Read BORANA BIBLE – KITAABA WAAQA Luka 5 Bible Online

Luka 5 - BORANA BIBLE – KITAABA WAAQA bible

Luka 5

¹Eegi suni, ato Yesoni d'awatu galaana Genesareti eju, gumiini dubbi Waaqa d'agayu feetu isa d'id'iibde.

²Inni hobolo lama galaana birati arge; ammo guurtuuni qurt'umi yayu t'urura d'iqachu d'at'e.

³Jennaani hobolo toko ta Simoni seene, Diqo lafa ira bisaani keesa hiisi jed'eeni. Inni hobolo keesa tae biyya barsiise.

⁴Dubbi buufannaani inni waan Simoniini jed'e, Hobolo wod'aka bisaaniti hiisi, t'urura buusi aka qurt'umi qabatani.

⁵Simoniini waan jed'eeni, Aabbo, nu halkani kana ch'ufa guddo hojanne, ammo tokole inarganne, ammo dubbi tantetiifi anini t'urura imbuusa.

⁶Akasi tolchinaani qurt'umi heddu qabani, t'ururaani ch'itu gahe.

⁷Wahela worraa ka hobolo d'ibi keesa jiru harkaani yaamani, Nu qarqaara jed'aniini. Worri d'ufe hobolo lachu qurt'umiini guute hobolooni diquma illit'iini.

⁸Simoni Petroni waan kana arginaani jilba Yesoti jige waan jed'e, Na biraa deemi, Aabbo, anini nama dabaati.

⁹Isaafi nami ch'ufti ka isa woliini jiruleeni guddo mamani, maro qurt'umi heddu qabaniifi.

¹⁰Akasuma Yakobofi Yohanaleeni, ilmaani Zebedayo, waheli Simoni mamani. Yesoni waan Simoniini jed'e, Insodaatini, armaa achi atini nama guurta.

¹¹Hobolo ufi afaani galaanati hirkisani artumati lakisani kaani Yeso gula yaani.

¹²Eegi suni, ato inni dira toko jiru, nami toko, ka qomaat'aani nafa ch'ufa balleesite, Yeso arginaani durati jige kad'ate waan jed'eeni, Aabbo, yo feete, na qulqulleesu indandeeta.

¹³Yesoni harka d'eerefate isa tuqe waan jed'eeni, Imfed'a, qulqullai. Maro tokotu qomaat'aani iraa badde.

¹⁴Yesoni waan jed'eeni, nama tokoleti inhimini, ammo d'aqi qaallicha ufi garsiisi, duuba aka aada Seera Musa gula sorio qali akasiini aka qulqullofte nama ch'ufa garsiisi.

¹⁵Ammo gurri isaa haga qarale ira lafa ch'ufa gahe; gumiini guddooni aka isa ch'aqaftufi aka d'ukuba fayyitu d'ufte.

¹⁶Ammo inni guyya gari fulla nami injirre d'aqe Waaqa kad'ate.

¹⁷Gaafa toko, ato inni nama barsiisu jiru, Farisayoofi jari Seera beekhu ka olla ch'ufa ka Galilayatiifi ka lafa Yahuditiifi dira Yerusalemule d'ufe woliini tataani.

¹⁸Jari, toko nama kokotae toko wosaasani baate d'ufeeni olseensisu fed'e, aka Yeso dura kayani.

¹⁹Ammo maro gumitiifi fulla seenanini d'abani, jennaani mana gubba korani guutu saaqani wosaasa woliini mana iraa gadi buusani jiddu biyya keesati Yesotiini d'ufani.

²⁰D'ugefacha worra arginaani Yesoni waan jed'eeni, Abbo, ch'ubbu tante la si araaramani.

²¹Jennaani jara Seera beekhufi Farisayooni wolgaafatte waan jette, Nami akana Waaqati muratu kunini eennu? Eentu dandae daba nama araarama, Waaqa male?

²²Ammo Yesoni herega worra arginaani waan jed'eeni, Maalifi akana hereddani garaa keesani keesati?

²³Tami jechuti ira laaftu, Ch'ubbu tante la si araaramani mo, Kai deemi jecha?

²⁴Ammo anini aka Ilmi Nama lafa tana keesati humna dabaani nama araaramuuni qabu isani garsiisa. Duuba inni namicha kokotae kaaniini waan jed'e, Waan anini siini jed'u, kai, wosaasa tante fud'ad'u, mana keetiti gali.

²⁵Hojuma suni inni olkae, fuula worra durati wosaasa fud'ate kae mana ufiti gale Waaqa guddise.

²⁶Nami ch'ufti maadefate Waaqa guddise guddo sodaate, waan jed'ani, Arra waan mama la argine.

²⁷Eegi waan kana Yesoni alati bahe jennaani nama damoosa guuru toko, ka maqaani isaa Lawi jed'ani, ka fulla damoosa iti guurani tau arge waan jed'eeni, Na gula kooti.

²⁸Inni waan ch'ufa lakise kae isa gula deeme.

²⁹Jennaani Lawini sagale guddo isaa d'aabe mana ufi keesati, nama heddu ka damoosa guurufi nama d'ibile sagale woliini nyaatani.

³⁰Farisayoofi jari Seera beekhuleeni waan jara isaa gungumani waan jed'ani, Isani maalifi worra damoosa guurufi worra daba woliini nyaattani d'uddani? jed'ani.

³¹Yesoni waan jed'e, Nami fayya qabu ch'ireesa imbarbaadu, ka fayya d'abe male.

³²Anini nama d'uga yaamu ind'umne, ammo nama daba yaamu d'ufe, aka daba iraa deebiani.

³³Worri waan isaani jed'e, Ergattu Yohanatiifi ta Farisayooleeni maro heddu ufi agabsite Waaqa kad'atti, ammo ergattuuni tante nyaatte d'uddi.

³⁴Yesoni waan jed'eeni, Dandeetani keessuma fuud'a agabsitani hojja abbaani fuud'a achi jiru? Hiyyo.

³⁵Ammo guyyaani ind'ufa ka abba fuud'a worra biraa fuud'ani, gaafasi jari isaa inagaba.

³⁶Yesoni mammaasa kanale worrati hime waan jed'e, Nami woya hareeti tarsaase woya dullatiti erbu injiru. Yo inni akasi tolche, inni woya haraa tarsaasa, haraafi dullatiini woli ind'at'u.

³⁷Nami farso haraa gorjo dullatiti naqu injiru; yo akasi tolchani farsooni harai gorjo dullati tarsaafte jiddi, gorjoleeni imbaddi.

³⁸Ammo farsooni hareetiini gorjo hareeti malte.

³⁹Ammalle nami farso turte d'uge ka farso haraa hojuma suni fed'u injiru; inni, Ta turte suniti ira dansa jed'a.