Read BORANA BIBLE – KITAABA WAAQA Yohana 15 Bible Online

Yohana 15 - BORANA BIBLE – KITAABA WAAQA bible

Yohana 15

¹Anini zabibu d'ugaati, Abbaani kiyya abba oobruuti.

²Dame na keesa jirtu ta mid'aani imbaamne ch'ufa inni imballeesa, dame mid'aani baaftu ch'ufa inni kolkoleti mid'aasa aka mid'aani haga qarale ira baaftu.

³Isani qara la qulqullooftani, maro dubbi anini isaniti hime suniifi.

⁴Na keesa taa, anileeni isani keesa taa. Akuma dameeni koba ufi mid'aani imbaamne, yo mukha zabibuti ejitu male, akasuma isanileeni woma indandeenne, yo na keesa teetani male.

⁵Anini mukha zabibuti, isani damele. Nama na keesa tae anileeni keesa tau ch'allati mid'aani guddo baasa; wonti akanatiifi na male dandeetani woma intolchitani.

⁶Nami na keesa inteenne, akuma dame alati gatani, gatani duuba ingoga; damele suni wolti guurani ibidati naqani gubani.

⁷Yo isani na keesa teetani dubbini tiyya isani keesa teete, waan feetani ch'ufa kad'ad'a, isanii kennani.

⁸Maro waan kanatifi Abbaani kiyya inguddifama, waan isani mid'aani guddo baaftaniifi; akasiini isani jara kiyya taatani.

⁹Akuma Abbaani na jaalatu, anileeni isani jaalad'a; jaalala tiyya keesa taa.

¹⁰Yo isani seera kiyya guuttani jaalala tiyya keesa teetani, akuma anini seera Abba kiyya guute jaalala isaa keesa tau.

¹¹Waan kana anini yayu isaniti hime aka gammadi kiyya isani keesa tae gammadi keesanileeni guutamu.

¹² Seeri kiyya kana: Woljaalad'a, aka anini isani jaalad'e.

¹³Nami tokoleeni jaalala hagana ira inqabu, ta nami maro jaalaani ufitiifi duu.

¹⁴Isanileeni jaalani tiyya, yo waan anini isaniti hime guuttani.

¹⁵Armaa achi tissele isaniini injed'u; wonti akanatiifi tisseeni waan abbaani tolchu imbeetu. Ammo anini jaalaani isaniini jed'a, waan dubbi Abba kiyya iraa d'agaye ch'ufa isaniti odeeseefi.

¹⁶Isani na imfohanne, ammo anati isani fohate erge, aka deemtani mid'aani baaftani, mid'aani ka inhamaanne. Duuba Abbaani waan maqa kiyyaani kad'attani ch'ufa isanii kenna.

¹⁷Waan kana duuba anini isaniti hima: woljaalad'a.

¹⁸Yo nami lafa isani jibbe, beekha aka, ato isani injibiini, na jibbani.

¹⁹Yo isani nama lafa tanaa taatani, nami lafa tana akuma woljaalatu isanile jaalata. Ammo waan isani nama lafaa intahiiniifi ammalle waan anini lafa keesa isani fohad'eefi, nami lafaa isani jibba.

²⁰ Dubbi anini isaniini jed'e tana qaabad'a: Tisseeni abba ufi ira injirtu. Yo nami qara na gaargalche, isanile ingaargalcha; yo nami jecha kiyya guute, keesanile inguuta.

²¹Ammo waan kana ch'ufa maro maqa kiyyatiifi isani tolchani, waan nama na erge imbeenneefi.

²²Ato sila anini d'ufe worrati himu d'ibaad'e, daba inqabani; ammo ammatana waan dabaani d'ofatani inqabani.

²³Nami na jibbu Abba kiyyale injiba.

²⁴Ato sila anini huji nami tokoleeni jiddu worrati intolchiini tolchu d'ibaad'e, daba inqabani; taatule amma worri ya anaafi Abba kiyya arge jibbe.

²⁵ Wonti kunini ch'ufti aka dubbini Seera worraa keesati t'aafani ta, ufumaa na jibbani jettu guutamtu.

²⁶Ammo yo Qarqaarsi d'ufu, ka anini gara Abba kiyyati ergu, Lubbu d'uga, ta gara Abbati baatuuti na d'ugeesa.

²⁷Isanileeni na d'ugeesitani, waan haguma duri na woliini jirtaniifi.