Read BORANA BIBLE – KITAABA WAAQA Matayo 20 Bible Online

Matayo 20 - BORANA BIBLE – KITAABA WAAQA bible

Matayo 20

¹Finni gubba aka abba oobru zabibu jira, ka ganamaani lafaa kae, nama huji qoru barbaadu.

²Aka beese huji guyya toko guyyaati kennuufi wold'aqani, oobru zabibuti worra erge.

³Saa sadi fulla gabaya d'annaani, nama huji inqamne arge

⁴waan jed'eeni, D'aqa, oobru tiyya ta zabibu keesa hojad'a, hori isanii baasa. Worri kae yae.

⁵Saa jaafi sagalile akasuma tolche.

⁶Saa kud'ani tokole gabaya d'annaani nama d'ibi huji inqamne arge waan jed'eeni, Isani guyya kana ch'ufa maanifi arma ejaanjitani, ka woma inhojanne?

⁷Worri waan jed'eeni, Nami tokoleeni huji nu inqorre. Inni waan jed'eeni, Yoosi isanileeni d'aqa, oobru tiyya keesa hojad'a.

⁸Lafti galgaloomnaani abbaani oobru zabibu waan gudda hojattutiini jed'e, Worra hujiti hori baasi, ka eegitiini iti keyad'u, haga ka qara.

⁹Worri saa kud'ani toko qorani kaani d'umnaani beese huji guyya toko argate.

¹⁰Worri qara ganamaani qorani kaani d'umnaani, waan hagasi ira argatani ufi sehani, ammo beesuma suni ch'alla argatani.

¹¹Hori fud'atani tuffatani abbaati gungumani

¹²waan jed'ani, Worri eege qorani kunini diquma toko hojate, ammo nu guyya kana ch'ufa adu tana keesa oolle, duuba atini waanuma worraa kennite nule kennita!

¹³Abbaani oobru waan jara suni nama tokooni jed'e, Abbo, ch'aqasi, anini si indabsine; atini aka hojatte beese huji guyya toko argattu ee jetteeniti?

¹⁴Duuba hori kanke fud'ad'u, nagayaani gali. Anini waanuma sii kenne worra eege qorani kaale kennu fed'a.

¹⁵Anini hori kiyya waan fed'u intolchu? Yokhaani waan anini arja taheefi na qot'ifta?

¹⁶Yesoni waan jed'e, Nami qara ka eege taha, ammo ka eege ka qara taha.

¹⁷Ato Yerusalemu deemu jiru, Yesoni jara ufi kud'ani lamaani kara keesa kobati yaame waan jed'eeni,

¹⁸Ch'aqasa, nu Yerusalemu yau jirra, achiti Ilma Nama harka qaalole gugurdotiifi ka worra Seera beekhuti kennani. Worri dua iti mure,

¹⁹harka gosa d'ibiti kenna, isa goyeesani, lichooni d'aanani, mukhati fannisani, ammo guyya sadeeso isa kaasani.

²⁰Haati ijoolle Zebedayo ilmaani ufitiini Yesoti d'ufte, durati gadi jette wo kad'atte.

²¹Yesoni waan jed'eeni, Maani feeta? Isiini waan jette, Aka ilmaani tiyya tuni lamaani, Finna kanke keesati, harka kanke ka mirgatiifi ka bitale teteetu fed'a.

²²Yesoni waan worraani jed'e, Isani waan kad'attani imbeetani. Isani dandeetani mudunu anini keesa d'ugu ind'uddaniini? Indandeenna jed'aniini.

²³Inni waan jed'eeni, D'uguma mudunu tiyya keesaa d'uddani, ammo anini jabeenna nama harka kiyya mirgafi bitaachaani tau fohad'u inqabu. Fullaani tunini tama worra Aabbooni kurfeeseefi.

²⁴Jari kud'annaani kaani waan kana d'ageennaani oboleyaani taani lamaanti dalane.

²⁵Ammo Yesoni worra ch'ufa wolti yaame waan jed'eeni, isani imbeetani, aka jari gugurdaani gosa d'ibitiifi jari lafa fidu jabeenna qabu.

²⁶Ammo isani akasiiniti. Yo nami toko gudda tahu fed'e, ha hojattu nama ch'ufa tahuuti.

²⁷Ammalle nami ka qara tahu fed'u tisse teesani tahuuti —

²⁸akuma Ilmi Nama, aka nami isa hojattufi ind'ufiini, ammo aka namaa hojate, jireenna ufi maro nama heddutiifi baasu d'ufe.

²⁹Ato worri Yeriko keesaa bahu jiru, gumiini guddooni Yeso gula yaate.

³⁰Jari ballaani lamaani toko ka d'aatu kara tatau, aka Yesoni kara suni gula deemu d'ageennaani iyani waan jed'ani, Ilma Daudi, nuu nahi.

³¹Gumiini worra d'owarte, Ch'allisa worraani jette.

³²Ammo Yesoni waan worraani jed'e, Ana maani isani tolchu feetani?

³³Worri waan jed'eeni, Sii ila nuu bantu feena!

³⁴Yesoni worraa nahe, ila worraa tuqe, hojuma suni lafa argani isa gula yaani.