Read BORANA BIBLE – KITAABA WAAQA Luka 2 Bible Online

Luka 2 - BORANA BIBLE – KITAABA WAAQA bible

Luka 2

¹Bara suni seeri gara Kaisari Augustoti bahe aka maqa nama lafa ch'ufa t'aafani.

²Tunini t'aafi qara, ta gaafa Kirenioni lafa Shamu fide.

³Duuba nami ch'ufti aka dira ufiti maqa t'aafatu yae.

⁴Yusufuleeni dira Nazareti ka Galilaya keesaa deeme, gara lafa Yahudi d'aqe, haga dira Daudi ka Bethlehemu jed'ani, waan inni d'aloota Dauditiifi.

⁵Inni Mariamu intala inni kad'ate woliini deeme aka woliini t'aafani; isiini garaacha qabdi.

⁶Ato worri achi tau jii isii ala hobae.

⁷Isiini ilma angafa deete, woya daimati uyifte, waan mana keessuma keesaa fulla d'abaniifi, gombo keesa rafifte.

⁸Arda suni keesa tissituuni halkaniini hori tissaa bulti.

⁹Malaikaani Aabbo worrati mullatte, guddinni Aabbo worrati ifse, jennaani worri guddo sodaate.

¹⁰Ammo malaikaani waan jetteeni, Insodaatiina! Anini odu dansa ta nama ch'ufa gammachiiftu isanii d'ufaani.

¹¹Halkani kana dira Daudi keesa Qarqaarsi ya isanii d'alate, ka Kristo Aabbo jed'ani.

¹²Waan kanati akheekha isanii taha: daima gombo keesa rafisani woya daima iti uyisani argitani.

¹³Jennaani malaika suni woliini duuli malaika hedduuni tassa d'ufe, Waaqa guddise waan jed'e:

¹⁴Guddinni gara Waaqa gubba ha tahu: Lafa keesale nageenni ha tahu gara jara inni eebisu.

¹⁵Malaikaani kaate gubbati oldachaate jennaani tissituuni waan woliini jette, Beena, haga Bethlehemu nuu yaasa, waan Waaqi nu beesise ka tahe kana laalla.

¹⁶Duuba titimaani yaani Mariamufi Yusufufi daima gombo keesa rafisani argani.

¹⁷Waan kana arginaani odu gurba ta d'agayani taani odeesani.

¹⁸Nami ch'ufti ka waan tissituuni himte d'agaye guddo mame.

¹⁹Ammo Mariamuni dubbi suni garaa ufi keesa keyatte heredde.

²⁰Tissituuni deebite, maro waan ch'ufa ka d'ageete argiteefi Waaqa guddifte faarsite. Wonti ch'ufti akuma malaikaani worrati himte taate.

²¹Eegi torbaani toko, hojjaani gurba qabanqaba qabani geennaani maqa isaa Yeso baasani, akuma malaikaani himte, ato haati ingaraachainu.

²²Duuba guyyaani qulqullefacha geennaani, Yusufufi Mariamuni Yerusalemu isa geesani, aka Seera Musa gula Aabbo Waaqaa kennani.

²³Wonti akanatiifi Seera Waaqa keesati waan t'aafani: ilma angafa ch'ufa Aabbo Waaqa baasu malani jed'ani.

²⁴Ammalle worri sorio baasu deeme, aka Seera Aabbo Waaqa keesati himani: Sabaliisa didiqa lama yokhaani gugurda lama.

²⁵Nama tokoti jira ka Yerusalemu tau ka Simeoni jed'ani, inni nama d'ugaati Waaqa sodaate baafama Israeli eegata. Ammalle inni Lubbu Qulqullo qaba.

²⁶Isiini aka inni haga Kristo ilma Waaqa arguti indoone isa beesifte.

²⁷Lubbuuni suni isati akheete jennaani inni Mana Waaqa olseene. Duuba abbaafi haati Yeso gurbaani olseennaani, aka isaa aada Seeri fed'u guutani,

²⁸Simeoni gurba olhampaare, Waaqa faarse, waan jed'e:

²⁹Amma, Aabbo, aka atini jette gula, garbicha kanke nagayaani deemsisi.

³⁰Wonti akanatiifi ilti tiyya yayu baafama kanke agarte,

³¹ka atini fuula gosa ch'ufa durati kurfeesite:

³²Ifsa ka gosa d'ibileti ifsu, ammalle ka guddinna gosa tante Israeliti kennu.

³³Abbaafi haati isaleeni dubbi Simeonini waan gurba dubbate guddo mamani.

³⁴Simeonini worra eebise waan haad'a isaa Mariamuni jed'e, Gurba kana ya fohatani aka nami hedduuni Israeli keesa jijige yokhaani kakau, ammalle aka akheekha waan nami hedduuni jibbu tahu,

³⁵aka heregi garaa nama heddu mullatu. Laalaltileeni onne tante woraanti.

³⁶Jaarti toko jira ta raaga ta maqaani isi Anna. Isiini dubra Fanueli ka gosa Asheri. Annani d'iirsa isi woliini ganna torbaatama teete.

³⁷D'iirsi doonaani haga ganni isii saddeetami afuri gahuti teete; Mana Waaqa keesaa imbaatu, halkani guyya isiini Waaqa guddifte agabde Waaqa kad'atte.

³⁸Isiileeni hojuma suni d'ufte Waaqaa galata deebifte, waan gurba diqa kana nama baafama Yerusalemu eegatu ch'ufati odeesite.

³⁹Seera Aabbo gula aada ch'ufa guutannaani kaani Galilayati dachaani, haga dira worra ka Nazareti jed'ani.

⁴⁰Gurbaani suni guddate jabaate; ammalle guddo qaroo, eeba Waaqa qaba.

⁴¹Duuba ganna ch'ufa abbaafi haati isaa gara dira Yerusalemu d'aqani, maro jila Pasakatiifi.

⁴²Ganni isaa kud'ani lama geennaani akuma aada worra gula jila d'aqani.

⁴³Jilti hobaate jennaani, ato biyyiti galtu, Yesoni Yerusalemuti hafe. Abbaafi haati isaa quba inqabani.

⁴⁴Ammo waan inni gumi woliini jiru sehani, duuba guyya toko ch'ufa deemnaani fiit'afi wahela keesa isa barbaadani.

⁴⁵Isa d'amnaani Yerusalemuti dachaani barbaadani.

⁴⁶Eegi guyya sadi Mana Waaqa keesati argani, ato inni jiddu qaalole tae ufile ch'aqase worrale wo gaafatu.

⁴⁷Nami isa d'agaye ch'ufti beekhumafi jecha isaa guddo maadefate.

⁴⁸Isa arginaani guddo mamani, duuba haati waan jetteeni, Gurba, atini maafi akana nuu tolchite? Anaafi abbetileeni guddo naane si barbaanne.

⁴⁹Jennaani inni waan jed'eeni, Maafi na barbaaddani? Aka anini mana Abba kiyya keesa tau male imbeetani?

⁵⁰Ammo dubbini inni worraani jed'e worraa ingalle.

⁵¹Jennaani inni worra woliini deebie, Nazaretiti gale, worra saalfate. Haati isaa dubbi suni ch'ufa garaa keesa keyatte.

⁵²Yesoni olguddate, qalbi horate, Waaqafi namileeni isa eebise.