Read BORANA BIBLE – KITAABA WAAQA Luka 16 Bible Online

Luka 16 - BORANA BIBLE – KITAABA WAAQA bible

Luka 16

¹Yesoni waan jara isaatiini jed'e, Duri dureesa tokoti jira, ka hojattu jabdu qabu. Duuba d'ufani waan jed'aniini, Nami kanke kunini hori kanke balleesu jira.

²Jennaani inni isa yaame waan jed'eeni, Wonti anini siti d'agayu kuni maani? Hori kiyya ch'ufa hedi, harka kiyyati deebisi, armaa achi iti deebite na inhojattu.

³Hojattuuni kaani waan ufiini jed'e, Abbaani huji keesaa na baasa, anini maani taha? Dandae oobru inqotu, woi kad'achule inch'eera.

⁴Anini yayu waan tolchu malad'e aka biyyiti maneeni isaaniti na yaamtu, hojja huji tana keesaa na baasani.

⁵Tanaafi nama ch'ufa ka gati abba isaa qabu yaame waan nama qaratiini jed'e, Gati abba kiyya hagami qabda?

⁶Namichi kaani waan jed'eeni, D'ebbe d'ibba toko ta d'ad'a. Jennaani inni waan jed'eeni, Tatabe tante ta irati t'aafani fuud'i, hurrisi tai, shantama t'aafi.

⁷Ammalle inni ka d'ibiini waan jed'e, Atini gati isaa hagami qabda? Namichi kaani waan jed'eeni, Kintaala d'ibba lama ka dargaye. Inni waan isaani jed'e, Tatabe tante ta irati t'aafani fuud'i, d'ibba tokofi shantama t'aafi.

⁸Abbaani hojattu kiyyiba kaani maro qarooma isatiifi guddo saade; wonti akanatiifi nami waan lafa tana gula deemu nama ifsa gula deemu ira mala lafa tanaa beekha.

⁹Duuba anini waan isaniini jed'u, Hori lafa tanatiini jaala tolfad'a, aka hojja horiini d'umate mana hegeriti isani yaamani.

¹⁰Nama waan diqooni d'ugefatani waan guddoleeni d'ugefatani; ammalle nama waan diqooni d'arefatani waan guddoleeni d'arefatani.

¹¹Tanaafi hojja qara hori lafa tanatiini isani d'arefatani eentu dandae hori d'ugatiini isani d'ugefata?

¹²Ammalle yo hori nama d'ibitiini isani d'arefatani eentu waan keesani isanii kenna?

¹³ Nami nama hojatu dandae abba lama inhojatu: wonti akanatiifi inni hegeri toko jibbe kaani jaalata, yokhaani tokooni wold'aqani kaaniini wold'abani. Isani dandeetani Waaqafi hori fulla taka inhojattani.

¹⁴Farisayooni, ta guddo hori jaalattu, waan kana ch'ufa d'ageennaani isa goyeesite.

¹⁵Ammo Yesoni waan worraani jed'e, Isani worra nama durati ufi d'ugeesu, ammo Waaqi garaa keesani imbeekha; wonti akanatiifi waan nami waan guddo wo namaa baatu sehu Waaqi woma insehu.

¹⁶ Seera Musatiifi t'aafiini raagoota haga Yohana nama batisu ch'alla jabeenna qabdi; duuba achii asi Odu Dansa ta Finna Waaqa odeesani, nami ch'ufti finna suni irreeni seenu jira.

¹⁷ Ammo ira laaftu aka lafafi gubbaani dabartu fulla dubbini Seera toko baddu.

¹⁸Nami niiti ufi lakise ta d'ibi fuud'u ya daba tolche; nami niiti d'iirsi lakise fuud'uleeni ya daba tolche.

¹⁹Duri dureesa toko jira, ka woya mimid'aaddu gati guddo qabdu naqate guyya ch'ufa gammadafi qilit'amaani deemu.

²⁰Ammalle namicha hiyyeesa toko, ka Lazaro jed'ani, ka nafi isaa ch'ufti mamadaa qabu balbala isaa dura kayani,

²¹aka inni hamba sagale mesa namicha dureesa iraa jiddu nyaatu. Sareleeni d'ufte mada isaa araabdi.

²²Hiyyeesi suni due jennaani malaikaani olfuute bobaa Abrahamuti geesite. Dureesileeni due awaalani.

²³Fulla ekherati guddo gaargale; olmillaannaani Lazaro ka bobaa Abrahamu jala tau fagoti arge.

²⁴Jennaani lalabe waan jed'eeni, Aabbo Abrahamu, naa nahi, Lazaro nati ergi aka fiit'e quba isaa bisaani keesa kaye araba kiyya qabaneesu; anini ibida kana keesati gubachuu jira.

²⁵Ammo Abrahamuuni waan jed'eeni, Gurba, qaabad'u, atini jireenna kanke keesati waan dansa argatte, Lazaroni waan hamtu argate; amma isa armati qorqoratani ammo atini gaargalu jirta.

²⁶Waan kana male, jiddu teennafi teesani boola guddoti jira, aka nami armaa bahe gara keesani dabru indandeenne, aka nami gara keesanileeni nuti taaku indandeenne.

²⁷Dureesi waan jed'eeni, Yoosi, anini si kad'ad'a, Aabbo, Lazaro gara worra keenna ergi,

²⁸anini oboleyaani shani qaba; inni ha deeme worra gorsuti, aka worri fulla tiyya ta gaargala tana ind'umne.

²⁹Ammo Abrahamuuni waan jed'eeni, Worri Musafi raagoota qaba, ha dubbi worraa d'agayaniti.

³⁰Inni waan jed'eeni, Hiyyo, Aabbo Abrahamu, ammo yo sila nami toko duisa keesaa kae deeme worrati odeese worri daba iraa deebia.

³¹Ammo Abrahamuuni waan jed'eeni, Yo worri Musafi raagoota ind'agayiini, ato nami duisa keesaa kae worrati odeesele ind'ugefatani.