Read BORANA BIBLE – KITAABA WAAQA Luka 14 Bible Online

Luka 14 - BORANA BIBLE – KITAABA WAAQA bible

Luka 14

¹Guyya Sabato toko Yesoni mana nama gudda toko ka Farisayo sagale nyaachu d'annaani, biyyiti teete isa daawate.

²Duuba namichi toko ka harkafi miili itae isa dura ch'iise.

³Yesoni jara Seera beekhufi Farisayooni waan jed'e, Guyya Sabato nama fayyisitiini fullaa mo fullaaniti?

⁴Ammo worri inch'allise. Yesoni namicha qabate fayyise ufira galche.

⁵ Jennaani inni waan worraani jed'e, Eentu isani keesa, yo harre yokhaani looni isaa eela keesa buani hojuma suni yo guyya Sabato taatele keesaa imbaamne?

⁶Duuba worri dubbi tana deebisu dad'abe.

⁷Yesoni mammaasa kana worra yaamaniti hime, aka worri barch'uma ulfinna fohatu arginaani waan jed'eeni,

⁸ Hojja jila fuud'ati si yaamani, barch'uma gudda ira intaini; wonti akanatiifi hojja nama sira jiru yaamani,

⁹namichi siifi isa yaame kaani d'ufe hegeri waan siini jed'u, Nama kana duraa kai, duuba atini ch'eerte fulla d'ibi teeta.

¹⁰Ammo hojja si yaamani d'aqi khaara gubba tae, duuba hojja nami si yaame d'ufe jaali, oldabri, barch'uma gudda suni ira tai siini jed'u, yoosi ulfinna jara si woliini tae nyaatu durati argatta.

¹¹ Wonti akanatiifi nami ufi guddisu ch'ufti indiqaata, ammo nama ufi diqeesu inguddisani.

¹²Jennaani Yesoni namicha isa yaame kaaniini waan jed'e, Hojja sagale guyyatiifi yokhaani ta galgala d'aabdu, jaallani tantetiifi, yokhaani oboleyaani tante iyaamini, yokhaani fiit'a tante yokhaani dureeyi olla kanketi iyaamini, aka worrileeni garagale si iyaamne.

¹³Ammo hojja atini sagale dansa d'aabdu, hiyyeeyifa, naafafa, nama hokolufa, ballafa yaami,

¹⁴yoosi eeba argatta; wonti akanatiifi worri waan si deebisu inqabu. Waan suni ch'ufa guyya kaisa jara d'uga si deebisani.

¹⁵Gumi teete sagale nyaattu keesa namichi toko waan kana d'ageennaani waan Yesoni jed'e, Ayyaana isati ka sagale Finna Waaqa keesati nyaatu.

¹⁶Ammo Yesoni waan isaani jed'e, Namichi toko jila guddo tolche nama heddu yaame.

¹⁷Eegi sagaleeni kurfo taate, inni garbicha ufi erge aka d'aqe keessuma yaame, Koota, wonti ch'ufti amma kurfo jirti jed'uuni.

¹⁸Ammo worri ch'ufti aka taka wo haalate. Namichi qara waan jed'eeni, Anini oobru bitad'e, d'aqe ilaalu male; na eebisi, d'ufu indandau.

¹⁹Nami d'ibiini waan jed'eeni, Anini t'indi shani ta qotiyo bitad'e, d'aqe ilaalu male; na eebisi, d'ufu indandau.

²⁰Nami d'ibiini waan jed'eeni, Anini d'io niiti fuud'e, tanaafi aka d'ufu inqabu.

²¹Garbichi kaani gallaani waan kana ch'ufa abba ufiti hime. Duuba abbaani kaani dalane waan garbicha ufitiini jed'e, hurrisi, deemi, karaafi daandi dira keesa dedeemi, hiyyeeyifi naafafi ballafi nama hokoluuni kooti.

²²Jennaani garbichi kaani waan jed'eeni, Aabbo, wonti atini jette ch'ufa la taate, ammo ammalle mani inguutamne.

²³Abbaani waan garbichaani jed'e, Kara guddafi daandi alale d'aqi, nama yaami, haga mani kiyya guutamuuti.

²⁴Nami tokoleeni ka qara yaamani sagale tiyya afaaniini intuqu.

²⁵Gumiini muumme inqamne Yeso woliini deemte, inni garagale waan worraani jed'e,

²⁶ Nami nati d'ufu, ka abbaafi haad'a ufi injibine, yokhaani niitifi ijoolle yokhaani oboleesafi oboleeti yokhaani jireenna ufile injibine, dandae nama kiyya intahu.

²⁷ Nami maskali ufi fud'ate na gula ind'umne dandae nama kiyya intahu.

²⁸Eentu isani keesa ka mana ijaaru fed'u, qara tae hori ufi inhenne, aka hori hobaasuuni qabu inilaale?

²⁹Yo akasi intahiini, hegeri hojja jala yayabe ammo hobaasu dad'abe, nami argu ch'ufti isa goyeese,

³⁰waan jed'u, Namichi kuni mana yayabe ammo hobaasu dad'abe.

³¹Yokhaani hayyu kamiti, yo hayyu d'ibiini wolhad'ani, qara gadi tae inkorane, aka inni dandae nama kunki kud'anitiini nama kunki diddama ka d'ufuu jiru dabsatu?

³²Yo indandeenne, ato kaani fago jiru, licho iti erge booju kad'ata.

³³Akasuma duuba nami waan ufi ch'ufa illakimne dandae nama kiyya intahu.

³⁴Sooddi dansa, ammo yo kura d'abe maaniini kura iti deebisani?

³⁵Lafafi fulla huura iti haranile himmalle; alati gatani. Nami gurra qabu ha d'agayu.