Read BORANA BIBLE – KITAABA WAAQA Matayo 23 Bible Online

Matayo 23 - BORANA BIBLE – KITAABA WAAQA bible

Matayo 23

¹Yesoni gumifi jara ufitiini hasae waan jed'e,

²Jara Seera beekhufi Farisayooni waan Seera Musa himti.

³Tanaafi waan worri tolcha jed'u ch'ufa tolchu maltani, ammo waan worri tolchu intolchiina, waan worri waan nama barsiisu ufii inguunneefi.

⁴Seera jajaba mid'aasani qach'eera namati hid'ani, ammo ufii baa ulfo suni qubaleeni tuqu imfed'ani.

⁵Waan ch'ufa aka nami worra argu tolchani. Qud'aami worri addafi harkati hid'atu waan gugurda, handaari woya worraleeni waan d'ed'eera.

⁶Fulla jilati fulla dadansa fed'ani, maneeni Waaqa iti kad'atani keesale barch'uma dadansa fed'ani.

⁷Aka nami fulla gabayati nagaya worra fuud'u fed'ani, nama Rabbi worraani jed'u fed'ani.

⁸Ammo Rabbi nami isaniini jechu himmalle, wonti akanatiifi isaniini ch'ufti oboleyaani, barsiiftu toko ch'alla qabdani.

⁹Ammalle nama lafa tana keesa jiru tokoleeni Aabbo injed'ina; wonti akanatiifi isani Abba toko ch'alla qabdani, ka gubba jiru.

¹⁰Yokhaani Moticha nami isaniini jechu himmalle; wonti akanatiifi motichi keesani Kristo ch'alla.

¹¹ Nami isani ch'ufa ira gudda ha hojattu teesani tahu.

¹² Nama ufi guddisu indiqeesani, ammo nama ufi diqeesu inguddisani.

¹³Gaargala keesani jara Seera beekhufi Farisayo! Kiyyibdoole! Isani Finna gubba nama duraa ch'uftani, ammo ufile inseentani, yokhaani worra seennu fed'ule d'owartani. [

¹⁴Gaargala keesani, isani jara Seera beekhufi Farisayo! Kiyyibdoole! Isani nad'eeni d'iirsi iraa due dabsitani, waan worra hattani, kad'acha teesani kiyyibafi d'eersetani. Maro waan kanatifi nama ch'ufa ira gaargaltani.]

¹⁵Gaargala keesani, jara Seera beekhufi Farisayo! Kiyyibdoole! Galaana taakitani, lafa fago yaatani, aka nama toko aada teesani barsiiftani; yo inni barate, maro lama haga keesanile ira ibidaa male!

¹⁶Gaargala keesani, balloota nama dura yaatu! Yo nami Mana Waaqatiini kakhate womaniti jettani barsiiftani; ammo yo inni worqi Mana Waaqa keesa jirtuuni kakhate akasi woi jettani barsiiftani.

¹⁷Isaani daalle ila inqamne! Worqi mo Mana Waaqaati ira jira, ka worqi qulqulleesu?

¹⁸Ammalle yo nami waan sorio irati qalanini kakhate, womaniti jettani barsiiftani, ammo yo inni sorio waan sorio irati qalani gubba teetuni kakhate woi jettani.

¹⁹Isani guddo balla! Sorio mo waan sorio irati qalani ka sorio qulqulleesuti ira jaba?

²⁰Tanaafi yo nami waan sorio irati qalanini kakhate, inni waan sorio irati qalaniifi waan gubba jiru ch'ufaani kakhata;

²¹akasuma yo nami Mana Waaqatiini kakhate, isaafi Waaqa achi tauleeni kakhata;

²²ammalle yo nami gubbaani kakhate inni barch'uma Waaqatiifi nama ira tauleeni kakhata.

²³Gaargala keesani, jara Seera beekhufi Farisayo. Kiyyibdoole! Qooda kud'anneeso ka gurbi urgotiifi waan d'ibi ka sagaleeni urgesanile Waaqa baaftani, ammo barsiisa isa jajabdu ta Seera diddani, ta aka nagayafi nasufi d'ugaa. Waan kana guutu maltani, ato seera d'ibile indinne.

²⁴Balloota, nama dura yaatu! Tiite aanani keesaa fud'attani, ammo gaala liqimsitani!

²⁵Gaargala keesani, jara Seera beekhufi Farisayo! Kiyyibdoole! Qorifi mudunu ala d'it'ani, ammo keesa isii hannafi ufi jaalachaani guutani.

²⁶Farisayo balloota! Waan mudunu keesa jira d'iqi, duuba alileeni inqulqullaa.

²⁷Gaargala keesani, jara Seera beekhufi Farisayo! Kiyyibdoole! Isani aka awaala gubbaa adeesani jirtani, ka alaani guddo mid'aagu, ammo keesi lafefi waan shame qaba.

²⁸Akasuma alaani isani dansaa fakaattani, ammo garaani keesani d'arafi daba qaba.

²⁹Gaargala keesani, jara Seera beekhufi Farisayo! Kiyyibdoole! Awaala mimid'aaga raagaa tolchitani, waan worra d'ugatiini qaabatani gubbaa jaartani,

³⁰waan jettani, Yo nu sila bara ababoota teenna lafa jiraanne, nu aka worraa raagoota inijeemnu jettani.

³¹Isani, Nu ilmaani worra raagoota fit'e jettani ufi d'ugeesitani.

³²Dura yaa me, waan ababooti teesani qara tolchite hobaasa.

³³Isani bofafi ilmaani bofaati! Murisa hegeri dandeetani duraa imbaatani.

³⁴Tanaafi waan anini isaniti himu: Anini raagootafi worra qalbi qabuufi qaaloota isani erga; ka gari fitt'ani, ka gari mukhati fanniftani, ka gari Maneeni Waaqa iti kad'atani keesati lichooni d'aantani, dira ch'ufa keesaa haatani.

³⁵D'iigi worra woma iyakini ch'ufti mata keesani gubba jira, d'iiga Habiliti haga d'iiga Zekaria ilma Barakia, ka isani Mana Waaqatiifi waan sorio irati baasani jiddu lamanti ijeeftani.

³⁶Anini isaniti hima, wonti kunini ch'ufti mata d'aloota kana gubba buuti.

³⁷Ee Yerusalemu, Yerusalemu, atini raagoota fitt'e ergattu Waaqi siti erge d'akhaani d'oossite. Maro hagami anini nama kanke ch'ufa, aka lukuuni ilmoole ufi koola jalati guuratu sila guuru fed'e, ammo atini indidde.

³⁸Amma worri kanke ona taha.

³⁹Waan anini isaniti himu, Arraa achi iti deebitani na ingartani, haga isani, Waaqi nama maqa Aabbootiini d'ufu ha eebisu jettaniti.