Read BORANA BIBLE – KITAABA WAAQA Mariko 6 Bible Online

Mariko 6 - BORANA BIBLE – KITAABA WAAQA bible

Mariko 6

¹Yesoni achii kae, lafa ufiti gale; jari isaleeni isa gula yae.

²Guyyaani Sabato geennaani, inni Mana Waaqa iti kad'atani keesati nama barsiise. Nami isa d'agaye hedduuni mame waan jed'e, Namichi kuni eesaa waan kana argate? Qaroomi isaa kennani kunini maani? Wonti mama ta inni tolchu tuni maani?

³Kunini ogeesa mukhatiiniti, ilma Mariamu, oboleesa Yakobotiifi Yosafi Yudafi Simoniiniti? Oboleyaani isaa ta dubra arma nu woliini injirtu? jed'ani, isa didani.

⁴Yesoni waan worraani jed'e, Raagi fulla ch'ufati guddinna qaba, lafa ufitiifi fiit'a ufitiifi worra ufi keesati male.

⁵Achi keesati waan mama tolchu dad'abe, worra fayyad'abe harka ira kaye fayyise male.

⁶Waan worri d'ugefacha d'abeefi guddo mame. Jennaani Yesoni olla ch'ufa keesa dedeeme barsiise.

⁷Jara kud'ani lama wolti yaame, lama lamaani erge, humna jinni hamtuuni dabsatani iti kenne

⁸waan jed'eeni, Imaltu teesani keesa, ule male, woma tokole infud'atiina: qit'afi subba beese iti kad'ataniifi beesele infud'atiina.

⁹Kope salala keyad'a, ammo ubaara lamale inkeyatina jed'e.

¹⁰Ammalle waan worraani jed'e, Hojja mana nama toko olduuddani, arti tataa, haga achi yaataniti.

¹¹Fulla isani ind'ieesine ch'ufa, yokhaani fulla nami iti isani ind'ageenne ch'ufati, awaara miila ira hat'aad'a aka himacha worraa taatu.

¹²Tanaafi worri kae yae, Daba iraa deebia jed'e nama barsiise.

¹³Jinni heddule ariani, nama fayyad'abe heddu d'ad'a dibani fayyisani.

¹⁴Waan maqaani Yeso fulla ch'ufa gaheefi, hayyu Herodeni waan kana d'agaye. Nami gari waan jed'e, Yohanani ka nama batisu la duisa keesaa kae jed'ani, tanaafi inni waan mama kana tolcha.

¹⁵Ammo nami gari waan jed'e, Inni Eliya. Nami gari waan jed'e, Inni raaga, akuma raaga duri jira.

¹⁶Ammo Herodeni waan kana d'ageennaani waan jed'e, Isii Yohanani, ka anini mata iraa kute, ya kae? jed'e gaafate.

¹⁷Herodeni duri nama erge, Yohana qabe hid'e, maro Herodia, niiti Filipo, oboleesa isaa, ta Herodeni fuud'eefi.

¹⁸Maro waan kanatifi Yohanani, Aki atini niiti oboleesa keeti fuutu fullaaniti Herodeni jed'e.

¹⁹Duuba Herodiani guddo Yohana jibbite ijeesu feete. Ammo indad'abde.

²⁰Wonti akanatiifi Herodeni Yohana sodaate, maro aka inni nama d'ugatiifi qulqullo beekhufi, tanaafi nagayaani isa lakise. Inni ato hojja dubbi Yohana d'agayu ch'ufa guddo rifatele sila guddo isa ch'aqasu fed'e.

²¹Jennaani hojjaani dansaani Herodia mullatte. Gaafasi guyya qaabacha d'aloota Herodeti. Inni nama gugurdafi shumootafi jara jajaba ka Galilaya ch'ufa wolti yaame.

²²Intalti Herodia olseente, sirbite tabatte, Herodefi keessuma isaa guddo gammachiifte. Jennaani hayyuuni waan intalaani jed'e, Waan atini feetu ch'ufa himad'u, anini sii kenna.

²³Inni isiti kakhate waan jed'e, Waan atini na kad'attu ch'ufa, ato moga lafa ani fidu toko taatele, anini sii kenna jed'eeni.

²⁴Isiini d'at'e waan haad'aani jette, Anini maani himachu male? Isiini waan jetteeni, Mata Yohana nama batisu kad'ad'u jette.

²⁵Maro tokotu isiini hayyuti utaalte waan jette, Mata Yohana nama batisu qori guddo keesa naa kayi, maro tokotu naa kenni jetteeni.

²⁶Hayyuuni guddo lalefate, ammo maro kakhu ufitiifi ammalle maro keessumatiifi dubbi isii didu dad'abe.

²⁷Tanaafi hayyuuni askarti erge, Mata Yohana ira kuta, kootaani jed'e. Askartiini deemte, mana hid'aansa d'at'e, mata Yohana kute,

²⁸qori guddo keesa keete, intalati kennite, duuba intalti haad'a ufiti kennite.

²⁹Jari Yohana waan kana d'ageennaani deemani, reefa Yohana fuud'ani awaalani.

³⁰Ergattuuni Yesoti dachaate, waan tolchiteefi waan barsiifte ch'ufa isati odeesite.

³¹Inni waan worraani jed'e, Lafa mogati nu yaasa koba teteenne diqo boqonna. Wonti akanatiifi nama hedduti oli gadi yaa tanaafi sagale nyaachu dad'abani.

³²Koba ufi hobolo keesa duudani, lafa moga d'aqani.

³³Nami hedduuni worra yau jiru arge worra hubate, dira ch'ufa keesaa miilaani oriani, worra durati achiini bahani.

³⁴Yesoni hobolo keesaa buunaani, gumi guddo arge naheefi, waan worri ree tissitu inqamne fakaatuufi. Inni waan heddu worra barsiise.

³⁵Lafti galgaloomnaani, jari isaa isati d'ufe waan jed'eeni, Lafti moga, aduleeni ya d'iite,

³⁶biyya gadi d'iisi, aka reerafi olla keesa yaani waan nyaatani bitatani.

³⁷Inni waan jed'eeni, Waan worri nyaatu isaniiyu kennaafi. Worri waan jed'eeni, Yaaneti qit'a shilingi d'ibba afuri binna re, aka worri nyaatu?

³⁸Inni waan worraani jed'e, Isani qit'a hagami qabdani? Me, beena, ilaala. Ilaallaani waan jed'ani, Qit'a shanifi qurt'umi lama qamna.

³⁹Jennaani Yesoni biyya gargari qoqoode, Buuyo dooti gubba tataa jed'eeni.

⁴⁰Jennaani biyyiti teteete, fulla gari d'ibbaani, fulla gari shantama shantamaani.

⁴¹Inni qit'a shanifi qurt'umi lamaani taani guure, gubba olmillate, eebise, qit'a ch'ach'abse, jara isati kenne, aka biyya gololchani. Ammalle qurt'umi lamaanile biyya ch'ufaa qoode.

⁴²Nami ch'ufti nyaate quufe.

⁴³Worri hamba qit'atiifi qurt'umile ta dadu kud'ani lama miju guure.

⁴⁴Jari d'iira ka qit'a nyaate nama kunki shani.

⁴⁵Hojuma suni Yesoni ato gumi ufiraa galchu, waan Jara isaatiini jed'e beena hobolo duuda na dura gama galaana gara dira Bethsaida taaka.

⁴⁶Inni eegi nagayati biyyaani jed'e d'aqe gaara kore Waaqa kad'ate.

⁴⁷Lafti dukanoomnaani, ka hobolooni jiddu galaana deemtu, inni koba lafa godduti hafe.

⁴⁸Aka worri hobolo keesati maro d'awa bubbeetifi guddo gaargala qabu arge, baraaqa d'eera bisaani gubba deema d'ufe worraani bahe, ka diquma bira indabriini.

⁴⁹Ammo worri ekhera sehe iye.

⁵⁰Wonti akanatiifi worri ch'ufti isa arginaani babakhakhe. Jennaani Yesoni worrati dubbate waan jed'e, Garaa jabaad'a, naa, insodaatiina.

⁵¹Inni hobolo worra seennaani, bubbeeni ch'allifte. Worri aka taka inargiini maadefate.

⁵²Wonti akanatiifi dubbini worraa ingalle, worri waan qit'ale inhubanne.

⁵³Galaana taakinaani, lafa Genesaretiti d'ufani, hobolo lafa goddu afaani galaanati hid'ani.

⁵⁴Hobolo keesaa buunaani, biyyiti maro tokotu Yeso hubatte.

⁵⁵Lafa suni ch'ufa keesa oriani nama fayya inqamne itille ira kayani fulla isa iti d'agayani ch'ufati iti geesani.

⁵⁶Fulla inni seene ch'ufa, ollafi diraafi lafa oobru taanaanile, nama fayya inqamne geesani fulla gabaya kayani, aka handaara woya isaa tuqani isa kad'atani; duuba nami isa tuqe ch'ufti imfaye.