Read BORANA BIBLE – KITAABA WAAQA Zekaria 5 Bible Online

Zekaria 5 - BORANA BIBLE – KITAABA WAAQA bible

Zekaria 5

¹Anini ammalle olmillad'e, maro tana woraqata barisu arge.

²Malaikaani waan anini arge na gaafatte, jennaani anini waan jed'eeni, Woraqata barisu arge jed'eeni. D'eerinni isaa d'und'uma diddamaati, ballinnileeni kud'ani.

³Jennaani isiini waan naani jette, Woraqata suni irati abaarsa lafa ch'ufa keesa ergani irati t'aafani. Gama isii toko waan irati t'aafani, Hattu ch'ufa lafa keesaa balleesani; gama kaanile wonti irati t'aafani, Nama waan d'ara kakhatule lafa keesaa balleesani.

⁴AABBO Waaqi Guddaani waan jed'u, Anini woraqata abaarsa ira t'aafani kana lafa keesa erga; duuba inni mana hattu ch'ufafi ka nama waan d'ara kakhatuti seene, mana suni keesa tae, balleese gargari jissa.

⁵Malaikaani gadeebite waan jette, Me, waan gabahuu jira laali!

⁶Anini, Maani jed'e gaafad'e. Isiini waan naani jette, Sanduqa ka ch'ubbu lafa ch'ufa akheekhu.

⁷Sanduqi sunini qadaada qaba, ka sibiila qalaitiini mid'aasani. Ato anini laalu, qadaadi old'iibame, yo ani jed'e, niiti tokoti keesa taa!

⁸Malaikaani waan jette, Niitiini tunini akheekha ch'ubbuu. Eegi akasi jette, niiti taani sanduqa keesati gad'iibde qadaada iti deebifte.

⁹Anini ammalle millad'e jennaani nad'eeni lama ta koola jajaba aka baboaloona qabdu, ta gara kiyya barriftu arge. Worri sanduqa kaani fuud'e barise itiini d'aabate.

¹⁰Duuba anini malaika gaafad'e, Worri eesaani yaa jed'eeni.

¹¹Isiini waan naani jette, Lafa Babiloni geesani — achiti mana iti jaarani. Eegi mana suni ijaarani, sanduqa suni fulla mid'aasanifi keesa d'aabani.