi jiru, aka nu dabsatani, iti inhimina; boha teesani worra argu d'owa. Worra Beth-Leafra, aka ufi jibbattani, biyye keesa gangalad'a, garsiisa.

¹¹Isani worri Shafiri, qullaa baqad'a, ch'eera. Nami dira Saanani keesa tau keesaa imbahu. Hojja isani boha worra Betheseli d'ageetani, aka fullaani iti baqatani injirre beetani.

¹²Worri Marothi aka jaba qarqaarsa eegata, waan AABBO Waaqi badi guddo balbala Yerusalemutini d'ufeefi.

¹³Isani nami Lakishi keesa tau, farda keesani gaariti hid'ad'a. Isani ch'ubbu worra Israeli gula deemtani worra Yerusalemu ch'ubbu keesa buuftani.

¹⁴Amma, isani worra Yuda, dira Moreshethi Gathi nagayaati jed'aani. Hayyooti Israeli qarqaarsa dira Akzibu ira inargattu.

¹⁵Worra Maresha, AABBO Waaqi harka nyaapa keesani ka dira keesani dabsate fud'atuti isani keenna. Worri gugurdaani Israeli yae goda Adulamuti d'okhata.

¹⁶Isani worra Yuda, rifeensa keesani haadad'a, ilmaani teesani ta isani jaalattani bohaa. Aka ruumicha mata ufi moleesa, maro ijoolle teesani boojiani lafa d'ibi geesaniifi.